O Muíño de Senra ou cando as mareas se usaban para moer o gran

O mar é un elemento esencial en Galicia que axudou a conformar a vida e o desenvolvemento dun número importante de localidades desta terra e dos seus habitantes. Hai moitos xeitos nos que os galegos aproveitaron as augas que bañan as nosas costas, pero sen dúbida, unha das máis singulares ten que ver coas mareas. As posibilidades de aproveitamento motriz que se podían extraer das oscilacións periódicas do nivel do mar xa foran observadas na Idade Media e isto supuxo a construción dos muíños de marea en distintos puntos da costa de Europa Atlántica ao longo da séculos posteriores

 

En Galicia aínda hai algún exemplo destas enxeños, como é o caso do Muíño de Senra, en Ortigueira. Construído a principios do século pasado, este muíño tiña como finalidade triturar os grans de cereais para producir fariña. A construción levantouse na desembocadura do río Maior, na ría de Ortigueira, e incluíu, ademais do edificio que acolle as pedras do muíño, un dique e un sistema de comportas para encorar durante a marea crecente a auga que despois se usaba na baixamar para mover as moas. O seu funcionamento estaba suxeito aos ciclos da marea, polo que no interior do edificio había camas para que os operadores puidesen descansar durante as horas de espera. Como foi o caso dos muíños de río dedicados a tarefas semellantes, o pago realizábase con parte da fariña producida.

 

O Muíño de Senra foi construído por un emigrante retornado de Cuba entre 1905 e 1910 e estivo en funcionamento durante varias décadas, ata que a electricidade e os motores acabaron substituíndo este tipo de instalacións. Despois de moitos anos de abandono, foi restaurado hai unha década co fin de preservar e dar a coñecer o seu valor etnográfico.

 

A construción atópase tamén nun humidal de gran valor ornitolóxico e incluso se habilitou nas súas proximidades un espazo para a observación de aves. Así que unha visita á zona permite gozar ao mesmo tempo dun lugar de interese histórico, marítimo e natural.

 

Se queres chegar atoparás o seu emprazamento en https://goo.gl/maps/X4Lm4LTCt5beL1dN7