Froxán, Seceda ou Vilamor son algúns dos mellores exemplos.

Cando a montaña marca o xeito de construir

No Courel, construir significaba adaptarse ao relevo, ao clima e aos recursos da contorna.

As aldeas medran seguindo as formas do terreo, con casas agrupadas e pequenas rúas que soben e baixan entre as montañas. A lousa, abundante na zona, converteuse nun dos elementos fundamentais da arquitectura tradicional, presente nos muros e, sobre todo, nos tellados.

Froxán: unha aldea que conserva a súa esencia

Se hai unha aldea que permite entender esta relación entre arquitectura e paisaxe, esa é Froxán.

Situada no concello de Folgoso do Courel, conserva casas e construcións tradicionais agrupadas arredor de estreitas rúas empedradas que se adaptan ao terreo. A aldea está declarada Ben de Interese Cultural pola súa importancia etnográfica.

Ao seu redor aparecen soutos centenarios, parcelas de cultivo e prados. Aquí, a natureza non é un escenario separado da aldea: forma parte da súa propia historia.

Seceda e Vilamor: dúas formas de descubrir O Courel

Seceda conserva tamén a esencia da arquitectura tradicional courelá, baseada na pedra, a madeira e a lousa. Rodeada de vexetación e soutos de castiñeiros, percorrer as súas rúas permite comprender como as casas se integraban no territorio e como cada elemento respondía ás necesidades da comunidade.

En Vilamor, as casas de cachotaría de lousa, os tellados do mesmo material e as balconadas de madeira volven mostrar esa adaptación á montaña. Ademais, os camiños da contorna permiten achegarse á fervenza de Vilamor, ao río Lor e ás paisaxes que rodean a aldea.

Un patrimonio feito de pequenas cousas

A arquitectura tradicional do Courel non se limita ás casas. Ao longo da paisaxe aparecen sequeiros, alvarizas, fornos, hórreos e outras construcións vinculadas ao traballo agrícola e gandeiro.

Son pequenas pegadas dunha forma de vida na que a montaña marcaba os ritmos do día a día e boa parte do necesario se obtiña do propio territorio.

Unha Galicia que aínda podemos percorrer

Quizais o máis especial do Courel sexa que esta arquitectura non vive separada da paisaxe. As casas seguen a formar parte das aldeas, os soutos rodean os camiños e as montañas continúan sendo o gran escenario natural deste territorio.

Percorrer Froxán, Seceda ou Vilamor é achegarse a unha forma de vida que soubo adaptarse durante xeracións a un dos territorios máis singulares de Galicia.

Se buscas unha Galicia tranquila, de camiños estreitos, bosques, pedra e lousa, O Courel agárdate.

Anímaste a descubrir esta Galicia que parece doutro tempo?

Das Rías Baixas ás montañas de Lugo e ás paisaxes da Ribeira Sacra, propoñémosche descubrir cinco vilas de Galicia cun encanto especial. Lugares para percorrer sen présa, gozar das súas paisaxes e descubrir algunhas das mellores mostras da identidade galega.

Combarro: unha vila de pedra fronte ao mar

En plena ría de Pontevedra, Combarro conserva un dos conxuntos de arquitectura mariñeira máis singulares de Galicia. As súas rúas empedradas, casas tradicionais, cruceiros e soportais descenden cara ao mar, mentres máis de trinta hórreos de pedra se aliñan xunto á costa.

Un paseo desde a praza de San Roque ata a praia de Padrón permite descubrir esta paisaxe de pedra e mar, ademais de coñecer como estes hórreos estaban vinculados á vida cotiá e ao traballo das familias mariñeiras. Un recuncho das Rías Baixas que parece detido no tempo.

O Cebreiro: unha vila entre montañas e lendas

Nas montañas de Lugo, O Cebreiro recibe o visitante coas súas construcións tradicionais e a súa paisaxe de montaña. As súas pallozas, antigas vivendas de orixe prerromana adaptadas ás condicións climáticas da zona, forman xunto co santuario de Santa María a Real un dos conxuntos máis característicos do Camiño de Santiago.

Ademais do seu patrimonio, O Cebreiro ofrece unha experiencia ligada ao Camiño Francés. Chegar ata este pequeno núcleo, especialmente cando a néboa envolve as montañas, permite descubrir unha desas paisaxes galegas nas que a tradición e a natureza parecen formar parte dunha mesma historia.

Redes: unha pequena vila mariñeira con aire cubano

Á beira da ría de Ares, Redes conserva o encanto dunha pequena vila mariñeira, con casas de cores, rúas tranquilas e unha estreita relación co mar. A súa arquitectura reflicte tamén a pegada da emigración galega a América, especialmente a Cuba, visible nalgunhas das súas construcións.

Pasear por Redes é descubrir un recuncho onde a paisaxe da ría se mestura coa arquitectura tradicional e as antigas formas de vida vinculadas á pesca. Un lugar pequeno e tranquilo, perfecto para gozar de Galicia sen présa.

Allariz: historia ás beiras do Arnoia

Á beira do río Arnoia, Allariz combina patrimonio, natureza e tradición. O seu casco histórico, con rúas empedradas e edificios de pedra coidadosamente rehabilitados, invita a pasear e descubrir lugares como o convento de Santa Clara ou os espazos do Parque Etnográfico do río Arnoia.

O paseo xunto ao río completa a visita e permite gozar doutra das características desta vila ourensá: a estreita relación entre o patrimonio e a paisaxe. Allariz é, así, un destino para camiñar, descubrir a súa historia e gozar dun contorno especialmente coidado.

Castro Caldelas: unha vila medieval arredor dun castelo

En plena Ribeira Sacra, Castro Caldelas conserva un casco histórico de trazado medieval, con rúas empedradas, casas de pedra, galerías e escudos. Na parte alta atópase a fortaleza dos Condes de Lemos, un dos grandes símbolos da localidade e unha visita imprescindible.

