O mes de xullo é época de festa en moitos puntos de Galicia. Relixión, gastronomía, tradición e música forman parte dun programa que se viu afectado de novo pola covid propiciando que un bo número de celebracións de interese turístico tivesen que ser suspendidas. Pero, a oferta desas localidades non se limita aos festexos, senón que inclúe tamén patrimonio, natureza, etnografía e outros interesantes atractivos. Anímaste a descubrilos?
Percebes e ambiente mariñeiro
Corme (Ponteceso)
Localizada en plena Costa da Morte, Corme é unha localidade mariñeira famosa polos seus percebes e pola festa que cada ano, chegado o mes de xullo alí ten lugar. Os exemplares máis saborosos proceden da zona do Roncudo, un espazo que os percebeiros reservan con mimo para as datas sinaladas. A vixésimo oitava edición da festa, prevista para o sábado 10, non poderá celebrarse por mor das limitacións aínda derivadas da covid, pero a localidade ten moitos atractivos que ofrecer a quen queira achegarse ata alí. Ademais de polo ambiente mariñeiro que se respira nas súas rúas e no seu porto, Corme é un destino apreciado por praias como A Arnela, Osmo e A Ermida e por belas paisaxes como os que nos ofrece a contorna do cabo e o faro Roncudo coas súas cruces en recordo das vítimas do mar.
https://www.ponteceso.gal/ga/turismo/index.php?dep=2&mod=inf&idc=65
Lembranzas festivas do medievo
Betanzos
O recordo da feira anual que o rei Enrique IV autorizou a celebrar aos veciños de Betanzos no século XV impulsou hai case un cuarto de século a recuperación do espírito daquel mercado en clave festiva. Arrincaba así a Feira Franca Medieval de Betanzos, unha cita que desde entón xuntou gastronomía, artesanía, música, exposicións e outras propostas diversas durante a segunda fin de semana do mes de xullo. Para evitar aglomeracións este ano non haberá Feira como tal, pero si algunhas actividades de formato máis reducido que permitan garantir as medidas de seguridade fronte á covid. Varias visitas guiadas e actuacións musicais terán lugar estes días nunha localidade que presume dun extenso patrimonio, un bonito casco antigo e, por suposto, unhas famosas tortillas.
Fervor e festa no San Benitiño de Lérez
Pontevedra
Son moitos os lugares de Galicia nos que San Benito goza de gran devoción. As celebracións organizadas na súa honra congregan a multitudes de fieis, que acoden en romaría para participar nunha xornada de devoción e festa e para rogar ao santo que faga uso das súas propiedades milagrosas fronte ás afeccións cutáneas. Esta mestura de fervor, tradición e festa alcanza o seu máximo esplendor na parroquia pontevedresa de Lérez, onde o mosteiro de San Salvador é o escenario dun dos festexos máis populares de toda a provincia. Dúas son as datas nas que os fieis acoden ata alí: o 21 de marzo, cando se celebra o coñecido como San Benito de inverno, e o 11 de xullo. Unha figura de San Benito preside a impresionante fachada barroca da igrexa deste mosteiro fundado no século X e por cuxas dependencias pasaron ilustres figuras do pensamento como os pais Feijoo e Sarmiento.
https://www.visit-pontevedra.com/
Unha vila con sabor a polbo
Mugardos
Gozar do polbo é unha saborosa actividade gastronómica que se pode realizar practicamente en calquera lugar de Galicia. Localidades de toda a comunidade convertérono nun prato que non pode faltar en calquera celebración tradicional, unhas poucas erixírono no eixo central das súas festas monográficas e algunha presume mesmo de dar nome a unha receita. Este último é o caso de Mugardos onde acompañan o rico cefalópodo cunha salsa elaborada con pementos, pemento, cebola e viño branco, entre outros ingredientes, e onde cada mes de xullo celebran a súa Festa do Polbo. Este ano, os festexos volveron ser suspendidos polo que a trixésima edición da festa terá que esperar ao 2022, pero seguro que nos restaurantes da localidade será posible saborear o seu prato máis famoso.
Vieiras entre viñedos
Cambados
Falar de Cambados é falar de albariño e da famosa celebración monográfica que
ten lugar todos os anos no tránsito entre os meses de xullo e agosto. Pero o viño non é o único produto da gastronomía local do que presumen nesta localidade das Rías Baixas. Hai dúas décadas, Cambados comezou a celebrar unha festa dedicada á vieira e aínda que a escaseza do produto, en 2019, e a covid no 2020 e neste ano, provocaron a súa cancelación, sempre é bo momento para achegarse ata a capital do Albariño e gozar dos seus múltiples encantos. Desde o concello, ademais, comparten algunhas receitas (https://cambados.es/es/gastronomia-2/recetas-vieiras/) para que quen queira celebrar a súa propia festa da
vieira poida facelo desde casa.
Música e moito máis
Ortigueira
Ata 100.000 persoas chegaron a darse cita na localidade de Ortigueira para participar nunha proposta musical cuxa fama traspasa fronteiras. O Festival Internacional do Mundo Celta de Ortigueira leva xa máis de catro décadas xuntando no extremo norte de Galicia a público chegado de numerosos países para vibrar en directo cos artistas ou grupos da música folk máis importantes da escena internacional. Esta gran capacidade de convocatoria é, precisamente, a que propiciou que tanto no 2020 como neste 2021, o festival fose suspendido por mor da covid, pero os seus organizadores prometen regresar no 2022 coa edición máis longa da súa historia (do 10 ao 17 de xullo) e un extenso programa que compensará esta longa espera. Mentres iso chega, Ortigueira segue ofrecendo a todo aquel que a visita unha inmellorable combinación de praias, cantís, patrimonio, sendeirismo e outras propostas para todos os públicos.
http://concellodeortigueira.gal/descargas/?lang=es#1549457222376-ce1ee806-dc91
Callos para celebrar o San Cristovo
Carnés (Vimianzo)
Quen dixo que os callos non son para o verán? Desde logo non foron os veciños da parroquia vimiancesa de Carnés. Alí, este calórico prato é a estrela dunha celebración centenaria que ten lugar cada 9 de xullo, en véspera dos festexos en honra ao patrón do lugar, San Cristovo. A Faguía de Carnés remóntase a comezos do século XVII, cando foi fundada a confraría que na actualidade segue organizando os actos, aínda que este ano non haberá celebración. A Cerca, o recinto de pedra levantado hai 200 anos ao redor da igrexa do lugar para acoller a festa evitando que se coase algún comensal non convidado, non se encherá de alegría nin do frenético ir e vir das potas repletas de callos, pero visitar este lugar situado no corazón da Costa da Morte e da comarca de Terra de Soneira sempre convida a descubrir multitude de paraxes de gran valor natural e construcións de enorme importancia histórica e patrimonial.
http://www.vimianzo.gal/turismo
