As Festas Gastronómicas

AS FESTAS GASTRONÓMICAS

“A cociña cristiá de Occidente non ten despensa de tanta amplitude como a que ofrece Galiza”

ÁLVARO CUNQUEIRO

A gastronomía é un dos principais recursos turísticos de Galicia: a elevada calidade e variedade dos produtos autóctonos é a base da diversidade de manxares que se confeccionan e dos artigos que se serven. Os produtos, tanto do campo coma da cabana e, sobre todo, do mar, teñen as súas propias peculiaridades e, aínda que hoxe penetraran do exterior, segue sendo a calidade do autóctono a principal característica da cociña galega. Ademais, non debemos esquecer que un dos piares do prestixio da nosa cociña foi a gran profesionalidade dos mestres dos fogóns, que realizan o seu labor non só en Galicia, senón que se atopan en calquera lugar do mundo.

As exaltacións gastronómicas suscitan o interese de cantos nos visitan. A orixe destas festas sitúase en celebracións locais ou comarcais nas que se conmemoran tradicións do lugar, reunións de amigos, ou se celebran colleitas ou festas relixiosas, como as romaxes, nas que o cumprimento da promesa ao santo se completaba cunha comida tradicional. Ao alcanzar renome, a festa atraeu xentes doutros lugares. Outras exaltacións gastronómicas naceron xa con intencións turísticas. Entre todas suman ao redor de 300 en toda Galicia cada ano: nas do litoral, peixes e mariscos son os máximos expoñentes; e no interior, a base son as carnes e os peixes de río.

PRINCIPAIS FESTAS GASTRONÓMICAS