Torre de Hércules

A Coruña

Deixarse acariñar pola brisa mariña do lugar e internarse polas escaleiras da Torre de Hércules axudan a imaxinarse a importancia dun monumento que foi incluído na selecta listaxe de Patrimonio Mundial da Unesco no ano 2009. Pero para captar mellor a súa magnitude, no centro de interpretación e atención ao visitante hai unha maqueta tiflolóxica (deseñada para ser apreciada a través do tacto) dun pouco máis dun metro de altura que permite contemplar coas xemas dos dedos a arquitectura desta torre milenaria.

Xardín Sensorial de Castrelos

Vigo

Entre os numerosos atractivos que ofrece o parque vigués de Castrelos ao visitante atópase desde hai xa uns anos un Xardín Sensorial pensado para que os invidentes poidan gozar dunha grata experiencia. Trátase dun percorrido adaptado a persoas con deficiencias de visión e artellado a través de estímulos táctiles e  olfactivos. Unha cinta guía ao participante por unha ruta dotada tamén con paneis explicativos en braille sobre as distintas especies que hai no xardín e as súas características, así como sobre a historia do recinto.

Centro de Interpretación das Torres Arcebispais

Pontevedra

Unha fortaleza xa desaparecida cobra vida neste centro de interpretación nado para albergar e dar a coñecer as ruínas aparecidas durante unhas obras acometidas no ano 2007. Un dos seus principais atractivos é, precisamente, unha maqueta táctil do pazo-fortaleza rotulada en braille que permite imaxinar o aspecto desta impoñente construción.

Termalismo

Toda Galicia

Os romanos e os castrexos xa coñecían as propiedades mineiro medicinais das augas galegas, por iso non é de estrañar que Galicia sexa hoxe un inmellorable destino para o turismo termal con instalacións, algunhas delas xa centenarias, repartidas por toda a comunidade. Xa sexa para aproveitar os seus fins terapéuticos, xa sexa para gozar dunha experiencia que pode combinar estética, benestar e relax, os balnearios son unha proposta idónea tamén para as persoas invidentes. Só fai falta pechar os ollos e gozar.

Gastronomía

Toda Galicia

Unha visita a Galicia estaría incompleta se non incorporase como elemento destacado o seu apartado gastronómico. A horta e as augas galegas nutren do mellor produto un receitario repleto de propostas saborosas capaces de estimular todos os sentidos, pero especialmente o olfacto e o gusto. Cidades, vilas e pobos ofrecen unha ampla oferta de establecementos onde as deficiencias visuais non serán impedimentos para gozar co padal desta terra.

Sensacións no mar

Rías Baixas

Varias entidades comarcais que agrupan a municipios do litoral galego teñen desenvolvido nos últimos anos iniciativas turísticas destinadas á poboación invidente. É o caso do proxecto Sentir ou Mar, nado para impulsar o turismo inclusivo na ría de Muros e Noia e que xa permitiu a un grupo de invidentes familiarizarse co mundo da navegación. Para ese mesmo público están dirixidas outras propostas postas en marcha polos municipios da mancomunidade de Arousa Norte e por empresas privadas das Rías Baixas, como centros de mergullo que organizan bautismos de mergullo e saídas en barco para coñecer a importancia da industria do mexillón e degustar os seus saborosos produtos.

Illas Cíes

Vigo

Os invidentes son benvidos á xoia da coroa do Parque Nacional das Illas Atlánticas de Galicia. A prohibición de introducir animais domésticos por parte dos visitantes non rexe para os cans guía e entre o material informativo ao dispor de quen se achega ata o arquipélago hai folletos en braille. A realización de visitas guiadas con grupos de persoas con algunha discapacidade son unha práctica habitual desde hai anos.

Catedral de Santiago

A Catedral de Santiago é a maior obra de arte románica en España e cada ano recibe a decenas de milleiros de peregrinos que realizan o Camiño e a outros moitos visitantes que non queren perderse a atracción principal dunha cidade cuxo centro histórico foi declarado patrimonio da humanidade pola Unesco. Situada na capital galega, non podes esquecer achegarte a ela se viaxas a Galicia. É certo que a beleza da súa fachada pódese admirar dende a Praza do Obradoiro, pero a experiencia de visitar o seu interior é inigualable e permite contemplar outros dos seus múltiples atractivos.

Para descubrir o monumento a fondo é necesario reservar unha visita mediante a súa páxina web. Hai diferentes entradas segundo as preferencias do usuario: a primeira dá acceso a un percorrido completo polo Museo da Catedral e a visita ao Pórtico da Gloria, mentres que a segunda só permite o acceso ao Museo. Ambas están dispoñibles durante todo o verán pero, debido á crise sanitaria, o horario redúcese (de martes a domingo entre as 10:30 e as 14:30 horas). Unha terceira modalidade de entradas inclúe a visita ao museo de arte sacra da parroquia de Santa María de Sar, aínda que esta aínda non reabriu as súas portas.