Desde a vila, a paisaxe da Ribeira Sacra completa a experiencia, co río Sil, os viñedos en socalcos e outros atractivos patrimoniais nas súas proximidades. Un lugar onde a historia parece seguir presente en cada rúa e onde a paisaxe forma parte inseparable da visita.

Cinco vilas, cinco formas de descubrir Galicia

Combarro, O Cebreiro, Redes, Allariz e Castro Caldelas mostran cinco caras diferentes de Galicia: a mariñeira, a montañosa, a indiana, a fluvial e a medieval. Cinco lugares para deixarse levar polas súas rúas, descubrir as súas historias e gozar deses pequenos recunchos que fan de Galicia un destino cheo de escenarios que parecen sacados dun conto.

A empresa Empatía Comunicación S.L. con domicilio en Polígono Río do Pozo Parcela 1-3, Local 29 15573 de Narón, A Coruña  e  C.I.F. B70165024  (en diante, “Empatía Comunicación”) contratada pola Axencia Turismo de Galicia  con domicilio en Estrada Santiago-Noia, km.3 15897 de Santiago de Compostela e C.I.F Q-1500394-J, organiza con fins promocionais o sorteo (en diante, “a promoción”) de ámbito nacional, a desenvolver a través de Internet, exclusivo para usuarios maiores de idade de acordo con o disposto no apartado de condicións para participar. 

2.- DATA DE INICIO E DATA DE FINALIZACIÓN 

A promoción iniciarase ás 12:00 horas do día 21 de setembro e finalizará o día 5 de novembro ás 12:00 horas. 

Convocaránse 7 premios en 7 concursos, que se anunciarán os días 21 e 28 de setembro, 5, 12, 19, 26 de outubro e 2 de novembro. 

Cada convocatoria de concurso estará activa 48 horas desde o momento da súa publicación. 

3.- REQUISITOS DE PARTICIPACIÓN E MECÁNICA DA PROMOCIÓN 

Os requisitos de participación serán os seguintes: 

• Poderán participar, de forma gratuíta e voluntaria, aquelas persoas que residan en España e sexan maiores de 18 anos, previamente rexistradas na rede social de Facebook e lnstagram cun único usuario real e que sigan á Axencia Turismo de Galicia. 

• A mecánica da Promoción en Facebook e lnstagram consiste en responder correctamente ás preguntas expostas. 

• Non poderán participar nesta promoción os traballadores da Axencia Turismo de Galicia nin os seus familiares de primeiro grao, así como os provedores relacionados con esta entidade pública. 

• Repartiranse un total de 7 premios non acumulativos. Cada gañador só poderá ser premiado unha vez (se resulta gañador nalgún dos 7 concursos non poderá volver ser elixido gañador). 

4.- CONDICIÓNS DA PROMOCIÓN E PREMIOS 

Elixirase aleatoriamente 1 gañador dunha Fin de Semana Outono Gastronómico para dúas persoas (noites de venres e sábado, con almorzos incluídos) e dous menús por persoa a degustar durante esta fin de semana, a elixir entre os establecementos de Turismo Rural adheridos ao Outono Gastronómico que inclúan a modalidade Fin de semana Outono Gastronómico: A fin de establecer un réxime de igualdade entre todos os participantes na promoción, no sorteo só se permitirá un candidato por perfil, aínda que se contestase nos comentarios en múltiples ocasións á pregunta formulada e se etiquetaran persoas diferentes en cada resposta. 

O establecemento poderá ser escollido segundo a súa dispoñibilidade nas datas solicitadas. Co gallo de facilitar a implicación do maior número de aloxamentos de Turismo rural, non se poderán repetir estancias en establecementos que foran elexidos anteriormente por outro gañador (informarase oportunamente no caso de que se dé esta circunstancia). 

Do mesmo xeito elixiranse 3 suplentes para o caso de que o gañador non responda no prazo de 24 horas a contar desde a data e hora da publicación do resultado do concurso e do envío da mensaxe no que se lle comunica que resultou gañador/a. 

Poderase elixir calquera fin de semana entre o 18 de setembro e o 20 de decembro. 

5.- MECÁNICA DA PROMOCIÓN 

A selección dos gañadores realizaráse ás 48 horas do lanzamento do sorteo e de xeito aleatorio, a través da plataforma https:// commentpicker.com/, entre os participantes que: 

• Respondan correctamente as preguntas expostas. 

• Sexan seguidores da conta de Facebook e lnstagram da Axencia Turismo de Galicia. 

• Den “like” á publicación do concurso. 

• Etiqueten a unha persoa coa que gozar do premio. 

O concurso realizarase no Facebook e lnstagram da Axencia Turismo de Galicia, resultando cada semana 1 gañador da devandita rede social 

• Semana 1: sorteo 1 premio o 21 de setembro entre os seguidores da Axencia Turismo de Galicia en Facebook e lnstagram 

• Semana 2: sorteo 1 premio o 28 de setembro entre os seguidores da Axencia Turismo de Galicia en Facebook 

• Semana 3: sorteo 1 premio o 5 de outubro entre os seguidores da Axencia Turismo de Galicia en Facebook e lnstagram 

• Semana 4: sorteo 1 premio o 12 de outubro entre os seguidores da Axencia Turismo de Galicia en Facebook e lnstagram 

• Semana 5: sorteo 1 premio o 19 de outubro entre os seguidores da Axencia Turismo de Galicia en Facebook e lnstagram 

• Semana 6: sorteo 1 premio o 26 de outubro entre os seguidores da Axencia Turismo de Galicia en Facebook e lnstagram 

• Semana 7: sorteo 1 premio o 2 de novembro entre os seguidores da Axencia Turismo de Galicia en Facebook e lnstagram 

Do mesmo xeito elixiranse 3 suplentes para o caso no que algún dos gañadores non responda no prazo de 24 horas -a contar dende a data e hora da publicación do resultado do concurso na conta de Axencia Turismo de Galicia e do envío da mensaxe no que se lle comunica que resultou gañador/a-. A Axencia Turismo de Galicia poderá publicar na súa conta de Facebook e/ou lnstagram os gañadores de cada concurso e enviará unha mensaxe directa informándolles do premio e solicitando a súa identificación. Os gañadores terán que comunicar a aceptación do premio nas 24 horas inmediatamente posteriores á publicación dos gañadores e envío da mensaxe por parte da Axencia Turismo de Galicia, mediante un correo electrónico a través da conta outonogastronomico@gmail.com coa súa identidade (DNI, nome e dous apelidos) e un número de teléfono e correo electrónico de contacto. 

