Festa variable, especialmente celebrada nos primeiros días de maio, nese espazo no que alternan sólidos casais da nobreza con igrexas de pintorescas torres e casas humildes de viñateiros. Ribadavia reúne todas as esencias dos ribeiros e, en especial, do Ribeiro de Avia, dese río que pasa entre os socalcos nos que maduran os acios de uvas de Pazos de Arenteiro, Leiro e Beade, para unirse ao Miño en Ribadavia.
Cidade que creceu arredor do castelo dos Sarmiento, coa súa xudería con adegas antigas, de frescura, con algo de santuario pagán e auténticos ateneos populares.
Esta festa amosa e galardoa o mellor das adegas deses puntos célebres do Ribeiro: Barbantes, Razamonde, Ventosela, Esposende, Castrelo, A Arnoia, San Cristovo, Beade, Leiro, Beiro, San Clodio, Riobó, Gomariz, Pazos de Arenteiro, Varón.