Se queres saber máis, visita a súa páxina web e reserva: http://catedraldesantiago.es/

Illas Cíes

Arquipélago situado na entrada da Ría de Vigo, as illas Cíes son un dos lugares máis populares de Galicia, xa que constitúen un importante patrimonio natural. De feito son un dos principais espazos do Parque Nacional Marítimo-Terrestre das Illas Atlánticas de Galicia. Moitos turistas non se queren perder as súas espectaculares paisaxes, as súas praias de area fina e as súas augas cristalinas, atractivos todos eles que mereceron a atención nos últimos anos de medios de comunicación de todo o mundo. Para acceder ás Cíes é necesario pedir unha autorización a través da web do Parque Nacional e, ademais, reservar por adiantado un dos barcos que parten dende varios municipios próximos, como Vigo, Cangas ou Baiona. Ademais, hai un cámping nas illas que permite pasar a noite alí e facer que a experiencia de visitalas sexa aínda máis completa. Tamén é preciso reservar praza con antelación.

Nesta web poderás solicitar a autorización para acceder ás illas que é necesaria tamén para poder reservar praza nos barcos. https://autorizacionillasatlanticas.xunta.gal/

Praia das Catedrais

A praia das Catedrais é un emblemático espazo natural pertencente ao municipio de Ribadeo e situado na costa da provincia de Lugo. A singularidade do areal e o motivo da súa fama reside no conxunto de arcos de rocha que foron esculpindo as augas do mar Cantábrico co paso dos anos ao golpear incesantemente a pedra. Este conxunto de cantís poden acadar ata os 30 metros de altura e impresionan a todo aquel que se achega.

A beleza desta paisaxe natural pode contemplarse dende os carreiros ou os miradoiros, para o que non é necesario facer ningunha reserva. Con todo, a mellor maneira de contemplalo en todo o seu esplendor é baixar ata a area cando hai baixamar e pasear por debaixo dos arcos, escoitando a ondada. Por iso, é importante comprobar os horarios das mareas e solicitar unha entrada de forma gratuíta.

Fai a túa reserva en https://ascatedrais.xunta.gal/monatr/inicio

Cova do Rei Cintolo

A  Cova  do Rei  Cintolo é a cova natural máis grande de Galicia, con máis de 6.500 metros de lonxitude. Situada en  Argomoso, dentro do municipio lucense de Mondoñedo, no seu interior pódense observar espectaculares formacións de estalactitas e estalagmitas e a súa estrutura laberíntica está repartida en diferentes galerías de orixe cárstica. Estas peculiaridades, xunto ás lendas que rodean a zona, fan que este lugar teña unha interesante personalidade xeolóxica que moitos visitantes non se queren perder.

Para acceder á cova é necesario participar no programa de visitas, facendo unha reserva con mínimo dun día de antelación. Estas rutas realízanse mediante un atractivo percorrido priorizando a seguridade, en grupos guiados e reducidos con idade mínima de 12 anos. O prezo é de 15 euros por persoa. Para programar o acceso á cova ou solicitar información hai que poñerse en contacto coa oficina de turismo de Mondoñedo ou chamar ao 982 507 177.

Parque Natural do Invernadeiro

O Parque Natural do Invernadeiro é un espazo natural agochado no Macizo Central, concretamente nos montes do municipio de Vilariño de Conso. Con case 6.000 hectáreas, trátase dun paraíso no que predominan as paisaxes rochosas e as verdes e ondulantes montañas. A zona caracterízase pola súa riqueza e diversidade  faunística e botánica, creando un importante espazo de interese tanto natural como cultural. As distintas rutas trazadas e marcadas no parque permiten gozar das súas variadas paisaxes, internarse en bosques centenarios e tratar de observar a fauna diversa que o poboa.

Para visitalo é necesario solicitar con antelación un permiso de acceso expedido por escrito polo Servizo de Conservación da Natureza de Ourense e realizar todos os percorridos a pé polas rutas marcadas. Podes enviar un correo electrónico á dirección servizo.conservacion.natureza.ourense@xunta.es ou chamar aos seguintes números de teléfono: 988 386 376 – 988 386 029.

Torre de Hércules

A Coruña pode presumir de dispoñer no seu territorio do faro romano en funcionamento máis antigo do mundo, a Torre de Hércules. Declarado Ben de Interese Cultural e Patrimonio da Humanidade, este edificio traslada a calquera que o visita a unha época de mitos e de lendas. A pesar de que a orixe da torre é descoñecida, sábese que foi reedificada polos romanos no século I e desde entón foi un punto de referencia para os navegantes.

