Do 18 de setembro ao 20 de decembro de 2026, Turismo de Galicia celebra a 20.ª edición desta proposta, que combina gastronomía, turismo rural e uns días para desconectar. En total, participan 71 casas de turismo rural repartidas polas catro provincias.

Aínda non sabes como funciona? Contámoscho.

Unha mesa con sabor a Galicia

A proposta máis sinxela é o Menú Outono Gastronómico, que por 40 € por persoa inclúe entrante, primeiro prato, segundo prato, sobremesa e viño con Denominación de Orixe galega.

Cada establecemento ofrece a súa propia proposta gastronómica, así que podemos aproveitar para descubrir diferentes sabores e produtos de Galicia mentres coñecemos novos recunchos do noso territorio.

E se despois de comer non nos apetece coller o coche de volta, temos outras opcións.

Unha escapada gastronómica

O Paquete Outono Gastronómico combina o menú con unha noite de aloxamento —venres ou sábado— e almorzo.

O prezo é de 115 € para unha persoa en habitación individual ou 175 € para dúas persoas en habitación dobre.

Para quen prefira gozar de toda a fin de semana está a opción de Fin de Semana Outono Gastronómico, que inclúe dous menús, dous almorzos por persoa e dúas noites de aloxamento, as do venres e o sábado.

O prezo é de 175 € para unha persoa en habitación individual e 275 € para dúas persoas en habitación dobre.

Tamén en familia

O Outono Gastronómico tamén ten propostas para familias con menores de ata 14 anos. A opción de Fin de Semana Familiar inclúe menús para adultos e nenos, dúas noites de aloxamento e almorzos.

Hai dúas modalidades:

• 2 adultos + 1 menor: 325 €.
• 2 adultos + 2 menores: 375 €.

Unha boa oportunidade para descubrir en familia as paisaxes, vilas e actividades do rural galego.

Outono Plus: aínda máis experiencias

E para quen queira aproveitar aínda máis a escapada, algúns establecementos ofrecen Outono Plus, unha modalidade que permite complementar a estadía con actividades relacionadas coa natureza, a cultura, o deporte ou o enoturismo.

A oferta depende de cada establecemento, así que convén consultar as propostas dispoñibles á hora de facer a reserva.

20 anos, moitos outonos por gozar

Pasaron xa dúas décadas desde a primeira edición e o Outono Gastronómico segue propoñendo unha combinación que nunca pasa de moda: comer ben, descansar e descubrir Galicia.

Ata o 20 de decembro temos tempo para escoller a nosa casa rural, reservar o noso menú e preparar unha escapada.

Porque o outono pode gozarse de moitas maneiras. E unha das mellores é facelo arredor dunha mesa, en boa compañía e nalgún dos recunchos rurais de Galicia.

Apúntaste a celebrar os 20 anos do Outono Gastronómico?

Consulta aquí os establecementos participantes e todas as propostas do 20.º Outono Gastronómico.

A continuación, ofrecémosche unha listaxe das festas de Interese Turístico de Galicia, Nacional e Internacional que se celebran no mes de xullo:

Asalto ao Castelo

Vimianzo (A Coruña)
Festa de Galicia de Interese Turístico
03 xul – 04 xul

O Asalto ao Castelo de Vimianzo é unha celebración que recrea, en clave festiva, a Gran Guerra Irmandiña do século XV, cando o pobo galego se ergueu contra o poder feudal. Durante a noite do primeiro sábado de xullo, a fortaleza convértese en escenario dunha representación participativa na que veciños e visitantes se transforman en protagonistas do “asalto”, acompañados de música, teatro e humor.

A festa inclúe actividades paralelas como a Cea Medieval, o Asaltiño infantil, a Feira de Artesanía e desfiles populares, que enchen de ambiente as rúas da vila durante toda a fin de semana.

Unha experiencia única na que historia, participación e espectáculo se unen para ofrecer ao visitante unha inmersión na Galicia medieval máis festiva.

Festa da Lagosta e da Cociña Mariñeira

A Guarda (Pontevedra)
Festa de Galicia de Interese Turístico
03 xul – 05 xul

A Festa da Lagosta e da Cociña Mariñeira celebra a tradición gastronómica mariñeira da Guarda, con especial protagonismo da lagosta e outros mariscos de gran calidade. A festa, de carácter popular, combina degustacións, actividades culturais e música nun ambiente festivo xunto ao mar.

O programa complétase cunha feira de artesanía e visitas guiadas á Ruta das Cetáreas, que permiten coñecer a tradición pesqueira e conserveira da localidade.
Unha cita que convida o visitante a gozar do sabor do Atlántico nun entorno mariñeiro único.

A Rapa das Bestas de Sabucedo

A Estrada (Pontevedra)
Festa de Interese Turístico Internacional
03 xul – 06 xul

A Rapa das Bestas de Sabucedo é unha das tradicións máis singulares de Galicia, na que os aloitadores recollen e rapan a man os cabalos salvaxes nun curro tradicional. A festa combina esforzo físico, ritualidade e unha profunda conexión coa natureza.

Durante a fin de semana, os veciños acompañan a busca dos cabalos no monte e a súa condución ata o recinto, onde se desenvolve o espectáculo principal ante milleiros de visitantes.

Unha celebración ancestral que ofrece ao viaxeiro unha experiencia etnográfica única en contacto directo coa tradición galega.

