O vindeiro 1 de xullo, a Cidade da Cultura en Santiago de Compostela converterase no epicentro gastronómico de Galicia coa celebración da IX edición da gala Mellor Cociñeiro de Tapas “Sete Cidades Sete Sabores”. Unha cita que reunirá aos gañadores dos principais concursos locais de tapas de Ferrol, A Coruña, Santiago de Compostela, Pontevedra, Vigo, Ourense e Lugo. O obxectivo: elixir a mellor tapa de Galicia e render homenaxe ao talento e creatividade dos chefs que mellor representan a cociña en miniatura do país.
Cada cidade estará representada por un restaurante e o seu chef gañador, quen defenderá as súas propostas en formato showcooking, diante do xurado e do público.
Ferrol – Bacelo
Desde a cidade departamental, o restaurante Bacelo, con Álex Martínez e Mar Lago á fronte, chegará tras a súa vitoria no certame ferrolán. Bacelo aposta por unha cociña contemporánea con moito arraigamento local, onde o produto e a técnica danse a man. Ferrol, cidade de historia naval, tamén empeza a soar con forza no mapa gastro galego.
A Coruña – AMA Italiana Contemporánea
Vincenzo Amaddeo, chef de AMA, representará unha fusión única entre Galicia e Italia. A súa cociña elegante e creativa conquistou A Coruña cunha proposta que mestura sabores do sur de Europa e mimo pola estética. A cidade herculina conta cunha gran gastronomía urbana.
Santiago de Compostela – O Sendeiro
Alejandro Ferreiro, do restaurante compostelán O Sendeiro, presentará unha tapa sofisticada baseada en produto de tempada, coa que xa arrasou en Santiago(é)Tapas. A súa cociña combina sensibilidade e técnica, nunha cidade onde tradición e vangarda conviven entre pedras centenarias.
Pontevedra – O Cafetín da Alameda
Rubén González, do coñecido Cafetín da Alameda, defenderá a creatividade pontevedresa cunha tapa colorista e chea de sabor. Pontevedra, peonil, amable e en pleno auxe, posicionouse como unha das cidades máis dinámicas en canto a oferta gastronómica.
Vigo – A Marciana
Desde a cidade olívica chegará Daniel Bastos, da Marciana, cunha proposta audaz e mariña, gañadora do concurso O Petisquiño. A Marciana representa esa nova onda de cociñeiros vigueses que combinan frescura, risco e amor polo Atlántico.
Ourense – A Feira
Paco Gómez, alma mater da Feira Polbeira S.A., trasladará ao certame a esencia da cociña ourensá cun toque de autor. A tapa, baseada en tradición reinventada, será unha declaración de principios: sabor, memoria e produto. Ourense, famosa polo seu polbo, abrirase camiño con forza entre propostas máis vangardistas.
Lugo – Orixe do Campo
José Luís Pardo e Auriana Macías, de Orixe do Campo, chegarán desde Lugo cunha tapa que fala de ruralidad, sustentabilidade e cociña de proximidade. Este novo restaurante irrompeu con forza, sendo un reflexo da evolución culinaria dunha cidade tradicionalmente vinculada á carne e a horta.
A Gala deste ano será moito máis que unha competición: será unha mostra do enorme potencial da cociña galega en pequeno formato, da creatividade dos seus chefs e da riqueza das súas cidades. Galicia servirase agora tamén… en tapas.