O gañador deberá publicar nas súas redes sociais como mínimo unha publicación gozando do seu premio Fin de Semana Outono Gastronómico. 

O gañador autoriza a que o seu nome de Facebook e lnstagram sexa publicado nas redes sociais da Axencia Turismo de Galicia. 

Do mesmo modo, informaráse aos demáis elixidos da súa condición de suplentes, solicitando faciliten un número telefónico de contacto directo ao mesmo enderezo electrónico para a súa posterior localización e requerimento de documentación, se é o caso. 

Se o gañador non reclama o premio antes de 24 horas a contar desde a data e hora da publicación do resultado do sorteo, entenderase que o rexeita, pasando o premio ao primeiro suplente elixido, o cal será contactado telefónicamente. Se este tampouco remite a documentación solicitada, o premio pasará ao segundo suplente, e despois ao terceiro, quedando deserto se ningún deles responde. 

Estes datos serán usados exclusivamente para a comunicación do premio ou para aclarar calquera continxencia unha vez aceptado. 

6.-ACEPTACIÓN E MODIFICACIÓN DAS BASES 

A mera participación nesta campaña comercial supón a aceptación íntegra destas bases legais. A organización resérvase o dereito de efectuar, en calquera momento, calquera modificación, supresión e/ou adición ás presentes bases legais, na medida que non prexudique ou menoscabe os dereitos dos usuarios. 

Empatía Comunicación resérvase o dereito de suspender o concurso, por causa xustificada e nos supostos previstos nas presentes bases. 

Empatía Comunicación resérvase o dereito de efectuar cambias que redunden no bo fin do concurso cando concorra causa xusta ou motivos de forza maior que impidan levalo a termo na forma en que recollen as presentes bases. 

Empatía Comunicación resérvase o dereito de aprazar ou ampliar o período do concurso, así como a facultade de interpretar as presentes bases legais. Así mesmo, a empresa organizadora quedará exenta de toda responsabilidade se concorre algún dos casos sinalados, así como de calquera responsabilidade polos danos e prexuízos que puidesen ocasionarse durante o gozo do premio. 

Empatía Comunicación queda eximida de calquera responsabilidade no suposto de existir algún erro nos datos facilitados polos propios agraciados que impedise a súa identificación. 

Empatía Comunicación resérvase o dereito de emprender accións xudiciais contra aquelas persoas que realicen calquera tipo de acto susceptible de ser considerado manipulación ou falsificación do concurso. 

7.- DESCUALIFICACIÓNS E PENALIZACIÓNS 

Se se evidenciase que calquera dos participantes non cumpre cos requisitos esixidos nas bases, ou os datos proporcionados para participar non fosen válidos, a súa participación considerarase nula e quedarán automaticamente excluídos da Promoción perdendo todo dereito sobre os premias outorgados en virtude desta Promoción. 

Empatía Comunicación resérvase o dereito de excluír automática e inmediatamente da mesma a calquera  participante  que transgreda  as normas da boa fe, observe unha conduta inadecuada, empregue medias fraudulentos ou incumpra estas bases. 

8.- PUBLICACIÓN DE COMENTARIOS OU OPINIÓNS 

Non se permitirán comentarias ou opinións cuxo contido se considere inapropiado, que sexan ofensivos, inxuriosos ou discriminatorios ou que puidesen vulnerar dereitos de terceiros. Tampouco se permitirán comentarias contra un particular que vulneren os principias de dereito á honra, á intimidade persoal e familiar e á propia imaxe. 

Non nos responsabilizaremos dos danos ocasionados polos comentarias que fagan os participantes na promoción, e que en calquera momento puidesen ferir a sensibilidade doutros participantes. 

9.- EXONERACIÓN DE RESPONSABILIDADE 

A título enunciativo, pero non limitativo, Empatía Comunicación non se responsabiliza das posibles perdas, roubos, atrasos ou calquera outra circunstancia imputable a terceiros que poidan afectar ao desenvolvemento da presente promoción, así como tampouco do uso que faga  o  participante respecto do premio que obteña desta promoción. 

Empatía Comunicación non asume a responsabilidade en casos de forza maior ou caso fortuíto que puidesen impedir a realización da promoción ou o goce total ou parcial do premio. 

10.- FACEBOOK 

A promoción non está patrocinada, avalada, administrada nin asociada de ningún xeito a Facebook, polo que os participantes liberan a esta de toda responsabilidade polos eventuais danos que se deriven da mesma. 

11.- INSTAGRAM 

lnstagram non patrocina, avala nin administra de modo algún esta promoción, nin está asociado a ela. O usuario desvincúlase totalmente de lnstagram, e é consciente de que está a proporcionar a súa información a Empatía Comunicación e non a lnstagram. 

12.- PROTECCIÓN DE DATOS PERSOAIS 

De conformidade co establecido no Reglamento Xeral de Protección de Datos (UE 2015/679) e da Lei Orgánica 3/2018, do 5 de decembro, de Protección de Datos Persoales e Garantía dos Dereitos Dixitais, informamos que a entidade responsable do tratamento é Empatía Comunicación con domicilio en Polígono Río do Pozo Parcela 1-3, Local 29 15573 de Narón, A Coruña e C.I.F. B70165024 

Cada participante, coa aceptación destas bases legais e participación no sorteo, consente que os seus datos persoais podan ser utilizados para a xestión do sorteo e para remitirlle newsletters e comunicacións  comerciais  e  de  promoción relacionadas cos nosos servizos por carta, teléfono, correo electrónico, SMS/MMS, ou por outros medias de comunicación electrónica. 

lnformámoslle que pode exercer os seus dereitos de acceso, rectificación, cancelación e oposición mediante o envío dun correo electrónico a info@empatiacomunicacion.com ou ben mediante carta dirixida á seguinte direción: Polígono Río do Pozo Parcela 1-3, Local 29 15573 de Narón, A Coruña, achegando en ambos os casos copia do DNI. 