A Rapa das Bestas de Candaoso

Viveiro (Lugo)
Festa de Galicia de Interese Turístico
04 xul – 05 xul

A Rapa das Bestas de Candaoso é unha tradición gandeira na que se realiza o corte de crinas, a desparasitación e o marcaxe dos cabalos salvaxes. Co paso do tempo, este traballo converteuse nun espectáculo que atrae numerosos visitantes cada verán.

O curro celébrase nun entorno natural privilexiado, onde se combinan a emoción do manexo dos animais con actividades festivas, música e gastronomía popular.

Unha experiencia que achega o visitante a unha das tradicións rurais máis arraigadas de Galicia.

Festas das Cereixas de Paiosaco

A Laracha (A Coruña)
Festa de Galicia de Interese Turístico
04 xul – 05 xul

A Feira das Cereixas de Paiosaco ten as súas raíces nas antigas feiras medievais e rende homenaxe a un froito que durante décadas tivo gran importancia económica no val do río Anllóns. Celebrada o primeiro domingo de xullo, mantén viva unha tradición moi arraigada no municipio da Laracha.

Festa de Exaltación do Pan de Cea

San Cristovo de Cea (Ourense)
Festa de Galicia de Interese Turístico
05 xul

A Festa do Pan de Cea rende homenaxe a un dos produtos gastronómicos máis emblemáticos de Galicia. A celebración inclúe obradoiros, feira de produtos locais e degustacións arredor do famoso pan elaborado en fornos tradicionais do municipio.

O domingo celébrase o acto principal nun ambiente festivo amenizado por música tradicional, coa participación de panadeiros, artesáns e visitantes.

Unha cita gastronómica que pon en valor a tradición panadeira e a riqueza culinaria do interior de Galicia.

Festival Internacional Mundo Celta de Ortigueira

Ortigueira (A Coruña)
Festa de Interese Turístico Internacional
08 xul – 12 xul

O Festival Internacional do Mundo Celta de Ortigueira é un dos grandes referentes da música folk en Europa. Durante varios días, a localidade acolle concertos, desfiles de bandas de gaitas e actividades culturais nun ambiente festivo xunto ao mar.

O evento complétase cunha gran zona de acampada, feira de artesanía e programación paralela que atrae milleiros de visitantes cada ano.

Unha cita imprescindible para os amantes da música celta e da cultura galega contemporánea.

Festa da Faguía do Carnés

Vimianzo (A Coruña)
Festa de Galicia de Interese Turístico
09 xul

A Festa da Faguía do Carnés é unha celebración de orixe medieval vinculada á Confraría de San Cristovo, que hoxe se centra nunha gran comida popular de callos.

A festa mantén elementos tradicionais como a poxa de ofrendas, a música popular e o encontro veciñal no recinto da Cerca, onde milleiros de persoas comparten mesa nun ambiente festivo e relixioso.

Unha tradición gastronómica que combina historia, devoción e convivencia na Costa da Morte.

Festas de San Benitiño de Lérez

Pontevedra (Pontevedra)
Festa de Galicia de Interese Turístico
11 xul

A romaría de San Benitiño de Lérez, xunto ao mosteiro de San Salvador de Lérez, reúne numerosos devotos que acoden a misas, ofrendas e rituais ao santo ao que se lle atribúen propiedades curativas. Tras a procesión, a celebración continúa nos Salóns do Lérez, onde se inaugura o verán festivo de Pontevedra con degustacións populares de mexillóns e empanada.

Festa do Polbo

Mugardos (A Coruña)
Festa de Galicia de Interese Turístico
11 xul

A Festa do Polbo de Mugardos rende homenaxe a un dos produtos máis emblemáticos da súa tradición mariñeira, vinculada xa desde o século XVIII á actividade pesqueira do porto. O polbo, preparado ao estilo mugardés con salsa de cebola e pementos, é o gran protagonista desta cita gastronómica enmarcada nas Festas do Carme.

Feira Franca Medieval de Betanzos

Betanzos (A Coruña)
Festa de Galicia de Interese Turístico
10 xul – 12 xul

A Feira Franca Medieval de Betanzos recrea a época medieval con representacións históricas, mercados e espectáculos no casco histórico da cidade. As rúas transfórmanse para acoller escenas teatrais, torneos e actividades ambientadas nos séculos XIV e XV.

A programación inclúe música, teatro de rúa e postos de artesanía que completan a experiencia.

Unha festa que permite ao visitante viaxar ao pasado medieval dunha das cidades históricas de Galicia.

Festividade do Apóstolo de Santiago

Santiago de Compostela (A Coruña)
Festa de Interese Turístico Internacional
15 xul – 31 xul

As Festas do Apóstolo enchen Santiago de Compostela de cultura, música e actividades durante a segunda quincena de xullo. O programa inclúe concertos, espectáculos de rúa e eventos para todos os públicos.

O 24 de xullo destaca o espectáculo pirotécnico fronte á Catedral, seguido do Día de Galicia coa tradicional ofrenda ao Apóstolo e a misa solemne.

Unha celebración que converte a capital galega no epicentro cultural e espiritual do verán.

Festa da Vieira de Cambados

Cambados (Pontevedra)
Festa de Galicia de Interese Turístico
16 xul – 19 xul

A Festa da Vieira, celebrada en Cambados, é a única dedicada á exaltación deste molusco comercializado no porto de Tragove. Organizada por numerosas asociacións locais, reúne cada ano milleiros de visitantes arredor da gastronomía e a tradición mariñeira.

