Que facer en Galicia a semana do 26 de agosto ao 1 de setembro

Galicia despide o mes de agosto ao grande. Historia con aire festivo, sabores para todos os padais, surf de talla mundial, música con ritmos solidarios e a exposición máis futboleira conviven na axenda de actos para os próximos días.

 

Festa da Istoria

30 e 31 de agosto. Ribadavia 

Un ano máis, Ribadavia regresa ao pasado durante unha fin de semana para gozar dunha celebración na que non faltará de nada. Música, torneos medievais, teatro, baile, cetrería, artesanía, exposicións, competicións e outras actividades diversas converterán a localidade ourensá nunha gran festa de inspiración histórica e declarada de interese turístico nacional.

Máis información aquí

 

Abanca Galicia Classic Surf Pro

Do 28 de agosto ao 7 de setembro. Valdoviño

A competición Pantín Classic dá este ano un gran salto adiante para seguir crecendo e consolidándose no panorama do surf mundial. Baixo unha nova denominación, Abanca Galicia Classic Surf Prol a proba atraerá ata a praia de Pantín (Valdoviño) aos mellores surfeiros do circuíto internacional para participar nunha cita que incluirá tres modalidades diferentes. A competición comezará esta fin de semana e prolongarase durante 11 días.

Máis información aquí

 

Festa da Anguía e Mostra da Cana do País

Do 29 ao 31 de agosto. Valga

29 anos suma xa esta celebración coa que o municipio pontevedrés de Valga rende homenaxe a un dos peixes máis saborosos do río Ulla. A festa, declarada de interese turístico, ten o atractivo engadido da mostra de augardentes. Os actos desenvolveranse durante tres xornadas, aínda que o día grande será o sábado 31 coa degustación de anguías.

Máis información aquí

 

Romaría de San Ramón de Bealo

31 de agosto. Boiro

Ritos pagáns ancestrais, a procura da fertilidade e a tradición católica mestúranse nesta romaría que presume de ser unha das máis antigas de Galicia e que vén celebrándose de forma ininterrompida desde mediados do século  XVIII. Unha multitude de persoas reuniranse de novo este 31 de agosto no Campo dous Outeiriños para participar nunha xornada de devoción e comidas campestres.

Máis información aquí

 

Valor e mestría. Galicia como fútbol

Ata o 1 de setembro. Santiago

Últimos días para visitar na Cidade da Cultura unha exposición que aborda a importancia e a pegada do fútbol na comunidade. Trofeos, medallas, carteis, bandeirolas, bufandas, camisetas, botas, fotografías e vídeos, entre outros materiais, dan forma a Valor e Mestría. Galicia como fútbol, a exposición inaugurada a mediados do mes de febreiro e que pechará as súas portas o próximo 1 de setembro.

Máis información aquí

 

Festa do Pan de Neda

1 de setembro. Neda

Declarada de interese turístico no ano 2003, a Festa do Pan de Neda é unha celebración que serve para enxalzar a calidade do produto local cunha gran comida popular. Ademais, na véspera, o 31 de agosto, haberá un aperitivo musical co Festival  Noite de Birlos, que este ano contará coa participación de Quenindiole, De Vacas e Xabier Díaz & Adufeiras de Salitre.

Máis información aquí

 

Festival Orixe

31 de agosto. Caldas de Reis

A música e a solidariedade daranse a man este sábado no festival Orixe. Aphonnic,  Jhonander, Anecoid, Soüldiers e Thomas Dylan & Balea poñerán a música a esta cita organizada en beneficio do Banco Provincial de Alimentos. Para acceder ao recinto habilitado no dique de Caldas de Reis basta con doar un quilo de alimentos.

Máis información aquí