13.- FISCALIDADE 

A celebración do previsto sorteo, así como a concesión do premio quedan suxeitos á normativa fiscal vixente. 

14.- LEXISLACIÓN APLICABLE E XURISDICIÓN 

Estas bases legais rexeranse de conformidade coa lei española. Serán competentes para resolver calquera reclamación ou controversia que puidese exporse en relación coa validez, interpretación ou cumprimento destas bases os Xulgados e Tribunais da cidade de Santiago de Compostela. 

Do 18 de setembro ao 20 de decembro de 2026, Turismo de Galicia celebra a 20.ª edición desta proposta, que combina gastronomía, turismo rural e uns días para desconectar. En total, participan 71 casas de turismo rural repartidas polas catro provincias.

Aínda non sabes como funciona? Contámoscho.

Unha mesa con sabor a Galicia

A proposta máis sinxela é o Menú Outono Gastronómico, que por 40 € por persoa inclúe entrante, primeiro prato, segundo prato, sobremesa e viño con Denominación de Orixe galega.

Cada establecemento ofrece a súa propia proposta gastronómica, así que podemos aproveitar para descubrir diferentes sabores e produtos de Galicia mentres coñecemos novos recunchos do noso territorio.

E se despois de comer non nos apetece coller o coche de volta, temos outras opcións.

Unha escapada gastronómica

O Paquete Outono Gastronómico combina o menú con unha noite de aloxamento —venres ou sábado— e almorzo.

O prezo é de 115 € para unha persoa en habitación individual ou 175 € para dúas persoas en habitación dobre.

Para quen prefira gozar de toda a fin de semana está a opción de Fin de Semana Outono Gastronómico, que inclúe dous menús, dous almorzos por persoa e dúas noites de aloxamento, as do venres e o sábado.

O prezo é de 175 € para unha persoa en habitación individual e 275 € para dúas persoas en habitación dobre.

Tamén en familia

O Outono Gastronómico tamén ten propostas para familias con menores de ata 14 anos. A opción de Fin de Semana Familiar inclúe menús para adultos e nenos, dúas noites de aloxamento e almorzos.

Hai dúas modalidades:

• 2 adultos + 1 menor: 325 €.
• 2 adultos + 2 menores: 375 €.

Unha boa oportunidade para descubrir en familia as paisaxes, vilas e actividades do rural galego.

Outono Plus: aínda máis experiencias

E para quen queira aproveitar aínda máis a escapada, algúns establecementos ofrecen Outono Plus, unha modalidade que permite complementar a estadía con actividades relacionadas coa natureza, a cultura, o deporte ou o enoturismo.

A oferta depende de cada establecemento, así que convén consultar as propostas dispoñibles á hora de facer a reserva.

20 anos, moitos outonos por gozar

Pasaron xa dúas décadas desde a primeira edición e o Outono Gastronómico segue propoñendo unha combinación que nunca pasa de moda: comer ben, descansar e descubrir Galicia.

Ata o 20 de decembro temos tempo para escoller a nosa casa rural, reservar o noso menú e preparar unha escapada.

Porque o outono pode gozarse de moitas maneiras. E unha das mellores é facelo arredor dunha mesa, en boa compañía e nalgún dos recunchos rurais de Galicia.

Apúntaste a celebrar os 20 anos do Outono Gastronómico?

Consulta aquí os establecementos participantes e todas as propostas do 20.º Outono Gastronómico.

Traémosche cinco propostas para gozar de Galicia en setembro e descubrir que o final do verán tamén é unha magnífica época para viaxar.

1. Percorre a Ribeira Sacra entre viñedos e mosteiros

Setembro ofrece unha ocasión especialmente atractiva para descubrir a Ribeira Sacra, cando as súas paisaxes de viñedos comezan a transformarse coa chegada da vendima.

Os canóns do Sil e do Miño, os bosques, os miradoiros e os antigos mosteiros conforman unha paisaxe única que invita a percorrer a zona con calma. Podes navegar polos canóns do Sil, visitar mosteiros como Santo Estevo de Ribas de Sil ou Santa Cristina de Ribas de Sil e descubrir algúns das vilas e miradoiros que se asoman aos ríos.

A combinación de natureza, patrimonio e paisaxe vitivinícola converte a Ribeira Sacra nunha das escapadas imprescindibles de Galicia en setembro.

2. Sube a un dos Trens Turísticos de Galicia

Viaxar en tren tamén pode ser unha forma diferente de descubrir Galicia. A tempada 2026 dos Trens Turísticos de Galicia inclúe propostas que permiten coñecer algunhas das paisaxes, espazos patrimoniais e recursos turísticos máis singulares da comunidade.

Durante setembro podes gozar, entre outras opcións, das Rutas dos Faros e das rutas do viño pola Ribeira Sacra do Sil e do Miño, ademais doutras experiencias vinculadas ao patrimonio e á cultura galega.

Unha maneira cómoda e orixinal de viaxar, deixando que a paisaxe pase a ser unha parte esencial da experiencia.

3. Reláxate nas augas termais de Galicia

Setembro tamén é un bo momento para facer unha pausa e gozar do termalismo galego.

Galicia conta cunha ampla oferta termal repartida polas súas catro provincias. Na Coruña, podes gozar de espazos como o Balneario de Carballo ou o Hotel Balneario de Compostela, en Brión; en Lugo, achegarte ás Termas Romanas de Lugo, Guitiriz ou Augas Santas, en Pantón; en Ourense, descubrir lugares como Arnoia, Laias, Lobios ou O Carballiño; e en Pontevedra, gozar das augas de Caldas de Reis, Cuntis, Mondariz ou Caldelas de Tui.