Feira do Viño do Rosal

O Rosal (Pontevedra)
Festa de Galicia de Interese Turístico
17 xul – 19 xul

A Feira do Viño do Rosal busca promocionar os viños, conservas e produtos de horta e flor do val do Rosal, un entorno de microclima privilexiado que achega gran calidade aos seus produtos. A feira complétase con actividades culturais, infantís, exposicións e música en directo.

Festa do Santísimo Cristo dos Aflixidos de Bouzas

Vigo (Pontevedra)
Festa de Galicia de Interese Turístico
17 xul – 21 xul

A Festa do Santísimo Cristo dos Aflixidos de Bouzas é unha das celebracións máis arraigadas da contorna de Vigo. Durante cinco días, o programa combina actos relixiosos, culturais e festivos, como o pregón, a regata de faluchos, verbenas e o Festival Poético Piro-Musical “Cidade de Vigo – Vila de Bouzas”.

Festa da Dorna de Ribeira

Ribeira (A Coruña)
Festa de Galicia de Interese Turístico
17 xul – 24 xul

A Festa da Dorna nace en 1948 en Ribeira como unha celebración popular marcada polo humor e a imaxinación, arredor dunha orixinal “botadura” que deu orixe a unha tradición moi arraigada no Barbanza.

Como elemento singular, destaca o “Caderno de Bitácora”, co programa da festa e guiños satíricos á actualidade.

Festa da Pescada do Pincho de Celeiro

Viveiro (Lugo)
Festa de Galicia de Interese Turístico
18 xul

A Festa da Pescada de Celeiro, en Viveiro, celébrase en homenaxe a un dos produtos estrela do seu porto pesqueiro. A merluza do pincho, capturada de forma tradicional, é a protagonista dunha gran degustación popular.

Desde a lonxa vella repártense milleiros de racións en distintas preparacións, acompañadas de música e ambiente festivo. Destaca a merluza especial “Penalba”.

Festa do Percebe do Roncudo

Ponteceso (A Coruña)
Festa de Galicia de Interese Turístico
18 xul

A Festa do Percebe do Roncudo, no concello de Ponteceso (A Coruña), foi a primeira festa do percebe en España, nacida hai máis de 20 anos. Está estreitamente ligada á economía e tradición de Corme, onde o percebe foi unha das principais fontes de riqueza, poñendo en valor a figura do percebeiro e o seu oficio.

Gran Premio de Carrilanas de Esteiro

Muros (A Coruña)
Festa de Interese Turístico Nacional
19 xul – 21 xul

O Gran Premio de Carrilanas de Esteiro é unha competición única na que vehículos de madeira sen motor descenden por un circuíto urbano ante milleiros de espectadores.

A festa combina deporte, creatividade e tradición con actividades paralelas como música, gastronomía e espazos infantís.

Un evento singular que transforma Esteiro nun gran escenario festivo xunto ao mar.

Romaría da Fraga

As Pontes de García Rodríguez (A Coruña)
Festa de Galicia de Interese Turístico
25 xul

As Fragas do Eume son un enclave natural único que merece unha visita en calquera época do ano pola beleza das súas paisaxes. Neste entorno, os días 24 e 25 de xullo As Pontes celebra a Romaría da Fraga, unha festa con orixe a principios do século XX que combina actos relixiosos e música folk na Carballeira de Dona Rita, onde os romeiros chegan a construír casetas de madeira xunto ao río para vivir a celebración.

Festa da Bica

A Pobra de Trives (Ourense)
Festa de Galicia de Interese Turístico
26 xul

A Festa da Bica de Trives celébrase de forma ininterrompida desde 1972 e reúne veciños e visitantes no cumio de Manzaneda o último fin de semana de xullo. A bica, produto gastronómico emblemático de Trives, é o eixo central dunha celebración profundamente ligada á identidade do territorio.

Festa do Carneiro ao Espeto

Moraña (Pontevedra)
Festa de Galicia de Interese Turístico
26 xul

A Festa do Carneiro ao Espeto de Moraña é unha das citas gastronómicas máis emblemáticas de Galicia e pon o broche final ás festas do municipio. Celebrada na Carballeira de Santa Lucía, xira arredor do tradicional asado de carneiro ao estilo pampero nun ambiente de convivencia, música e celebración, destacando a espectacular imaxe dos carneiros asándose lentamente en vertical arredor do lume.

Cada unha destas festas invita a coñecer a súa cultura, gozar da súa xente e vivir experiencias de tradición, gastronomía, música e patrimonio. Un verán en Galicia é, en definitiva, un verán diferente.

Hoxe queremos resaltar o máis destacado de cada unha das festas de interese turístico internacional e nacional, citas imprescindibles que non debes perder.

SEMANA SANTA DE VIVEIRO – Festas de interese turístico internacional

A Semana Santa de Viveiro celébrase desde o Venres de Dolores ata o Domingo de Resurrección. Dentro da súa programación destaca especialmente a “Procesión do Encontro” do Venres Santo.

Na Praza Maior e no atrio de Santa María represéntanse de forma emocionante as caídas de Cristo coa cruz ás costas, mentres a Virxe, a Verónica e San Xoán o buscan, creando un momento de gran intensidade e tradición que non podes perder.

