Monte Pedroso

O Monte Pedroso é o miradoiro por excelencia de Santiago de Compostela. Está a tan só tres quilómetros do centro urbano e pódese subir andando a través dunha ruta que atravesa unha contorna de gran valor natural. O ideal é subir á tardiña dun día claro cando as últimas raiolas iluminan a fachada da catedral. Se se dispón de vehículo propio tamén é boa opción ir de noite para ver todas as luces da cidade. Na aba do monte atópase A Granxa do Xesto, unha zona recreativa cun parque infantil, un lago e un establecemento hostaleiro. Neste punto arrinca unha senda peonil para subir ata o miradoiro. Pódese chegar facilmente ata A Granxa do Xesto andando ou en coche a través da rúa Casas Novas. A liña 9 do transporte urbano chega ata Santo Ignacio do Monte, a medio quilómetro de distancia.

Cidade da Cultura

No alto do monte Gaiás está situada a Cidade da Cultura, un complexo formado por catro edificios (e un quinto en construción, o Edificio Fontán) que constitúe un dos mellores exemplos da arquitectura contemporánea. Deseñado polo arquitecto estadounidense Peter Eisenman, a planta das edificacións simula a forma dunha vieira pola que discorren as rúas do centro histórico compostelán. A Cidade da Cultura ofrece ao visitante unha gran oferta de actividades: desde o lecer á natureza, pasando pola gastronomía, a cultura ou a arte. Neste último ámbito destaca o Museo Centro Gaiás, que tras a súa fachada de 43 metros de altura alberga exposicións de todo tipo. Próximo a el atópanse as Torres  Hejduk, cuxas luces nocturnas son unha icona de Santiago ao poder ser divisadas desde moitos puntos da cidade. Actualmente acollen a intervención artística Paisaxes incultas, de Cristina García Fontán, que as converte nun bosque galego en miniatura.

Os arredores da Cidade da Cultura ofrecen espazos verdes, ideais para facer deporte ou simplemente dar un paseo relaxado. O Bosque de Galicia, coas súas 34 hectáreas de extensión e o seu 5 km de sendeiros peonís e ciclistas, é unha das mellores opcións para subir ao Gaiás. O Parque do Lago conta con case 5.000 m2 de extensión e está equipado con bancos e elementos deportivos para un circuíto de running. Destaca, como o seu propio nome indica, a zona do lago pola súa beleza coa silueta dos edificios de Eisenman ao fondo.

Pódese acceder á Cidade da Cultura ben a pé ou en bicicleta (a través do Bosque de Galicia ou da avenida de Manuel Fraga); en coche (pola avenida de Manuel Fraga ou pola saída directa da AP-9); e en bus urbano, a través da liña 9. Aínda que o recinto abre todos os días, o museo pecha os luns.

Centro Galego de Arte Contemporánea e parque de Bonaval

Situado xunto ao Museo do Pobo Galego (na rúa Valle Inclán), o Centro Galego de Arte Contemporánea (CGAC) é outro dos símbolos da modernidade e do amor de Compostela pola arte e a cultura. Deseñado polo arquitecto Álvaro Siza en 1988, o edificio conxuga a modernidade das súas liñas, formas e volumes coa tradición galega, representada a través do granito que o compón, a pedra máis común en Galicia.

Neste momento son tres as exposicións que se poden visitar no CGAC: Crebas, de  Francesc Torres; Caosmos, de Antón Patiño; e Wonder Women, unha recompilación das obras de varias artistas. Ademais, existe unha colección permanente con máis de 1.200 pezas adquiridas co orzamento anual do museo ou ben grazas a doazóns de particulares, institucións ou artistas. Está aberto de martes a domingo de 11:00 a 20:00 horas.

O propio edificio do CGAC está construído de forma que sirva de acceso ao parque de Bonaval. Este espazo verde é un dos máis coidados de Compostela. Ofrece unhas vistas sorprendentes dos tellados da cidade, e desde a parte máis alta destaca a maxestosidade das torres da catedral. Conta cun antigo cemiterio e moitas fontes, o que provoca que se escoite a auga correr en todo momento. É ideal para facer un  picnic ou para tombarse á sombra dun das súas árbores para ler un libro ou escoitar música. É facilmente accesible a pé desde calquera punto da cidade, pero tamén hai un aparcadoiro nas proximidades.

Monte Pedroso
Este é o miradoiro máis popular para observar a cidade de Compostela ben de cerca. Atópase na zona norte da cidade e pódese acceder, desde o centro de Santiago, atravesando o moi histórico barrio do Carme e afrontando despois uns poucos quilómetros de subida nos que é doado atopar a ciclistas que adestran nas súas ramplas. Na base, o Pedroso acolle o parque da Granxa do Xesto, con amplos prados, parque e cafetaría para pasar unha tarde de bo tempo. No alto, a vista é probablemente a mellor que se pode ter: coa Catedral no centro, Santiago resplandece ocupando o val, co pano de fondo da impoñente figura da Cidade da Cultura en segundo termo e, máis alá, o Pico Sacro.

Monte de Deus
Outro balcón sobre a cidade pouco visitado e que presenta unha vista de Compostela moi diferente da habitual. O Monte de Deus é un miradoiro situado na zona norte da cidade, nas alturas do barrio de Guadalupe e de Vite, arranxado hai uns poucos anos para poder gozar dunha vista distinta. Desde calquera das dúas plataformas de que dispón percíbese ben o centro, con todos os edificios históricos coroando o promontorio da antiga Libredón, en especial a mole de San Francisco e o mosteiro de San Martiño Pinario. En primeiro termo, os barrios do norte.

Monte do Viso
Ao sur da cidade, o Monte do Viso aproxima a perspectiva que os peregrinos teñen da cidade cando chegan ao Monte do Gozo. De feito, esta elevación atópase entre ese punto e o centro de Compostela, xusto por encima da Cidade da Cultura. Hai que chegar por un camiño de pedras moi empinado e na cima non hai máis infraestrutura que un vértice xeodésico azoutado polo vento, pero a vista paga a pena.

Monte da Agrela
Un miradoiro pouco coñecido e que paga moito a pena visitar é o da Pena da Agrela, na parroquia de Lampai do municipio de Teo, limítrofe con Compostela. Desde as súas penas (a subida pode facerse en coche ata practicamente a cima, pero é bastante empinada) non se ve o centro de Santiago, pero si os vales que a circundan e mesmo a vila da Estrada, ao sur. A gran sorpresa vén cando se xiran as costas e se enfoca a vista ao suroeste: en liña recta pode verse, impoñente, toda a desembocadura do Ulla, unha serpe que acaba na ría de Arousa. De feito, nos días máis claros é posible distinguir desde aquí a Illa de Arousa. As elevacións máis próximas teñen moita historia: en primeiro termo pode verse, por exemplo, Castro Valente, que en tempos contaba cun torreón de vixilancia contra as invasións por mar.