Un baño termal, un tratamento de benestar ou unhas horas de descanso poden converterse no plan perfecto para desconectar despois do verán e gozar dunha escapada centrada no benestar.

4. Descubre as cidades galegas sen présas

Setembro invita tamén a volver ás cidades e percorrelas con máis calma. Santiago de Compostela, A Coruña, Lugo, Ourense, Pontevedra, Vigo e Ferrol ofrecen propostas moi diferentes para gozar dunha escapada urbana.

Podes pasear polo casco histórico de Santiago de Compostela, contemplar a Torre de Hércules na Coruña, percorrer a muralla romana de Lugo, descubrir o patrimonio termal de Ourense ou perderte polas prazas e rúas do centro histórico de Pontevedra.

Museos, exposicións, patrimonio, cultura e gastronomía completan unha oferta urbana que permite descubrir outra Galicia, máis cultural e contemporánea, cando remata o verán.

5. Achégate á Galicia do viño

Setembro marca o comezo dunha das épocas máis especiais do calendario vitivinícola galego: a vendima.

As cinco denominacións de orixe de Galicia ofrecen paisaxes e formas de entender o viño moi diferentes. Desde Rías Baixas, O Ribeiro e Ribeira Sacra ata Valdeorras e Monterrei, cada territorio conta con variedades autóctonas, tradicións e paisaxes propias.

Visitar unha adega, camiñar entre viñedos, coñecer como se desenvolve a vendima ou participar nunha cata son algunhas das experiencias que permiten achegarse á cultura do viño e comprender a súa estreita relación co territorio.

Setembro é, polo tanto, un momento especialmente interesante para descubrir Galicia a través dos seus viños e das persoas que os elaboran.

Despois do verán, Galicia cambia de ritmo, pero non de posibilidades. Cinco plans para seguir gozando de Galicia en setembro e descubrir unha nova forma de viaxar polo destino.

Descubrir a viticultura heroica da Ribeira Sacra é achegarse a un dos sinais de identidade deste destino e comprender por que o viño forma parte inseparable da súa paisaxe e da súa cultura.

Que é a viticultura heroica?

A viticultura heroica é aquela que se desenvolve en condicións especialmente difíciles debido ás características do terreo.

Na Ribeira Sacra, as viñas distribúense en terrazas ou bancais para salvar as fortes pendentes das ladeiras, que poden chegar ata o 100 %. Esta configuración do terreo dificulta a mecanización e fai que boa parte dos traballos no viñedo teñan que realizarse de forma manual.

Aquí, as persoas son as principais ferramentas de traballo. Cada tarefa require esforzo, dedicación e un profundo coñecemento do terreo. Mesmo desprazarse entre as cepas pode converterse en todo un exercicio de equilibrio.

E é precisamente esta dificultade a que converte a viticultura da Ribeira Sacra nunha experiencia tan singular.

Territorio de Denominación de Orixe

A Denominación de Orixe Ribeira Sacra constituíuse en 1996 para protexer a orixe, garantir a calidade e promocionar os seus viños. Desde entón, a viticultura desempeñou un papel fundamental na recuperación de viñedos e paisaxes, convertendo o viño nun dos grandes motores económicos e turísticos da Ribeira Sacra.

O territorio vitivinícola organízase en cinco subzonas:

• Amandi
• Chantada
• Quiroga-Bibei
• Ribeiras do Miño
• Ribeiras do Sil

Cada unha forma parte dun mesmo territorio vitivinícola no que o cultivo da vide está profundamente condicionado pola paisaxe.

Ademais, desde 2011 o CERVIM conta cun selo específico para identificar este tipo de viticultura e a Ribeira Sacra é unha das poucas Denominacións de Orixe españolas que pode utilizalo.

Descubre a viticultura heroica durante a túa visita

Se estás pensando en viaxar á Ribeira Sacra, non te quedes unicamente coa imaxe das súas espectaculares paisaxes.

Detrás de cada ladeira de viñedos existe unha historia de esforzo e adaptación. Detrás de cada bancal hai unha forma de traballar a terra que se converteu nun dos grandes sinais de identidade do territorio.

Achégate ás súas paisaxes vitivinícolas, percorre as súas cinco subzonas e déixate sorprender por unha forma de cultivar a vide que desafía o vertixe.

Anímaste a descubrir a Ribeira Sacra?

A mellor maneira de entender a viticultura heroica é vivila de preto. Embárcate nesta ruta de 3 días polas terras da D.O. Ribeira Sacra, percorre os seus viñedos e déixate sorprender por un territorio onde o viño e a paisaxe se unen para ofrecer unha experiencia única.

A presenza xudía en Galicia está documentada desde o século XI e estendeuse por diferentes localidades ata 1492. Houbo comunidades en lugares como Ourense, Allariz, Monterrei ou Pontevedra, pero Monforte de Lemos, Ribadavia e Tuison as tres cidades galegas que actualmente forman parte da Rede de Xuderías de España – Camiños de Sefarad, unha rede que recupera e pon en valor este patrimonio histórico, artístico e cultural.

Monforte de Lemos: entre fortalezas e rúas medievais

No corazón da Ribeira Sacra, Monforte de Lemos conserva a memoria dunha comunidade xudía que foi medrando especialmente a partir do século XII.

Comeza a visita no monte de San Vicente, onde atoparás o mosteiro de San Vicente do Pino, a Torre da Homenaxe e o Pazo dos Condes de Lemos. Na Torre da Homenaxe aínda se poden descubrir estrelas de David gravadas nalgúns perpiaños.

Desde aquí, o paseo descende cara á Porta Nova e continúa pola rúa Falagueira, antiga vía principal da xudería. O itinerario permite descubrir antigos espazos vinculados ás vivendas xudías e aos restos dunha sinagoga, antes de continuar por rúas como a Pescadería, a Zapatería ou Abelardo Baanante.