SEMANA SANTA DE FERROL – Festas de interese turístico internacional

A Semana Santa de Ferrol celébrase desde o Domingo de Ramos ata o Domingo de Resurrección. Entre os actos máis destacados atópase a Procesión de “Os Caladiños”, que ten lugar o Venres Santo ás 23:30 h.

O percorrido parte da Concatedral de San Xulián e discorre por varias rúas do centro histórico ata chegar á praza de Amboage. O máis característico desta procesión é o profundo silencio que envolve tanto aos participantes como ao público, só interrompido polo son dos tambores e o arrastrar de cadeas, creando unha atmosfera única e emocionante. Como broche final, é tradición entoar a Salve Regina en honor á Virxe dos Dolores.

FESTAS DO SANTÍSIMO CRISTO – Festas de Galicia de interese turístico

O Santo Cristo de Fisterra comeza en marzo e prolongase ata o Luns de Pascua, cunha programación cargada de tradición e devoción. O momento máis destacado ten lugar o Domingo de Resurrección, coa representación da Resurrección do Señor no entorno da igrexa de Santa María das Areas, unha escenificación con personaxes vivos que rememora un antigo auto sacramental e culmina co tradicional “¡Aleluia!”.

A celebración continúa co encontro da Nai co seu Fillo Resucitado, acompañado de repiques de campás, fogos artificiais, solta de pombas e música de bandas. Como broche final, celébrase a Danza de Nosa Señora das Areas, tamén coñecida como Danza dos Paos, en honor á Virxe.

SEMANA SANTA DE CANGAS – Festas de Galicia de interese turístico

A Semana Santa de Cangas celébrase desde o 7 de marzo ata o Domingo de Resurrección, cunha programación repleta de tradición.

Entre os actos máis destacados atópase a procesión do Venres Santo, coñecida como a Procesión do Santo Encontro, acompañada pola Banda de Música Belas Artes de Cangas. Sobresae o paso das Caídas do Nazareno, coa singular figura articulada de Xesús, un dos elementos máis chamativos da celebración.

SEMANA SANTA DE PARADELA (MEIS) – Festas de Galicia de interese turístico

A Semana Santa de Paradela (Meis) celébrase desde o Domingo de Ramos ata o Domingo de Pascua, cunha programación marcada pola tradición.

O momento máis destacado ten lugar o Venres Santo, coa escenificación das últimas horas da vida de Xesús no atrio da igrexa. A continuación, celébrase un Vía Crucis ata o monte da Croa, onde culmina coa representación da Crucifixión, unha experiencia que, vivida en persoa, transmite unha intensa emoción.

SEMANA SANTA DE BETANZOS – Festas de Galicia de interese turístico

A Semana Santa de Betanzos, que se celebra do 28 de marzo ao Domingo de Pascua, transforma o casco histórico da cidade nun escenario único de procesións, celebracións litúrxicas e concertos de música sacra.

Entre a súa programación destaca especialmente o Ciclo de Música Sacra, auténtico protagonista destas datas, cunha coidada selección de concertos que merece a pena gozar.

SEMANA SANTA DE MONDOÑEDO – Festas de Galicia de interese turístico

A Semana Santa de Mondoñedo celébrase desde o Domingo de Pasión ata o Domingo de Resurrección, nun entorno cargado de historia e tradición.

Un dos momentos máis destacados é a Procesión da Soidade, que ten lugar o Venres Santo. Nel, os asistentes acompañan á Virxe con velas acesas, creando unha atmosfera íntima e solemne. Durante a procesión interprétase o Plorans, do Mestre Pacheco, unha peza única que só se pode escoitar en Mondoñedo e na Capela Real de Madrid.

SEMANA SANTA DE SANTIAGO DE COMPOSTELA – Festas de Galicia de interese turístico

Santiago de Compostela celebra a Semana Santa desde o Venres de Pasión ata o domingo 12 de abril (Dominica in Albis).

Entre as súas actividades máis destacadas merece a pena visitar as igrexas monumentais da cidade, abertas en horarios especiais durante estas datas, e asistir aos concertos de música sacra e espiritual que se celebran no seu interior, unha experiencia única que combina arte, tradición e devoção.

SEMANA SANTA DE LUGO – Festas de Galicia de interese turístico

A Semana Santa de Lugo celébrase do mércores 25 de marzo ao Domingo de Pascua. Entre os actos máis destacados atópase a Procesión da Santa Cea do Xoves Santo, un privilexio único da Catedral de Lugo desde 1963.

A solemne procesión da Sagrada Forma percorre as principais rúas do casco histórico, ofrecendo aos asistentes unha experiencia de gran solemnidade e devoção.

SEMANA SANTA DO CARBALLIÑO – Festas de Galicia de interese turístico

A Semana Santa de O Carballiño celébrase desde o Domingo de Pasión ata o Domingo de Pascua. Entre os seus elementos máis destacados atópase a forma de procesionar, co “doble ombreiro” ou falso costal, acompañada de composicións musicais únicas.

O Venres Santo ten lugar a Procesión do Cristo da Saúde, na que a imaxe do Cristo é custodiada por 14 penitentes que portan cruces, simbolizando o seu camiño cara ao Calvario, nun acto de gran solemnidade e emoción.

Tamén destaca a Procesión Solemne do Santo Enterro, “Os Caladiños”, que abre filas coa Cruz Procesional, o estandarte da confraría e o Lignum Crucis, custodiado por nazarenos, penitentes descalzos e mantillas.

