Un Entroido para comelo

O Entroido galego non só é unha explosión de cor, máscaras e diversión, senón tamén un festín gastronómico que reúne os mellores sabores tradicionais de cada zona. Durante estas festas, a comida ten un papel fundamental, con receitas que pasaron de xeración en xeración e que fan honra á cultura gastronómica galega.

A continuación, exploramos algúns dos pratos e doces máis emblemáticos desta festividade:

Pratos Típicos do Entroido

A cociña tradicional do Entroido galego xira en torno aos atractivos do porco, que alcanza nesta época o seu punto óptimo. É o momento de levar á mesa o mellor da casa: lacón, androlla, chourizo, orella, cacheira (ou cachucha), botelo … Todo ben acompañado de patacas, grelos, garavanzos, galiña …

Cocido: Considerado o prato estrela destas datas, o cocido reúne o mellor da despensa galega: diversas carnes de porco, tenreira ou polo, chourizo, garavanzos e vexetais como patacas e verza, repolo ou grelos. É unha comida contundente que simboliza a abundancia e a celebración.

En Lalín, no corazón de Galicia, é ademais un prato tan sublime que se fai unha festa na súa honra, unha festa na que se saborea a chegada do Entroido.

Lacón con grelos: Este prato combina o lacón (extremidade dianteira do porco) con grelos (follas e talos do nabo), ofrecendo unha mestura de sabores que é sinónimo da cociña galega durante o Entroido.

Cuntis celebra a fin do Entroido cunha contundente festa gastronómica dedicada ao lacón con grelos. A festa está aberta a todo o mundo, con degustacións gratuítas de tapas e talleres gastronómicos; e nas rúas, a alegría das comparsas do Carnaval. O broche final é un brillante enterro: O Enterro do Chapante. Unha variante do enterro da sardiña que se recuperou despois de anos no esquecemento e que fai referencia aos chapantes, alcume que reciben os habitantes de Cuntis.

Botelo e Androlla: Típicos de zonas de Ourense e Lugo, estes embutidos elabóranse principalmente con costela de porco adobada e embutida en tripas. Sérvense cocidos, acompañados de patacas, chourizo e repolo ou grelos.

Viana do Bolo leva a gastronomía adherida ao seu nome. Un sinal de identidade que se mostra espléndida coa chegada dos carnavais, un dos máis antigos e auténticos de toda Galicia. Gastronomía e Entroido fúndense na denominada Festa da Androlla e do Entroido. O Domingo Gordo é o día da androlla, con degustacións de petiscos gratuítas e un gran banquete no que ademais hai caldo, grelos, lacón, cordeiro e bica. É tamén o día grande do Entroido de Viana, con boteiros e folións.

O Botelo ten a súa festa especial no Barco de Valdeorras, que o homenaxea cun xantar colectivo a finais de xaneiro, y na Fonsagrada a fin de semana anterior ao entroido. Ambas festas son de Interese Turístico.

Doces Tradicionais do Entroido

Para os máis larpeiros, o Entroido sabe a gloria. Un non sabe por onde comezar: Filloas, orellas, flores, bica …

Filloas: As filloas son a sobremesa por excelencia dos carnavais galegos. Prepáranse cunha masa de fariña, ovos e leite ou auga. Poden gozarse soas ou recheas de mel, chocolate ou crema. Tamén son típicas as filloas salgadas, elaboradas co caldo de cocido, acompañadas de lacón,…

En Lestedo (Boqueixón), na comarca do Ulla, despiden as celebracións do Entroido dedicándolle un día de festa. Alí pódense degustar filloas á pedra, feitas como manda a tradición sobre unha pedra plana e quente; e tamén as feitas nunha máquina inventada por un pasteleiro local, a un ritmo de 1.500 por hora! Un invento que fai as delicias de nenos e maiores. Outro prato forte da festa é o atranque dos Xenerais da Ulla, unha divertida batalla dialéctica entre dous xenerais, personaxes a cabalo e pomposamente vestidos representativos do Entroido desta zona, que satirizan sen piedade a actualidade política e social.

Orellas: Estas delicias de masa frita, cun toque de anís e rela de limón ou laranxa, son crocantes e adictivas, representando unha das lambetadas máis emblemáticas do entroido galego.

Flores: Cunha masa similar á das filloas, pero fritidas utilizando un molde especial que lles dá a súa característica forma de flor, son especialmente populares na provincia de Ourense.

Bica: Este biscoito manteigado, cunha cortiza superior azucrada e torrada, é típico na provincia de Ourense, especialmente en localidades como A Pobra de Trives, Laza e Verín.

Chulas de Cabaza: Bolos de vento esponxosos elaborados con cabaza, achegando unha textura suave e un sabor doce natural. Son especialmente apreciados na rexión de Ourense.

Rosquillas de Anís: Esponxosas e cun distintivo sabor a anís, estas rosquillas son un clásico do Entroido que se goza en toda Galicia.

Torta de Roxóns: Tamén coñecida como bola, esta torta combina a masa doce con roxóns, ofrecendo un contraste de sabores que deleita a moitos durante estas festividades.

Estas delicias culinarias son unha parte esencial do Entroido galego, ofrecendo unha experiencia gastronómica que complementa as celebracións e tradicións desta festividade única.