Ribadavia: o corazón xudeu do Ribeiro

En Ribadavia, a memoria sefardí forma parte da identidade da vila. A súa comunidade xudía tivo unha importante presenza desde os séculos XII e XIII, moi vinculada ao comercio e ao viño do Ribeiro.

Pasea desde a praza Maior polo antigo barrio xudeu, descubre as súas rúas medievais e achégate á praza da Madalena e á Porta Nova de Abaixo.

Para coñecer mellor esta historia, visita o Museo Sefardí de Galicia, situado no Pazo dos Condes de Ribadavia. E se viaxas durante a Festa da Istoria, poderás vivir unha experiencia moi especial: a recreación dunha voda xudía medieval.

Tui: a pegada xudía xunto ao Miño

Xunto á fronteira portuguesa, Tui conserva numerosos testemuños do seu pasado xudeu.

Un dos máis sorprendentes atópase na catedral de Santa María, cuxo claustro gótico conserva unha menorá. Desde alí podes percorrer as antigas rúas da xudería e descubrir lugares relacionados coa vida desta comunidade.

Entre eles destacan a Casa de Salomón, do século XV, a Torre do Xudeu e a Porta Pía ou Porta da Pila. A visita pode completarse no Museo Diocesano da catedral, onde se conservan cinco sambenitos da Inquisición.

Tres destinos e unha historia común para descubrir unha Galicia diferente, camiñando polos seus cascos históricos e viaxando ao pasado.

Anímaste a percorrer as xuderías de Galicia e descubrir a pegada sefardí que permanece entre as súas rúas? Descubre as rutas completas aquí.

O pasado 12 de agosto, Galicia viviu un deses momentos. A eclipse solar converteu o ceo en protagonista e milleiros de persoas reuníronse para contemplar como a Lúa ocultaba o Sol nun espectáculo extraordinario.

Pero a eclipse xa pasou. E quizais esa sexa precisamente unha boa razón para seguir mirando o ceo.

Porque Galicia ten moito máis que ofrecer a quen sente curiosidade pola astronomía. Nove destinos galegos contan coa certificación de Destino Turístico Starlight, un recoñecemento que distingue as súas excelentes condicións para contemplar as estrelas e o seu compromiso coa protección dos ceos nocturnos.

Anímaste a descubrilos?

Cando o ceo se converte en destino

O astroturismo invita a viaxar dunha maneira diferente: a deterse, afastarse das luces das cidades e deixar que os ollos se acostumen pouco a pouco á escuridade.

En Galicia, esta experiencia pode gozarse xunto ao mar, en illas atlánticas, entre montañas, nas paisaxes da Ribeira Sacra ou en territorios rurais onde a noite conserva aínda unha das súas grandes riquezas: un ceo escuro e cheo de estrelas.

Destinos Turísticos Starlight en Galicia

A Fundación Starlight, vinculada ao Instituto de Astrofísica de Canarias, certifica aqueles espazos que destacan pola calidade dos seus ceos e polo seu compromiso coa protección fronte á contaminación lumínica. Son lugares onde a observación das estrelas forma parte do patrimonio natural, paisaxístico, cultural ou científico e convértese tamén nun atractivo turístico.

Galicia conta con nove Destinos Turísticos Starlight: nove lugares excepcionais desde os que descubrir e gozar do noso ceo nocturno.

1. Parque Nacional das Illas Atlánticas de Galicia

Mirar as estrelas desde unha illa ten algo especial. Nas Illas Atlánticas, o océano rodea a paisaxe e a distancia respecto dos grandes núcleos urbanos favorece unhas condicións privilexiadas para contemplar o ceo nocturno.

Cíes, Ons, Sálvora e Cortegada ofrecen así unha experiencia na que mar, natureza e firmamento se atopan baixo unha mesma noite.

2. A Costa da Morte

Na Costa da Morte, o ceo forma parte dunha paisaxe xa de seu espectacular.

Aquí, a experiencia pode comezar contemplando o Atlántico desde un faro ou un cantil e rematar baixo un ceo estrelado. O contraste entre a inmensidade do océano e a do firmamento converte a noite nunha nova maneira de percorrer este territorio.

3. Trevinca

Nas montañas de Ourense, Pena Trevinca alcanza os 2.127 metros e ofrece unhas condicións excepcionais para a observación astronómica.

A altitude, a baixa contaminación lumínica e a amplitude da paisaxe fan deste territorio un dos grandes referentes do astroturismo galego. Un lugar onde erguer a vista permite descubrir constelacións, planetas e a Vía Láctea en todo o seu esplendor.

4. Muras

Na Serra do Xistral, Muras invita a gozar dunha noite diferente.

A escasa contaminación lumínica converte as súas paisaxes nun escenario privilexiado para observar as estrelas e achegarse á astronomía. Unha proposta perfecta para quen busca combinar natureza, tranquilidade e contemplación do firmamento.

5. Lalín

A relación de Lalín coa astronomía ten, ademais, nome propio: Ramón María Aller, unha das grandes figuras da astronomía galega.

O territorio permite descubrir esta vinculación coa ciencia mentres se goza dun ceo especialmente apropiado para a observación. Desde os seus espazos naturais, Galicia contémplase baixo unha perspectiva diferente: a dun territorio que tamén forma parte do universo que nos rodea.

6. Reserva de Biosfera Mariñas Coruñesas

A Reserva da Biosfera Mariñas Coruñesas incorpora o ceo nocturno a unha experiencia de natureza e territorio.

Aquí, observar as estrelas pode formar parte dunha viaxe na que tamén teñen cabida a paisaxe, a gastronomía, o patrimonio e o ecoturismo. Porque protexer o ceo nocturno significa tamén conservar unha parte esencial do patrimonio natural.

7. Reserva da Biosfera dos Ancares Lucenses e montes de Navia, Cervantes e Becerreá

Montañas, vales e pequenas poboacións definen a paisaxe dos Ancares Lucenses, un territorio onde a escuridade nocturna permite gozar dun firmamento especialmente atractivo.

