Museo Etnolúdico de Galicia

Ponteceso

Na localidade bergantiñá de Ponteceso atópase este auténtico paraíso para os amantes dos xogos e os xoguetes. Máis de 4.000 pezas procedentes de todo o mundo forman a colección deste centro no que conviven culturas milenarias, xogos tradicionais galegos e exemplos de como evolucionaron as prácticas deportivas. Os visitantes terán tamén a oportunidade de participar nalgunhas das actividades que alí se organizan como talleres de plastilina, origami ou construción de xoguetes. Máis información aquí.

Aldea Grobit

O Grove

Os hobbits, personaxes creados polo escritor J.R.R. Tolkien, teñen uns parentes na Toxa, a pequena e famosa illa situada no municipio pontevedrés do Grove. O seu lugar de residencia, a Aldea Grobit é un parque infantil formado por pequenas vivendas que parecen brotar da terra (unha delas pódese visitar), zonas de xogo e troncos multicolores. O espazo está situado nun parque forestal de gran valor natural habitado tamén por un par de apracibles burros, sempre dispostos a interactuar cos visitantes. Máis información aquí.

Illa do Covo

Pontevedra

Esta pequena illa fluvial situada nas augas do río Lérez combina cultura, lecer e diversión para converterse noutro destino ideal para as familias. Alí sitúanse as pezas do proxecto artístico bautizado como a  Illa dás Esculturas, zonas para o paseo e un espazo para o lecer en familia. É, ademais, escenario dunha orixinal proposta denominada Descubrindo a Illa do Covo, que anima aos participantes a descubrir o patrimonio artístico e natural do lugar a través dunha ruta guiado por oito vídeos. Máis información aquí.

Cidade da Cultura

Santiago de Compostela

O complexo levantado no monte Gaiás ofrece numerosas propostas para gozar dunha xornada de xogos e diversión en familia. O rocódromo e a pista de skate do Xardín do Teatro e a zona de xogos do Parque da Balea farán as delicias de nenos e mozos, mentres que aqueles que prefiran pasear ou relaxarse nunha contorna verde poderán facelo no Parque do Lago, no Xardín Literario ou no Bosque de Galicia. Máis información aquí.

Domus

A Coruña

Os seus máis de 150 módulos interactivos converten este museo coruñés nun lugar ideal para aprender e reflexionar sobre os seres humanos dunha forma lúdica e divertida. Na actualidade, por mor da  covid, ofrece tres actividades (maker@domus, atapuerca@domus e misión@domus) previa reserva de prazas destinadas a grupos de conviventes. Máis información aquí

Museo Galego do Xoguete

Allariz

Entre a ampla oferta museística do municipio ourensán de Allariz hai un oco tamén para o mundo do xoguete. O Museo Galego do Xoguete, situado no pazo do antigo xulgado, acolle unha colección de xogos e xoguetes de épocas moi diferentes. Máis información aquí.

Colección de Trens Fernández Pacheco

Ourense

A historia e evolución do mundo do ferrocarril está condensada nas máis de 4.000 pezas desta colección que abarca desde as primeiras máquinas de vapor ata a alta velocidade. Entre as súas réplicas a escala non faltan trens míticos como o Orient  Express ou a máquina empregada polo cómico Buster Keaton na película “O maquinista da Xeneral”. A colección pódese visitar no Centro Cultural Marcos Valcárcel. Máis información aquí.

Granxa de Briz

Marín

Lagos, tobogáns, xogos integrados na natureza e espazos para o paseo danse cita nun recinto que ata comezos do século XIX formou parte das posesións do mosteiro de Oseira. O lugar inclúe tamén un espazo denominado Parque dos Sentidos con cinco zonas diferenciadas para estimular o tacto (con texturas diferentes), o oído (con instrumentos musicais de gran tamaño), a vista (coas panorámicas que ofrece o lugar), o olfacto (con plantas aromáticas) e o gusto (con árbores froiteiras).

Máis información aquí.

Museo de Maxia Kiko Pastur

Santiago de Compostela

Desde novembro do 2020, o mundo do ilusionismo dispón dun espazo propio e monográfico na zona vella de Compostela. O mago Kiko  Pastur é o impulsor e director deste museo no que é posible observar aparellos e pezas históricas, ver reproducións dalgúns dos números dos grandes magos da historia e sorprenderse con ilusións ópticas que desafiarán a nosa mente. Máis información aquí.

Monte Pedroso

O Monte Pedroso é o miradoiro por excelencia de Santiago de Compostela. Está a tan só tres quilómetros do centro urbano e pódese subir andando a través dunha ruta que atravesa unha contorna de gran valor natural. O ideal é subir á tardiña dun día claro cando as últimas raiolas iluminan a fachada da catedral. Se se dispón de vehículo propio tamén é boa opción ir de noite para ver todas as luces da cidade. Na aba do monte atópase A Granxa do Xesto, unha zona recreativa cun parque infantil, un lago e un establecemento hostaleiro. Neste punto arrinca unha senda peonil para subir ata o miradoiro. Pódese chegar facilmente ata A Granxa do Xesto andando ou en coche a través da rúa Casas Novas. A liña 9 do transporte urbano chega ata Santo Ignacio do Monte, a medio quilómetro de distancia.