Non perdas esta oportunidade de ser testemuña dunha das expresións máis auténticas da Semana Santa en Galicia!

Entre as súas celebracións destacan Festas de Interese Turístico Internacional, como a Semana Santa de Viveiro e a de Ferrol, así como outras de interese turístico en Galicia: a Festa do Santísimo Cristo de Fisterra, a Semana Santa de Cangas, e a de Paradela (Meis), a de Betanzos, a de Mondoñedo, a de Santiago de Compostela, a de Lugo e a Semana Santa do Carballiño.

Ademais, durante estas datas celébranse festas gastronómicas de interese turístico, ideais para degustar produtos locais.

Festas gastronómicas destacadas

Estas son catro celebracións declaradas “Festas de Galicia de Interese Turístico”, que teñen lugar do 27 de marzo ao 5 de abril:

Feira do Viño de Amandi

Onde: Sober
Cando: Do 27 ao 29 de marzo

A Feira do Viño de Amandi honra a tradición vitivinícola da D.O. Ribeira Sacra nun ambiente cheo de música e ledicia. Durante a feira, os asistentes poden degustar os viños mencía da comarca xunto con produtos típicos como queixos, mel ou doces, ademais de descubrir a olaría tradicional de Gundivós, coñecida polo seu acabado negro. Miles de persoas participan cada ano nesta cita que combina cultura, gastronomía e tradición.

Feira do Queixo do Cebreiro

Onde: Pedrafita do Cebreiro
Cando: 3 de abril

A Feira do Queixo do Cebreiro, celebrada desde 1987, é un evento que pon en valor a gastronomía e as tradicións populares da zona. Os visitantes poden degustar o famoso Queixo do Cebreiro e pratos típicos como o polbo, mentres gozan de pasarrúas, bailes tradicionais e a lectura do pregón a cargo dun personaxe ilustre. A feira combina cultura, gastronomía e entretemento nunha xornada única para toda a familia.

Festa do Requeixo e do Mel das Neves

Onde: As Neves
Cando: Do 3 ao 4 de abril

Cada Venres Santo, a Festa do Requeixo e do Mel das Neves celebra os sabores tradicionais da comarca, centrando a atención no requeixo e no mel. Os visitantes poden degustar estes produtos acompañados de viños e pratos típicos como polbo ou chourizos ao viño, mentres desfrutan de música e actividades culturais. A feira inclúe cursos e conferencias sobre a elaboración do requeixo e do mel, e destaca especialmente a degustación de requeixo con mel, un verdadeiro emblema gastronómico da zona.

Festa da Ostra de Arcade

Onde: Soutomaior
Cando: Do 3 ao 5 de abril

A Festa da Ostra de Arcade é unha das celebracións gastronómicas máis concorridas de Galicia, que cada ano atrae máis de 25.000 persoas. Durante o fin de semana, os asistentes poden degustar ostras crúas con limón, empanadas ou en escabeche, acompañadas de albariño, mentres gozan de música, pasarrúas e fogos artificiais. Un dos maiores atractivos da feira é a habilidade das ostreiras, que abren as ostras con rapidez e mestría diante do público.

Non perdas a oportunidade de vivir a Semana Santa en Galicia combinando tradición, cultura e gastronomía. Agardámoste!

A cociña tradicional do Entroido xira en torno ao porco. Tras a matanza en novembro e varios meses de curación, as chacinas alcanzan o seu punto perfecto xusto a tempo para estas datas.

É a ocasión ideal para sacar á mesa os mellores produtos: lacón, androlla, chourizo, orella, cacheira (ou cachucha), botelo… sempre acompañados de patacas, grelos, garavanzos ou galiña. Pratos contundentes e saborosos que invitan a compartir.

Grandes banquetes, exhibicións culinarias, música, baile, comparsas e, sobre todo, moita diversión agárdante!

Pratos típicos para celebrar o Entroido

O cocido galego

O cocido é un dos grandes expoñentes da cociña galega elaborada con produtos de proximidade: unha auténtica exaltación do porco, acompañado de tenreira, galiña, verduras e garavanzos.

En Lalín, no corazón de Galicia, alcanza tal categoría que conta cunha celebración propia: a Festa do Cocido de Lalín, declarada Festa de Interese Turístico Internacional, onde tamén se saborea a chegada do carnaval.

A cita inclúe un completo programa cultural e gastronómico, ademais do desfile de carrozas, comparsas e verbena. O seu atractivo é tal que en edicións anteriores reuniu preto de 60.000 persoas.

Aínda que a xornada principal se celebra o domingo previo ao Entroido, febreiro enteiro é o Mes do Cocido, unha ocasión perfecta para visitar Lalín e degustalo.

Lacón con grelos

Este prato combina o lacón (extremidade dianteira do porco) cos grelos (follas e talos do nabo). Dous ingredientes nobres da gastronomía galega que, nesta época do ano, únense para formar unha exquisita parella, normalmente acompañada de patacas cocidas e chourizo.

En Cuntis, recóllida localidade famosa polas súas augas termais e as súas camelias, celébrase o domingo seguinte ao Entroido a Festa do Lacón con Grelos, declarada Festa de Interese Turístico de Galicia.

Está aberta a todo o público, con degustacións gratuítas, obradoiros gastronómicos e a alegría das comparsas do carnaval enchendo as rúas.

