O ouro galego, Mel de Galicia

Se algo está claro é que Galicia pode presumir de moitas cousas. Ademais do patrimonio natural e histórico, as tradicións ou as lendas, a comunidade galega atesoura unha extensa lista de produtos gastronómicos que contan coa máxima garantía de calidade. Un dos máis relevantes: o mel. As abundantes choivas, o chan e a gran variedade de flora autóctona favorecen a elaboración deste manxar, rexistrado desde 2003 na Indicación Xeográfica Protexida ‘Mel de Galicia’.

Este organismo encárgase de controlar que o mel cumpra todos os requisitos de calidade que esixe a normativa, realizando controis regulares desde a colmea ata o punto de venda. A zona de produción, elaboración e envasado limítase unicamente ao territorio da Comunidade Autónoma de Galicia, chegando a formar parte deste selo de calidade máis de 30.000 colmeas de 400 apicultores, aproximadamente.

Os meles acreditados por este selo distínguense do resto por desenvolver gran parte do seu proceso produtivo lonxe de contornas hostís como cidades ou polígonos industriais. En gran parte dos casos, é debido a que se atopan en zonas de difícil acceso ou en risco de despoboamento. Deste xeito, todos os botes rexistrados na Indicación Xeográfica Protexida  ‘Mel de Galicia’, contan cunha contraetiqueta identificativa que garante que estamos a consumir un produto de calidade extraordinaria.

En canto a variedade, Galicia ten as condicións idóneas para producir diferentes tipos de mel. O ‘ouro doce’ galego é na súa maioría do tipo milflores, un tipo de mel que posúe desde cores claras ata escuros con sabores afroitados e florais. Con todo, tamén se producen outros sabores de tipo monofloral, entre os que destacan: o mel monofloral de eucalipto (en zonas das Rías Baixas, A Coruña, comarca de Ferrolterra ou a Mariña Luguesa) xeralmente de cor ámbar cun sabor lixeiramente acedo; o mel monofloral de castiñeiro (principalmente nos soutos de Lugo e Ourense) de cor escura ou avermellada con toques salgados; o mel monofloral de silva (no sur de Lugo e centro-sur de Ourense) que destaca por un sabor fortemente afroitado; e por último, o mel monofloral de queiroga (na Fonsagrada, O Courel, Serra da  Capelada, As Pontes e algunhas zonas de Ourense) tamén de cor ámbar escuro pero con aromas afroitados máis intensos.

Amarga, afroitada, doce ou mesmo con toques salgados, o mel é un dos produtos estrela en todos os fogares. Un produto saudable e con importantes características nutritivas que serve tanto para endulzar receitas como para recompoñer a nosa enerxía. De feito, o estudo ‘Posta en valor do mel de Galicia: etiquetaxe nutricional’ realizado pola Universidade de Vigo en 2011 co apoio do Consello Regulador Indicación Xeográfica Protexida Mel de Galicia e financiado pola Consellería do Medio Rural, Ministerio de Medio, Medio Rural e Mariño e  Feader, determina que o mel galego ten un nivel de minerais e vitamina C superior á doutras rexións.

Todas estas virtudes fan que a cultura popular galega celebre numerosas festas de exaltación dun produto que abunda e que forma parte xa do patrimonio gastronómico da comunidade. A Feira do Requeixo e do Mel nas Neves (A Coruña) que se celebra cada ano o Venres Santo, a Feira do Mel do Valadouro (Lugo) a mediados de outubro, a Feira do Mel ‘Meleira’ de Pontevedra en agosto, a Feira do Mel de Oleiros (A Coruña) en novembro ou a Feira do Queixo do Eume e Mel de Goente nas Pontes de García Rodríguez (A Coruña) tamén en outubro, son só un exemplo dalgunhas destas celebracións. Sen dúbida, un tesouro doce que non te podes quedar sen probar.