Que facer en Galicia a semana do 29 de xullo ao 4 de agosto

Agosto toma a testemuña do mes de xullo e a axenda festiva intensifica a súa oferta. A gastronomía e a música encabezan un saboroso e animado programa de actividades no que tamén haberá espazo para a devoción, a etnografía e a artesanía.

Festa do Albariño

Do 31 de xullo ao 4 de agosto. Cambados.

A capital do Albariño volve render homenaxe ao seu produto máis famoso con cinco días de festexos. As orixes da celebración remóntanse a un concurso de adegueiros organizado a mediados do século pasado, pero desde entón a festa non deixou de medrar. Na actualidade a exaltación do viño que lle dá nome chega acompañada dun nutrido programa de concertos. Este ano, os protagonistas do apartado musical son  Treixadura (mércores 31), Christina Rosenvinge e Javiera Mena (xoves 1), Luz Casal e Cora Velasco (venres 2), Mala Rodríguez, Siniestro Total e Los Pablos (sábado 3) e a Banda de Música de Castrelo (domingo 4).

Música ao vivo

29 de xullo e 1, 2, 3 e 4 de agosto. Vigo, Bueu e Sanxenxo

A música ao vivo soará con forza estes días en Vigo, Sanxenxo e Bueu. Na cidade olívica, o programa de concertos do auditorio de Castrelos ofrecerá tres propostas tan diferentes coma interesantes: Roger Hodgson, ex-integrante de Supertramp (luns 29); Thirty Seconds to Mars, grupo do actor Jared Leto (xoves 1), e unha velada a tres bandas con Furious Monkey House, Xoel López e Vetusta Morla (venres 2). En Sanxenxo, as primeiras actuacións do novo Maestral Music Festival correrán a cargo de Aitana (sábado 3) e Hombres G (domingo 4). E en Bueu, o festival Sonrías fará desfilar polos seus escenarios a unha vintena de grupos e artistas: Dubioza Kolektiv Zoo, Periferia Norte e Nao (xoves 1), Iseo & Dodosound, La M.O.D.A., Toketing, Muyayo Rif,  Nius de Nit, Hakuna Tanaka, Som do Galpom e Ambigüo (venres 2), e La Pegatina, Sés, Boikot, Segismundo Toxicómano, Dakidarría, Zea Mays e Ninhodelosrecaos Dj (sábado 3).

Atardeceres no Gaiás

1, 2 e 3 de xullo. Santiago de Compostela.

A Cidade da Cultura dá a benvida ao mes de agosto con novas veladas de música e postas de sol. O xoves 1 actuarán os granadinos Apartamentos  Acapulco; o venres farano os composteláns Malraio, e o sábado 3 será a quenda do dúo Monterrosa, chegado desde Madrid.

Máis información aquí

Mostra da Olería de Buño

Do 1 ao 4 de agosto. Buño (Malpica).

A localidade malpicá de Buño presume estes días de tradición celebrando unha nova edición da súa Mostra da Olería. Durante 4 días, os visitantes poderán visitar os postos de venda dos oleiros locais, velos traballar en vivo, achegarse ata o Ecomuseo Forno  do Forte e participar noutras actividades diversas. Un ano máis, celebrarase unha cocedura tradicional que permitirá contemplar como se cocían as pezas antigamente.

Máis información aquí

Romaría de San Fins do Castro

1 de agosto. Cabana de Bergantiños

Ritos tan singulares como o Berro Seco ou o Santo dá Pólvora converten esta romaría nunha das máis orixinais de cantas se celebran na Costa da Morte. Como cada 1 de agosto, centenares de persoas xuntaranse á sombra das árbores que bordean a capela de San Fins para gozar dunha xornada de devoción, baile e comida campestre. 

Festival de Pardiñas

Do 2 ao 4 de agosto. Guitiriz

Corenta anos se compren xa da primeira edición do Festival de Pardiñas, unha celebración ideada pola asociación Xermolos para difundir a cultura. Os actos desta edición comezarán o venres co Certame de Cantos de Taberna e proseguirán o sábado e o domingo coas mostras de Instrumentos Tradicionais e de Artesanía, e as actuacións de grupos como Habelas Hainas, Dubhlinn & Anxo Lorenzo, Zënzar e Os Carunchos. O fin de festa poñerano o domingo Antón Reixa, Kevin Weatherill, Pepe Vaamonde, Sito Carracedo, Susana Seivane, Uxía, Xosé Manuel Pereiro e Xurxo Souto na velada Cantando ás Corenta.

Máis información aquí

Festas para lamberse os dedos

1, 2, 3 e 4 de agosto. Arnoia, Silleda, Padrón, Burela e Oímbra

Non hai celebración en Galicia na que non estea presente a gastronomía, pero en moitas festas eríxese na gran protagonista. É o caso dos actos cos que varias localidades exaltarán estes días as súas respectivas variedades de pemento. En Arnoia (Ourense) farano con 4 días de actividades (do 1 ao 4 de agosto), mentres que en Herbón (Padrón) e Oímbra concentrarán os actos nunha soa xornada: o 3 e o 4 de agosto, respectivamente. Ademais, en Laro (Silleda), do 2 ao 4 de agosto gozarán da súa Romaría da Tortilla, e en Burela, o 3 e o 4 farán o propio coa Festa do Bonito.