O remate final póñeo “O Enterro do Chapante”, unha variante do tradicional enterro da sardiña recuperada tras anos no esquecemento, que fai referencia aos “chapantes”, alcume dos habitantes de Cuntis e guiño á súa fama de grandes comensais.

Embutidos: Botelo e Androlla

Típicos embutidos da zona de Ourense, elaboran principalmente con partes do porco e embútense en tripas. Sólense servir acompañados de patacas, chourizo e repolo ou grelos.

No caso do botelo, utilízase o estómago do animal como recipiente, converténdoo no embutido de maior tamaño. Tamén se lle coñece como butelo ou bitelo. A súa curación é moi curta, o que o converte nun manxar perecedeiro e moi apreciado, xa que só alcanza o seu punto óptimo durante uns días.

Cada ano, este singular embutido é protagonista da Festa do Botelo en O Barco de Valdeorras, declarada Festa de Interese Turístico de Galicia. Aínda que garda certa proximidade co seu parente berciano, o botelo de O Barco non é exactamente igual; nesa comarca, un embutido similar coñécese como pigureiro.

A androlla, outro embutido típico da zona, elabórase con tripa gorda e rechea de costela adobada. Afúmase durante uns dez días e curase durante un par de meses, alcanzando o seu punto óptimo coa chegada do Entroido.

O Domingo de Entroido, a androlla convértese na estrela do Entroido de Viana do Bolo, na Festa da Androlla, declarada tamén Festa de Interese Turístico de Galicia.

Numerosas persoas acoden a degustar e a gozar do ambiente festivo do Entroido, coa presenza dos boteiros (personaxes emblemáticos) que percorren as rúas acompañando ao folión. Diversión e tradición están garantidas.

Cabrito

O cabrito cocínase no forno de leña, seguindo a tradición que se mantén desde hai décadas. É un dos animais emblemáticos de Vilariño de Conso, onde o pastoreo de alta montaña segue sendo unha actividade viva, presente só nalgúns concellos de Galicia. Este manxar pódese degustar durante a Festa do Cabrito, consolidada como un dos eventos centrais do sábado de Entroido en Vilariño de Conso.

O lado máis doce do Entroido

Para os máis golosos, o Entroido é pura tentación. Entre os doces máis destacados atópanse:

Filloas

En Lestedo celébrase a Festa da Filloa, Festa de Interese Turístico de Galicia. Este doce, emparentado cos crêpes franceses pero moito máis fino, sérvese doce con mel, chocolate, castañas ou marmelada, ou en versión salgada, con lacón, cogomelos ou caldo de cocido.

Entre música e comparsas, pódense degustar as tradicionais filloas á pedra, feitas sobre pedra quente, e tamén as elaboradas nunha máquina local capaz de preparar ¡1.500 por hora! Ademais, o humor e a tradición únense en O atranque dos Xenerais da Ulla, a divertida batalla entre dous xenerais que satirizan a actualidade política e social a cabalo.

Orellas

Delicias de masa fritida cun toque de anís e reladura de limón ou laranxa. Crujientes e adictivas, son un dos doces máis emblemáticos do Entroido galego.

Flores

Masa semellante á das filloas, fritida cun molde especial que lles dá a súa característica forma de flor. Moi populares na provincia de Ourense.

Bica

Biscoito manteigado cunha corteza superior azucrada e tostada, típico de Ourense, especialmente en localidades como A Pobra de Trives, Laza e Verín.

Rosquillas de Anís

Esponxosas e cun distintivo sabor a anís, son un clásico do Entroido que se goza en toda Galicia.

E imprescindibles, uns bos chupitos de xastré e de licor café. Que non falte nada! En Galicia a abundancia é unha norma de cortesía.

Cinco entroidos declarados Festa de Interese Turístico

O evento reuniu algunhas das figuras máis emblemáticas dos entroidos recoñecidos como Festas de Interese Turístico, auténticas xoias culturais que atraen visitantes de todo o mundo:

• Entroido de Xinzo de Limia: famoso pola súa duración, un dos máis longos de Europa.
• Entroido de Verín: cos icónicos cigarróns, personaxes con máscaras de madeira e traxes espectaculares.
• Entroido Viana do Bolo: protagonizado polo son dos fulións con bombos e tambores.
• Entroido de Cobres (Vilaboa): elegante, coas vistosas madamas e galáns cheos de cor.
• Os Xenerais da Ulla: singulares polas súas paradas e atranques, diálogos satíricos a cabalo.

Outros doce entroidos tradicionais

Xunto a eles, a comitiva contou con outros doce entroidos tradicionais, que amosan a riqueza e variedade desta festa en todo o territorio galego:

• As Bonitas de Sande (Cartelle): cos seus espectaculares tocados de fitas e flores.
• Os Vellaróns de Riós: personaxes enmascarados con chocas que anuncian a festa.
• Entroido de Samede (Paderne): as Máscaras levan sombreiros con plumas, fitas de cores e mantón de Manila.
• Os Felos e Madamas de Esgos: traxes coloridos e máscaras traballadas en cartón.
• Os Galos da Mezquita (A Merca): máscara leva un anteface, un traxe de cores vivas, unha caxata e un sombreiro con forma de galo.
• Os Follateiros de Lobios: coñecidos polos seus traxes feitos con follas de millo.
• As Madamitas e Madamitos de Entrimo: con vestimenta elegante e refinada.
• Touro e Xigante de Celavente (O Bolo): O Xigante leva traxe branco, pañoleta vermella con flocos, gorro con pompóns e cintas de cores. O Touro é unha estrutura con colcha e pano de ganchillo adornado con lazos, e dous cornos na dianteira para as envestidas.
• Fulión de Buxán (O Bolo): gran forza sonora con bombos e aixadas batendo no chan.
• Entroido de Salceda de Caselas:lcos ranchos formados por seis danzantes e dúas damas e os cabaleiros para pór orde na celebración.
• Entroido de Mugares (Toén): máscaras tradicionais que enchen de misterio a celebración.
• Os Cabreiros de Muíños: personaxes cubertos de peles e chocas que evocan o mundo rural.