Cidade da Cultura

No alto do monte Gaiás está situada a Cidade da Cultura, un complexo formado por catro edificios (e un quinto en construción, o Edificio Fontán) que constitúe un dos mellores exemplos da arquitectura contemporánea. Deseñado polo arquitecto estadounidense Peter Eisenman, a planta das edificacións simula a forma dunha vieira pola que discorren as rúas do centro histórico compostelán. A Cidade da Cultura ofrece ao visitante unha gran oferta de actividades: desde o lecer á natureza, pasando pola gastronomía, a cultura ou a arte. Neste último ámbito destaca o Museo Centro Gaiás, que tras a súa fachada de 43 metros de altura alberga exposicións de todo tipo. Próximo a el atópanse as Torres  Hejduk, cuxas luces nocturnas son unha icona de Santiago ao poder ser divisadas desde moitos puntos da cidade. Actualmente acollen a intervención artística Paisaxes incultas, de Cristina García Fontán, que as converte nun bosque galego en miniatura.

Os arredores da Cidade da Cultura ofrecen espazos verdes, ideais para facer deporte ou simplemente dar un paseo relaxado. O Bosque de Galicia, coas súas 34 hectáreas de extensión e o seu 5 km de sendeiros peonís e ciclistas, é unha das mellores opcións para subir ao Gaiás. O Parque do Lago conta con case 5.000 m2 de extensión e está equipado con bancos e elementos deportivos para un circuíto de running. Destaca, como o seu propio nome indica, a zona do lago pola súa beleza coa silueta dos edificios de Eisenman ao fondo.

Pódese acceder á Cidade da Cultura ben a pé ou en bicicleta (a través do Bosque de Galicia ou da avenida de Manuel Fraga); en coche (pola avenida de Manuel Fraga ou pola saída directa da AP-9); e en bus urbano, a través da liña 9. Aínda que o recinto abre todos os días, o museo pecha os luns.

Centro Galego de Arte Contemporánea e parque de Bonaval

Situado xunto ao Museo do Pobo Galego (na rúa Valle Inclán), o Centro Galego de Arte Contemporánea (CGAC) é outro dos símbolos da modernidade e do amor de Compostela pola arte e a cultura. Deseñado polo arquitecto Álvaro Siza en 1988, o edificio conxuga a modernidade das súas liñas, formas e volumes coa tradición galega, representada a través do granito que o compón, a pedra máis común en Galicia.

Neste momento son tres as exposicións que se poden visitar no CGAC: Crebas, de  Francesc Torres; Caosmos, de Antón Patiño; e Wonder Women, unha recompilación das obras de varias artistas. Ademais, existe unha colección permanente con máis de 1.200 pezas adquiridas co orzamento anual do museo ou ben grazas a doazóns de particulares, institucións ou artistas. Está aberto de martes a domingo de 11:00 a 20:00 horas.

O propio edificio do CGAC está construído de forma que sirva de acceso ao parque de Bonaval. Este espazo verde é un dos máis coidados de Compostela. Ofrece unhas vistas sorprendentes dos tellados da cidade, e desde a parte máis alta destaca a maxestosidade das torres da catedral. Conta cun antigo cemiterio e moitas fontes, o que provoca que se escoite a auga correr en todo momento. É ideal para facer un  picnic ou para tombarse á sombra dun das súas árbores para ler un libro ou escoitar música. É facilmente accesible a pé desde calquera punto da cidade, pero tamén hai un aparcadoiro nas proximidades.

Galicia, un relato no mundo

Ata o 12 de abril. Santiago de Compostela

Xoias da arte universal como a Biblia Kennicott, a escultura “A Santa” de Asorey e os  Códices Calixtinos da Biblioteca Vaticana e da Universidade de Salamanca son algunhas das pezas que logrou reunir na Cidade da Cultura a exposición “Galicia, un relato no mundo”.

Máis información aquí

Cineuropa

Toda a semana. Santiago de Compostela

As proxeccións do festival Cineuropa proseguirán durante toda a semana en diversos puntos de Santiago de Compostela como o Teatro Principal, o Salón Teatro, Cinema  Numax, os Multicines Compostela e o Museo das Peregrinacións.

Máis información aquí

Santa Cecilia

22, 23 e 24 de novembro. Varios municipios

A música é unha arte que merece ser gozado todos os días, pero máis aínda chegado o 22 de novembro, día dedicado a Santa Cecilia, a súa patroa. Son moitos os municipios e entidades que programaron concertos para hoxe, o sábado ou o domingo. Seguro que tes algún preto.

Festivais musicais

22 e 23 de novembro. Vigo e A Coruña.

Quen dixo que os festivais musicais son só para o verán? Esta fin de semana serán varias as citas que terán ao seu alcance quen queira gozar destes formatos. En Vigo celebrarase o Super Bock Under Fest, que reunirá o venres 22 e o sábado 23 a máis dunha vintena de bandas. Na Coruña, o sábado 23 terá lugar a primeira edición do  REC Fest, con grupos como Ska- P, Bastards on Parade e Dakidarría.

Xornadas micolóxicas.

23 e 24 de novembro. Varios municipios

O outono e a chuvia deixan nos nosos montes unha prezada colección de setas. Se es un apaixonado da micoloxía ou queres ter unha primeira toma de contacto con ese mundo poderás facelo esta fin de semana participando nas xornadas organizadas en numerosos puntos de Galicia. Consulta as axendas municipais.