San Pedro. Viveiro (Lugo)
O cuarto domingo de agosto. Viveiro – que ten outras importantes celebracións como a Semana Santa, “A Feira das Maulas” en Galdo, “A Rapa das Bestas de Candaoso”, a romaría do Monte de San Roque- celebra especialmente unha singular festa campestre nas marxes do río Naseiro.
A aqueles lugares de verdor e de frescura, nas proximidades dos xigantescos eucaliptais de Chavín, acoden as familias con mesa e mantel e cos máis típicos manxares, na compaña de grupos folclóricos, que fan que este encontro se coñeza, e con xustiza, como “A Romaría do Bo Xantar”.