Un patrimonio cultural cheo de música e cor

O Entroido é unha mostra da gran riqueza etnográfica de Galicia. Este desfile permitiu a visitantes e participantes gozar dalgúns dos personaxes máis singulares do noso Entroido e poñer en valor as tradicións que cada comarca mantén vivas nesta festa ancestral.

Cada vez son máis os entroidos que contan coa categoría de Festa de Interese Turístico, tanto a nivel galego como nacional e internacional. Ademais, a declaración do Entroido como Ben de Interese Cultural confirma a súa relevancia dentro do patrimonio galego.

Anímaste a vivilo en persoa? Galicia agárdate coas súas tradicións máis coloridas, cheas de música, máscaras e personaxes únicos que fan do Entroido unha festa irrepetible.

Feira do Viño do Rosal
18 ao 20 de xullo

Reserva a terceira fin de semana de xullo no teu calendario porque se celebra a XXXIII Feira do Viño do Rosal. O evento conta coa participación de adegas da D.O. Rías Baixas, cuxos viños, ademais de ser exquisitos, presumen de premios en prestixiosas categorías. Para os amantes do viño e do deporte, o evento inclúe unha carreira de 10 quilómetros que atravesa os viñedos dunha adega participante. ¿A que esperades, runners?

Festa do Viño Albariño
30 de xullo ao 4 de agosto

Sen dúbida, unha das citas máis importantes do calendario festivo galego. A Festa do Albariño de Cambados recibe en cinco días a unhas 150.000 persoas. O ambiente é incomparable! O Paseo da Calzada enchese de casetas das mellores adegas da zona, ofrecendo os seus albariños a prezos moi accesibles. Goza de espectáculos musicais mentres descobres curiosidades sobre a produción do famoso albariño.

Feira do Viño de Monterrei
8 ao 10 de agosto

A XVIII Feira do Viño de Monterrei combina gastronomía e música cos viños desta Denominación de Orixe como protagonistas. Celébrase en Verín e ofrece un ambiente familiar, con actividades para nenos e espectáculos en directo. Un plan perfecto para gozar en grupo ou en familia.

Feira do Viño do Condado do Tea
22 ao 24 de agosto

Dende 1959, esta festa reúne a máis de 50.000 persoas en Salvaterra de Miño. Na súa LXVI edición, as casetas instálanse no recinto amurallado das Covas de Dona Urraca, creando un ambiente máxico. Os viños brancos e tintos do Condado do Tea (D.O. Rías Baixas) acompáñanse do mellor da gastronomía local.

Con tantas festas e bo viño, será imposible aburrirse este verán en Galicia. Reserva as datas na túa axenda porque… agardámoste en todas elas!

Xa desde finais de agosto estamos en época de vendima, disque este ano algo adiantada. A vendima é unha escusa perfecta para visitar algunha das adegas das D.O. galegas e coñecer polo miúdo o proceso, tan ligado á estación. 

Nestas datas, hai propostas específicas, como o Viñobús Vendima da Ribeira Sacra, por exemplo. O autocar lévanos de paseo polos viñedos, con cata de uvas, mostos e viños. O interesante deste tour outonal é que aprendemos a vendimar e pisar a uva, mergullándonos nos traballos da estación. Seguindo o proceso, o mosto vai ás cubas para a fermentación e, despois dun tempo, xa se pode beber. Como o tempo é dilatado, podemos pedir que nos envíen a botella do noso viño á casa. E, despois do traballo, un xantar na adega, como adoitan facer os viticultores nesta época. O viñobús sae de Monforte de Lemos ás 10:30 e volve ás 16:30, aproximadamente, os días 16, 17, 23 e 24 de setembro. Se temos sorte, pode que haxa algunha praza.

Outro bo plan para gozar do mundo do viño en outono é facer unha ruta de senderismo entre os viñedos da D.O. Valdeorras, na parte máis oriental da provincia de Ourense, visitando as peculiares covas, antigas adegas soterradas onde se elaboraba e conservaba o viño.

Nas adegas da D.O. Ribeiro, ao noroeste da provincia de Ourense, hai experiencias que combinan enoloxía, termalismo, e paseos en barco polas augas do Arnoia.

Monterrei, a D.O. máis pequena, ao sueste da provincia de Ourense, lindando con Portugal, tamén ofrece moitas visitas e ofertas turísticas para o outono, así como nas Rías Biaxas, a D.O. con máis número de adegas, de produción e de marcas. Entre as propostas outonais, por exemplo, a Costeira Sonora, na que se mestura música en vivo, gastronomía e viño, ou os pícnics de vendima.

