Inventio: O espectáculo familiar baseado no Camiño de Santiago que que pronto encherá a Península de ilusionismo, humor, drama, danza e música

A partir de setembro terá lugar a estrea do novo espectáculo “Inventio”, unha xira para gozar en familia que viaxará por toda Galicia, España e Portugal ata xaneiro de 2023.

Este proxecto nace como iniciativa de  Thinking Up Events, a Xunta de Galicia, Xacobeo 21-22, Fundación “A Caixa” e o apoio de Sargadelos. O principal fin desta proposta é servir como vehículo de coñecemento e divulgación do Camiño de Santiago e da cultura galega, e que ademais, é apta para todos os públicos.

Unha función con moita personalidade

Inventio é unha posta en escena con ecos de cinema futurista nunha atmosfera máxica e vangardista, que enxalza a paisaxe, os costumes, a arte, a música e a arquitectura de Galicia. Un equipo de bailaríns, artistas de circo e ilusionistas, baixo a dirección creativa do mozo galego Martín Varela e do dramaturgo José L. Prieto, actuarán para plasmar esta viaxe da transformación interna do peregrino e a procura da sensibilidade

Ambientada no ano 2094, a misión dos protagonistas é recuperar as raíces da cultura galega no último Xacobeo do século, cando o Camiño desaparece de forma misteriosa. Con todo,  Inventio non está baseada na tradición histórica do Camiño, senón que se centra nas futuras xeracións que marcarán a identidade da cultura galega.

Para crear este universo distópico, os creadores de Inventio inspiráronse en grandes historias como “The Things To Come” (1936), de William  Cameron Menzies e  H.G. Wells, ou “2001, Odisea no espazo” (1968), de Kubrick. Mesmo pode apreciarse a influencia das escenografías para teatro de Bob Wilson ou os dous “Blade  Runner” de Denis  Villeneuve e Ridley  Scott.

Inventio recibirá a todo tipo de públicos, aproximando aos espectadores as pegadas do Camiño na cultura galega, do mesmo xeito que a súa influencia ao longo da historia en famosos autores como Cunqueiro, Cervantes, García Lorca ou Valle-Inclán.

As entradas estarán dispoñibles a través da páxina web www.inventio.gal a partir do mércores 6 de abril. O calendario da xira galega, sen contar as datas e espazos de España e Portugal que quedan por anunciar, é o seguinte:

Calendario

30 de setembro, 1 e 2 de outubro: Teatro Jofre de Ferrol

7, 8 e 9 de outubro: Auditorio de Galicia de Santiago de Compostela

5 e 6 de novembro: Auditorio Gustavo Freire de Lugo

11, 12 e 13 de novembro: Pontevedra, recinto por confirmar

2 e 3 de decembro: Auditorio Municipal de Ourense

3, 4 e 5 de xaneiro: Auditorio Mar de Vigo

13 e 14 de xaneiro: Teatro Colón da Coruña

Deixa unha resposta

O teu enderezo electrónico non se publicará