Parga – Ladra – Támoga
Situación
Na Terra Cha luguesa, concellos de Abadín, Baleira, Begonte, Castro de Rei, Cospeito, Friol, Guitiriz, Lugo, Outeiro de Rei, Rábade, Vilalba e Xermade.
Superficie
5.013,01 ha.
Acceso
As principais vías son a autovía A-6 e a estrada N-VI no traxecto entre Lugo e Guitiriz. Desvíos cara ao norte. Cara a Vilalba pola N-634.
Servizos
Aloxamento: Si. Comer: Si.
Máis información
Promoción Turística “Terras do Miño” Tel.: 902 101 117.
Equipamentos
Observatorios ornitolóxicos na Lagoa de Cospeito, lagoa de Bardancos e Lagoa do Rei (Rábade); e senda de circular na Lagoa de Cospeito.
Outros espazos naturais relacionados / próximos:
LIC “Serra do Xistral”
Delicada levidade
O denominado ”complexo húmido da Terra Chá” comprende esta parte da conca alta do Miño onde recibe os afluentes principais pola beira dereita: o Ladra, co seu tributario o Parga, o Támoga e o Narla, así entre moitos outros leitos como o Labrada, o Trimaz, o Madalena.
Ademais da horizontalidade que provoca trazados lentos e sinuosos, adiviñados pola vexetación, outra característica é a pouca permeabilidade deste terreo arxiloso que orixina a formación de charcas. Algunhas temporalmente, dependentes da pluviosidade; pero outras como a Lagoa de Cospeito e a lagoa de Caque forman dous dos principais sistemas lacustres de Galicia. Ambos espazos son lagos de carácter seminatural, cuxa forma actual é debida a proxectos de rexeneración que deixan atrás os intentos de desecación de tempos pasados. Os observatorios e paseos circulares conxugan a súa accesibilidade coa conservación dos fráxiles humidais.
Trátase dunha paisaxe modelada pola actividade agrícola e gandeira na que aínda hai espazo para a conservación de manchas boscosas autóctonas. Carballeiras e especies asociadas ás ribeiras fluviais converten o paseniño fluír das augas nun espello perfecto dos lentos cambios estacionais.