Para introducirse no máis fondo deste emblemático monumento hai que unirse a unha visita guiada, xa que o ingreso realízase por franxas horarias de 15 minutos, cun acceso limitado a grupos dun máximo de 17 persoas. As tarifas varían entre 1,5€ e 3€, aínda que en casos concretos o acceso é gratuíto. É posible adquirir a entrada no centro de atención ao visitante xusto antes de acceder ao recinto, pero tamén se pode adquirir cun día de antelación, algo recomendable en épocas de gran afluencia turística.

Para máis información, visite a súa páxina web: http://www.torredeherculesacoruna.com/

Illa de Ons

O arquipélago de Ons está situado na entrada da Ría de Pontevedra e pertence ao municipio de Bueu. Do mesmo xeito que ocorre coas Illas Cíes, é un espazo natural paradisíaco incluído no Parque Nacional das Illas Atlánticas. A illa principal destaca polas súas paisaxes, as súas praias, as súas rutas e o seu pobo costeiro, e é ideal para realizar unha escapada no verán.

Para explorar esta contorna natural é necesario solicitar unha autorización a través da páxina web do parque nacional. Unha vez cumprimentado o formulario e obtida a autorización, o seguinte paso é escoller a navieira coa que chegar ao destino final. Os barcos parten desde dende Vigo, Baiona, Bueu, Cangas, Portonovo e Sanxenxo. Ons tamén dispón dun cámping no que é posible pasar a noite.

Pide a túa autorización: https://autorizacionillasatlanticas.xunta.gal/illasr/inicio#

A súa construción remóntase ao século I, baixo o mando dun arquitecto de Coimbra chamado Gaio Sevio Lupo, que dedica a súa obra ao deus da guerra Marte, tal e como se pode ler nunha inscrición ao pé da torre. Xa desde séculos antes de Cristo, existía na badía coruñesa un poboado de orixe celta coñecido como Brigantia no que habitaban os ártabros. Pola súa situación estratéxica, é alí onde se acaba construíndo a Torre de Hércules, co obxectivo de guiar ás embarcacións que navegaban cara ás Illas Británicas en busca de estaño, cobre e ferro. Durante os séculos da romanización, a torre serve de faro, ata que no século XV os ataques normandos obrigan aos habitantes desa poboación primitiva ao seu abandono, refuxiándose no interior. É no século XIII cando Alfonso IX reconstrúe e poboa o vello porto dándolle como nome Crunia.

Comezan así uns séculos de prosperidade e crecemento propiciados polo comercio marítimo. Con todo, a Torre de Hércules continúa abandonada, utilizándose no século XVI boa parte das súas pedras para construír o castelo de San Antón e as murallas que defenderían a cidade dos ataques ingleses. Hai que esperar ata o século XVIII para ver como a torre recupera o seu protagonismo, pois nesa época A Coruña mantén unha intensa actividade comercial coas Indias, e tanto os barcos de América como os doutros portos europeos e españois chegan ao porto coas súas mercadorías, xurdindo así a necesidade de dotar ao porto cun faro que guíe e faga máis segura a navegación. Lévase a cabo entón a súa restauración.

Quizá polo feito de ser tan antiga ou pola maxia especial que desprende, ao longo dos séculos xurdiron numerosos mitos e lendas que aínda hoxe séguense transmitindo de xeración en xeración. A máis coñecida refírese á fundación da cidade da Coruña e aparece mesmo recollida na Crónica Xeral de Alfonso X O Sabio no século XIII. Conta esta lenda que existía nestas terras un xigante chamado Gerión, o cal tiña aterrorizados a todos os seus habitantes. Acode entón en axuda destes Hércules, fillo do deus Zeus, que se enfronta ao xigante durante tres días e, tras unha dura loita, vence. Mata a Gerión, córtalle a cabeza e, sobre ela, manda construír unha torre conmemorando a súa vitoria. Dise que a primeira persoa en habitar esas terras xa libres foi unha muller chamada Crunna, cuxo nome bautizaría á nova cidade. O curioso é que, a pesar de tratarse dunha lenda, desde 1448, no escudo da Coruña aparecen representadas a Torre de Hércules e a caveira do tirano Gerión.

Tal é o valor e a importancia deste faro que en 1931 declárase Ben de Interese Cultural e, en 2009, monumento Patrimonio da Humanidade. O 9 de setembro de 2008, ademais, e coa colaboración do Instituto de Estudos Torre de Hércules e do Servizo Natural de Parques Naturais de Estados Unidos, hermánase coa Estatua da Liberdade, estreitando así os lazos que unen a estes dous monumentos a ambos os dous lados do Atlántico. Ese mesmo ano hermanaríase tamén co Faro do Morro, un faro situado en Cuba cunha antigüidade de 153 anos.

Se queres descubrir máis e mesmo formar parte desa luz que durante tantos anos foi (e é) punto de referencia para centos de miles de navegantes, só debes achegarte á Coruña e subir os 234 chanzos que a separan do chan. De verdade paga (moito) a pena.