Os bosques de Galicia que se converten nunha paleta de cores

Chega o outono e Galicia cambia de cor. Os verdes do verán comezan a mesturarse con amarelos, ocres, laranxas e vermellos, mentres as follas cobren os camiños e os bosques se converten nun dos grandes espectáculos da estación.

É o momento perfecto para poñer as botas, coller un camiño e descubrir como cada territorio vive a súa propia transformación. Desde as montañas de Lugo ata os canóns do Sil, pasando polas fragas atlánticas ou os bosques de abeleiras e bidueiros, Galicia ofrece moitas formas diferentes de gozar do outono.

Ancares e Courel: o outono nas montañas

Na Galicia oriental, Os Ancares e O Courel concentran algúns dos bosques máis singulares da comunidade. A Fraga da Marronda, Cruzul e Agüeira, Os Ancares e a Devesa da Rogueira son algunhas das rutas que permiten internarse nestas paisaxes.

Aquí os carballos, castiñeiros, bidueiros e outras especies caducifolias ofrecen no outono unha extraordinaria variedade de cores. A Devesa da Rogueira destaca pola súa diversidade, mentres que na Fraga da Marronda podemos atopar, entre moitas outras especies, as faias situadas no extremo máis occidental de Europa.

É un territorio para camiñar sen présa, entre montañas, regatos e aldeas tradicionais.

Manzaneda e Trevinca: bosques de montaña

Nas montañas de Manzaneda e Trevinca, a paisaxe cambia coa altitude. As rutas das Reboleiras do Navea, o Souto de Rozavales e o Teixedal de Casaio permiten descubrir diferentes tipos de bosque nun territorio marcado polas grandes alturas e os vales profundos.

O outono é unha boa época para percorrer estes espazos e contemplar como as árbores caducifolias van transformando a paisaxe, mentres os bosques se mesturan coas montañas de Ourense.

Ribeira Sacra: bosques entre viñedos e mosteiros

Na Ribeira Sacra, o outono ten unha cor especial. Os bosques acompañan o Canón do Sil e mestúranse cos viñedos cultivados en bancais, creando unha paisaxe na que verdes, ocres e dourados conviven coas paredes de rocha e o río.

Algunhas das mellores rutas son as que percorren Santo Estevo de Ribas de Sil, Santa Cristina de Ribas de Sil ou o Bidueiral de Montederramo, un dos bosques de bidueiros mellor conservados de Galicia.

En Santo Estevo, o bosque de ribeira combina especies de carácter atlántico con vexetación mediterránea, mentres carballos e castiñeiros acompañan o mosteiro. En Santa Cristina, miles de castiñeiros cobren as ladeiras do Canón do Sil e crean un escenario especialmente fermoso cando chega o outono.

Fragas do Eume: un bosque onde o verde tamén cambia

As Fragas do Eume son un dos grandes bosques atlánticos de Galicia. O río Eume atravesa un val profundo acompañado por carballos, castiñeiros, bidueiros, ameneiros e grandes fentos.

No outono, as follas caducas engaden amarelos e ocres á espesura, mentres o bosque conserva boa parte do seu característico verde. Os camiños permiten descubrir o río, antigos muíños e o mosteiro de Caaveiro, integrado na paisaxe.

Unha das rutas que paga a pena facer é a dos Cerqueiros, un percorrido circular de 8 quilómetros que se interna na fraga e se achega tamén ás beiras do encoro.

O Xurés: un bosque na fronteira

No suroeste de Ourense, o Parque Natural Baixa Limia-Serra do Xurés ofrece unha paisaxe diferente, na que os bosques conviven con grandes formacións graníticas, ríos, fervenzas e vales de montaña.

É un territorio compartido coa veciña Portugal a través do Parque Nacional da Peneda-Gerês, formando a Reserva da Biosfera Transfronteiriza Gerês-Xurés.

Aquí o outono pódese combinar con rutas, paisaxes de montaña e mesmo un baño termal nas augas do río Caldo.

E tamén hai bosques xunto ao mar

A paisaxe forestal galega non remata nas montañas. En Cortegada, no corazón da ría de Arousa, atopamos un bosque de loureiros centenarios que converte a illa nun espazo singular.

E na Mariña lucense, o Souto da Retorta é coñecido como o bosque dos xigantes, mentres que en Lalín, a Fraga de Catasós ofrece un pequeno percorrido entre carballos e castiñeiros monumentais, un paseo alfombrado de follaxe. Unha imaxe perfecta para esta época do ano.

Unha paleta de cores para percorrer Galicia

Montañas, ríos, canóns, illas e vales. O outono transforma cada bosque dunha maneira diferente e ofrece unha boa escusa para saír a camiñar e descubrir Galicia a outro ritmo.

Ocres nos castiñeiros, amarelos nos bidueiros, verdes nas fragas e tons avermellados que aparecen entre as árbores. Cada camiño ten a súa propia paleta.

Só precisamos unhas botas cómodas, algo de tempo e ganas de deixarnos levar pola paisaxe.

Porque hai bosques que merecen ser visitados en calquera estación, pero no outono Galicia convértese nunha auténtica paleta de cores.

Anímaste a descubrila?