Hoxe tócalle a quenda a Ferrol. Percorreremos a cidade e a súa contorna a través das fotos que vós, os embaixadores, fixéstesnos chegar durante a semana pasada. Ferrol é unha preciosa cidade situada no norte de Galicia, na Ría do mesmo nome, en plena Costa Ártabra. O seu elegante deseño aínda conserva restos do seu antigo esplendor, e a cidade está chea de fermosos recunchos. 

Ferrol é coñecida sobre todo polo seu pasado militar, proba diso é o Arsenal Militar, Baluarte de San Xoán ou o Castelo de San Felipe, e tamén o naval: os estaleiros, o Museo Naval ou o Museo da Construción Naval. Pero Ferrol é moito máis que iso: chama a atención o importante patrimonio do Ferrol da Ilustración, o Ferrol Modernista ou un Ferrol máis moderno, que ten o seu expoñente máis coñecido na arte urbana do barrio de  Canido.

O barrio da Magdalena, construído seguindo o racionalismo da Ilustración e con grandes exemplos de arquitectura modernista, é o centro social da cidade. Nel atópanse algúns dos edificios máis emblemáticos da cidade: Teatro Jofre, Concatedral de San Xulián, edificio da Peixaría ou Mercado da Magdalena, o Concello ou o antigo Goberno Militar, hoxe sede Afundación.

O peirao de Curuxeiras, co seu trazado de mediados do século  XVIII, é un punto turístico imprescindible na cidade. Ao porto de Ferrol chegaban peregrinos escandinavos,  centroeuropeos e das Illas Británicas na Idade Media e hoxe é o inicio dunha dos roteiros oficiais do Camiño de Santiago: o Camiño Inglés. Unha dos roteiros que máis creceu nos últimos anos e de gran seguimento entre peregrinos de todo o mundo.

Pero Ferrol tamén é unha cidade aberta á modernidade, boa proba diso é a colección de arte urbana que existe no barrio de  Canido: as  Meninas de Canido. Esta iniciativa xurdiu en 2008 da man do artista local Eduardo Hermida e desde entón todos os anos realízanse novos murais emulando a obra do famoso pintor e converténdose nun dos reclamos turísticos.

A cidade conta tamén con importantes museos, moi relacionados coa súa historia naval como o Museo Naval, o Museo da Construción Naval, ou o Museo do estaleiro de Navantia. Destaca tamén o Museo da Semana Santa de Ferrol, que mostra imaxes e aveños que participan na esta celebración, declarada de Interese Turístico Internacional.

Pero se a cidade ten moito que ofrecer, os seus arredores non quedan atrás. Ferrol conta con fermosas praias tanto dentro da ría como a mar aberto. Aínda que son estas últimas as que gozan dunha maior fama, sobre todo entre os amantes dos deportes náuticos, como o surf.

Unha boa forma de observar a cidade é subir ata o miradoiro de Chamorro e gozar das vistas sobre a cidade.

Así que non esperes máis, Ferrol, como ves, ten moito que ofrecer. Queremos desde aquí dar as grazas a todos os #EmbaixadoresDeFerrol que coas súas fotografías axúdannos a coñecer Ferrol un pouco mellor.