O destino ofrece unha oportunidade para descubrir a montaña lucense cando cae o sol e entender que a natureza tamén ten unha dimensión nocturna.

8. Chantada

No corazón da Ribeira Sacra, o ceo atopa no Monte Faro un magnífico punto de observación.

Aquí, a contemplación das estrelas súmase a unha paisaxe marcada polos canóns do Miño e do Sil, os viñedos, os mosteiros e os miradoiros. Unha experiencia que demostra que un destino pode cambiar por completo cando chega a noite.

9. Fornelos de Montes e Oia – Galicia Suroeste

O suroeste galego ofrece tamén espazos privilexiados para mirar o firmamento. O territorio que une Fornelos de Montes e Oia suma paisaxe de montaña, costa e unha reducida contaminación lumínica para crear un escenario especialmente atractivo para o astroturismo.

É outra forma de descubrir o sur de Galicia, seguindo o percorrido das estrelas sobre un territorio que se estende desde o interior ata o Atlántico.

Moito máis ca unha eclipse

A eclipse lembrounos algo que quizais esquecemos demasiado a miúdo: abonda con levantar a mirada para descubrir un espectáculo extraordinario sobre as nosas cabezas.

Pero non cómpre esperar a que aconteza un gran fenómeno astronómico. Cada noite despexada é unha nova oportunidade para contemplar as estrelas, recoñecer constelacións, seguir o percorrido da Lúa ou simplemente gozar da escuridade.

Os nove Destinos Turísticos Starlight de Galicia fan posible vivir esa experiencia nalgúns dos espazos máis singulares da nosa comunidade. Anímaste a descubrilos?

Desde as espectaculares Rías Altas ata as apracibles augas das Rías Baixas, propoñémosche unha viaxe por estas paisaxes únicas para descubrir que fai especial a cada unha delas e que experiencias de turismo mariñeiro non podes perder ao longo deste percorrido polas rías galegas.

Rías Altas

As Rías Altas esténdense desde a desembocadura do río Eo ata a ría da Coruña. Cantís, praias salvaxes, vilas mariñeiras e portos pesqueiros debuxan un territorio onde o Cantábrico e o Atlántico amosan toda a súa forza.

• Ría de Ribadeo: porta de entrada a Galicia, destaca pola Praia das Catedrais e pola súa tradición pesqueira.
• Ría de Foz: combina extensas praias coa Basílica de San Martiño de Mondoñedo.
• Ría de Viveiro: casco histórico medieval, praia de Area e o Souto da Retorta.
• Ría do Barqueiro: pequeno porto mariñeiro e proximidade á Estaca de Bares.
• Ría de Ortigueira: zonas húmidas, Serra da Capelada e cabo Ortegal.
• Ría de Cedeira: acceso a Santo André de Teixido e aos cantís da Vixía Herbeira.
• Ría de Ferrol: patrimonio naval, castelos defensivos e un dos arsenais históricos máis importantes de Europa.
• Rías de Ares e Betanzos: Pontedeume, Redes, Sada e o Parque Natural das Fragas do Eume.
• Ría da Coruña: presidida pola Torre de Hércules, Patrimonio Mundial da UNESCO, combina o atractivo urbano da cidade con amplos paseos marítimos, praias como Riazor e Orzán e unha intensa tradición vencellada ao porto e ao mar.

Costa da Morte

Máis alá da ría de Muros e Noia, a Costa da Morte desprega un litoral de gran beleza, onde amplos areais alternan con cantís e pequenos portos pesqueiros. É un territorio marcado polas lendas mariñeiras e por unha fonda tradición vencellada ao mar.

• Ría de Corme e Laxe: praias, bancos marisqueiros e o faro de Punta Roncudo.
• Ría de Camariñas: terra de percebeiros, do encaixe de palillos e do cabo Vilán.
• Ría de Corcubión: porta de acceso ao cabo Fisterra, con vilas mariñeiras e un valioso patrimonio histórico.
• Contorna de Muxía e Fisterra: o santuario da Virxe da Barca, o faro de Fisterra e algunhas das paisaxes máis emblemáticas do litoral atlántico.

Rías Baixas

As Rías Baixas son sinónimo de augas tranquilas, praias de area branca, bateas e unha intensa actividade mariñeira. Aquí o turismo mariñeiro permite descubrir a pesca, o marisqueo e a acuicultura.

• Ría de Muros e Noia: transición cara ás Rías Baixas, con dúas vilas mariñeiras de gran valor histórico e unha importante tradición marisqueira.
• Ría de Arousa: a maior de Galicia, famosa polas súas bateas de mexillón, a Illa de Arousa, Vilanova de Arousa, Cambados, O Grove, Ribeira e Vilagarcía de Arousa.
• Ría de Pontevedra: Pontevedra, Combarro, Bueu e Marín, onde o patrimonio e a tradición mariñeira van da man.
• Ría de Vigo: protexida polas illas Cíes, combina o maior porto pesqueiro de Galicia con vilas como Cangas, Moaña e Baiona.

Anímate e déixate levar por unha viaxe entre rías, portos, tradicións mariñeiras e a mellor gastronomía do mar. Galicia agárdate. Anímaste a descubrila?

Descubre a continuación todas as saídas e rutas previstas para gozar de Galicia sobre raís durante este mes de agosto.

Tren da Ruta das Mariñas

Saídas: 1 de agosto

Esta ruta convida a descubrir algunhas das paisaxes e enclaves máis emblemáticos do norte de Galicia. O percorrido comeza en Betanzos, onde unha visita guiada permite coñecer o patrimonio histórico e o encanto dunha das vilas medievais mellor conservadas de Galicia.

A viaxe continúa nas plantacións de té de Orballo, as únicas da Europa continental, onde se descobre o proceso de cultivo e elaboración desta singular produción. A xornada continúa en Pontedeume, unha vila cun destacado legado histórico e unha contorna natural privilexiada.

O itinerario inclúe ademais un paseo en barco pola ría de Ferrol, desde o que se contemplan as súas paisaxes costeiras, e remata cunha visita guiada polo barrio da Madalena, o centro histórico de Ferrol, declarado Conxunto Histórico-Artístico.

Tren da Ribeira Sacra (Río Sil)

Saídas: 1 e 22 de agosto

A Ribeira Sacra amosa nesta ruta algunhas das súas paisaxes máis espectaculares, onde natureza, patrimonio e tradición vitivinícola forman un conxunto único. A experiencia comeza cunha visita teatralizada á estación dos Peares, porta de entrada a este territorio singular.

A continuación, o percorrido leva ata a adega Regina Viarum, onde se coñecen os segredos da viticultura heroica e se goza dunha degustación de viños. En Monforte de Lemos hai tempo libre para xantar e percorrer a cidade.

Pola tarde, un catamarán navega polo encoro do río Sil entre impresionantes canóns e viñedos en socalcos. A xornada conclúe coa visita ao Mosteiro de San Pedro de Rocas, un dos cenobios máis antigos de Galicia, situado nunha contorna de grande valor histórico e natural.

Tren de Valdeorras – Ribeira Sacra

Saídas: 8 de agosto

Este itinerario propón un percorrido por dúas prestixiosas denominacións de orixe vitivinícolas: Ribeira Sacra e Valdeorras. A primeira experiencia do día é unha travesía en catamarán polo río Sil ata a contorna do Mosteiro de Santo Estevo, desde onde se contemplan as impresionantes paredes do Canón do Sil.

Tras o paseo fluvial, a ruta fai unha parada na Rúa, onde hai tempo libre para xantar antes de visitar a adega A Coroa. Alí descóbrense as características dos viños da Denominación de Orixe Valdeorras mediante unha visita guiada e unha degustación.

O percorrido remata na estación dos Peares, onde a Aula Ferroviaria permite coñecer a historia do ferrocarril e a singularidade deste importante nó ferroviario galego.

Tren dos Pazos e Xardíns Históricos de Galicia

Saídas: 8 de agosto

Esta proposta convida a percorrer algúns dos xardíns históricos máis destacados de Galicia, espazos onde natureza, arquitectura e patrimonio conviven en perfecta harmonía.

A ruta comeza no Pazo Quinteiro da Cruz, cuxos xardíns románticos albergan glorietas, recunchos singulares e unha das coleccións de camelias máis importantes de Galicia. O percorrido continúa no Castelo de Soutomaior, rodeado dun espectacular xardín botánico que reúne especies procedentes de diferentes partes do mundo.

A experiencia conclúe no Pazo de Rubiáns, cuxo parque foi recoñecido como Xardín de Excelencia Internacional de Camelias e destaca pola riqueza botánica e paisaxística dun espazo que combina historia, tradición e natureza.

Tren Experiencia MEGA A Coruña de 1906

Saída: 15 de agosto

Esta ruta propón unha viaxe ao pasado para descubrir a Coruña de comezos do século XX. Unha visita teatralizada polo centro histórico permite coñecer a cidade de 1906 a través de personaxes como Emilia Pardo Bazán e achegarse ás orixes de Estrella Galicia, fundada ese mesmo ano por José María Rivera Corral.

O percorrido continúa no Museo de Estrella Galicia (MEGA), onde se explora a historia da cervexa mediante unha experiencia interactiva que inclúe un obradoiro de tiraxe e unha maridaxe con queixos e conservas galegas. Despois, hai tempo libre para xantar e gozar da gastronomía coruñesa.

A xornada remata cunha visita ás plantacións de lúpulo de LUTEGA, onde se descobre o cultivo dun dos ingredientes fundamentais na elaboración da cervexa.

Tren da Ruta dos Queixos de Galicia

Saídas: 22 de agosto

As persoas amantes da gastronomía atoparán nesta ruta unha oportunidade para descubrir algúns dos queixos máis representativos de Galicia e coñecer de preto o traballo das persoas produtoras locais.

O percorrido inclúe a visita á Casa do Queixo e á queixería Don Crisanto, onde se explica o proceso de elaboración de variedades con denominación de orixe como o Tetilla, Arzúa-Ulloa e San Simón da Costa, acompañadas de diferentes degustacións.

A experiencia complétase en Arqueixal, un proxecto de produción artesanal e ecolóxica que amosa un modelo comprometido coa sustentabilidade e a conservación do medio rural galego.

Tren da Ruta dos Faros

Saídas: 29 de agosto

Esta ruta percorre algunhas das paisaxes máis espectaculares do litoral norte galego, onde os faros e os cantís protagonizan unha viaxe marcada pola forza do océano Atlántico.

O itinerario visita lugares emblemáticos como o Cabo Ortegal, o miradoiro da Vixía Herbeira —un dos cantís máis altos de Europa—, o Santuario de Santo André de Teixido e o Cabo de Estaca de Bares, o punto máis setentrional da Península Ibérica.

O percorrido complétase cunha parada en Viveiro, coas panorámicas sobre as rías de Viveiro e O Barqueiro e coa visita aos cantís de Loiba, un espazo natural de extraordinaria beleza.

Tren do Viño de Monterrei

Saídas: 29 de agosto

Esta proposta achega a persoa visitante á Denominación de Orixe Monterrei a través dun percorrido que combina patrimonio, enoturismo e gastronomía.

A xornada comeza no Castelo de Monterrei cunha visita guiada e teatralizada que permite coñecer a historia desta fortaleza. Despois, o itinerario continúa na adega Gargalo, onde se realiza unha degustación de viños acompañada dun petisco. En Verín hai tempo libre para xantar e descubrir a localidade.

Pola tarde, a ruta visita a vila histórica de Allariz, o Ecoespazo do Rexo, onde ten lugar unha degustación de queixos, e a Colexiata de Xunqueira de Ambía. Antes de finalizar o percorrido, realízase unha parada na estación de Baños de Molgas, convertida en museo e espazo gastronómico.

Se algunha destas rutas encaixa contigo, podes comprar o teu billete aquí. Agardámoste a bordo para seguir descubrindo Galicia desde outra perspectiva!