Aínda non temos plan para a ponte do Pilar? Non lle deamos máis voltas: a Festa do marisco do Grove é o destino perfecto para estas datas, xa que en setembro arrinca a mellor época para comer marisco, na que podemos gozar destes manxares do mar modicamente. Esta festa, de interese turístico nacional, vénse facendo desde 1963. Este ano celébrase entre o 5 e o 14 de outubro, coa degustación de marisco na carpa gastronómica do peirao, moito concerto e actividades xa clásicas como a entrega das Centolas de Ouro, a Regata de Dornas, a carreira popular, animación na rúa… 

Cefalópodo mariño con oito brazos? O polbo! Onde se papan quilos e quilos de polbo no mes de outubro? Na festa de San Froilán, en Lugo, do 4 ao 12 de outubro. Esta festa, que se celebra desde 1754, conserva desde entón a tradición do polbo. Nestas datas instálanse casetas de madeira para a degustación do manxar. Ademais, os negocios de hostalaría sacan os caldeiros para cociñar o polbo á rúa. Así que a cidade enteira cheira que alimenta, mmm…

A festa foi medrando cos anos e, aínda que o máis típico é o polbo, tamén hai postos gastronómicos e de artesanía, e unha morea de espectáculos: O Froilán Sorrí, o Caudal Fest, Sanfroidance, Espazo hip hop, Electronic Lucus Fest…

Se falamos de outono e de Ourense, seguro que nos vén o recordo do cheiro das castañas asadas. Aquí, vivir o outono é vivir o magosto. Onde máis se celebran en Galicia, é onde máis castañas hai, claro, no sur da provincia de Lugo e na provincia de Ourense.

En Ourense, o día de San Martiño, 11 de novembro, é a gran festa do magosto, onde se asan castañas, chourizos e se bebe viño tinto novo. A xolda vívese nos barrios, no parque da Alameda e nos montes da contorna. Hai outros sitios con moita castaña e moito magosto, como Castro Caldelas, Chaioso de Maceda, Allariz, Castroverde, Marín, Moaña, Riós. Por certo, que en Riós, xúntase a mellor castaña co mellor cogomelo, e mesmo fan unha festa da castaña e o cogomelo.

E xa que sae o cogomelo a relucir, temos que dicir que a micoloxía vai collendo forza no turismo outonal. Cada vez hai máis rutas de sendeirismo para recoller setas. Iso si, antes de saír de excursión, cómpre documentarse a fondo sobre esta actividade, para non cometer erros fatais. Sempre podemos acudir a algunha asociación micolóxica, seguro que encantada de axudarnos.

Xa temos o cesto, o coitelo e o coñecemento? Pois camiñando. As principais rutas para atopar bos  cogomelos están no Courel, nas fragas de Folgoso e Seoane e a Devesa da Rogueira; na Ribeira Sacra; na Pena Folenche, na Pobra de Trives; na serra do Suído; no monte de Castrove; na contorna do lago Castiñeiras; na fraga de Catasós; na Serra da Capelada; na serra do Xistral e no monte Xalo.

No concello da Estrada, A Estrada micolóxica, ademais de programar charlas sobre o tema (o 6 de outubro e 3 de novembro), organiza saídas ao monte moi interesantes, xa que nos acompañan expertos na materia (8 e 22 de outubro, 5 e 18 de novembro e 3 de decembro). (Ollo cos gnomos!).

A cita era na praza do Obradoiro pasado o mediodía, onde a música xa estaba presente desde as dez e media, caldeando o ambiente. Empezaban a reunirse os participantes, tinguindo de cor esta mañá algo anubrada, mentres o público se amoreaba tralos valados.

Desde aquí, entre o son de gaitas, tambores e chocas, partiu a comitiva. O itinerario levaríana polo casco histórico: rúas de Fonseca, do Vilar, praza e cantón do Toural, rúa de Xelmírez, Cinco rúas, rúa do Preguntoiro, praza de Cervantes, rúa da Acibechería e praza da Inmaculada, até volver á praza do Obradoiro, principio e fin da festa.

E entón, arrimados ás fachadas das casas, puidemos respirar de cerca os entroidos de Vilaboa, de Verín, de Viana do Bolo, de Xinzo de Limia, dos Xenerais da Ulla, dos volantes de Chantada, das Bonitas de Sande, dos Vellaróns de Riós, das máscaras de Samede, dos Galos da Mezquita, dos Follateiros de Lobios e das Madamitas e Madamitos de Entrimo. Cada grupo, cun cartel co seu nome, para poder identificalos. Preparado todo o mundo? Deixen paso, que comeza o espectáculo!

Unha marea colorida inundou os vellos barrios composteláns, alumando as pedras e arrancando risos, bailes e ganas de entroidar, e iso que ninguén ía disfrazado. Os ecos das músicas e das chocas rebotaban nos soportais, meténdonos o ritmo da tradición.

Desfilaron as pantallas de Xinzo de Limia co seu balbordo, chimpando ao son dos ruidosos globos que batían sen parar. Non globos correntes, senón feitos de vexiga de vaca. Por se non metesen bulla dabondo, as campaíñas dos cintos axudaban cos agudos. As pantallas impoñen, con esa máscara que lembra ao demo, a cresta enroscada toda decorada e a capa curta ben colorida.

Tivemos coidado de non nos adiantar moito cando apareceron os cigarróns de Verín, que viñan zurrando coa zamarra. Con esas caretas e mitras pintadas, brincando con enerxía, estes señores con bigote e garabata tamén fixeron balbordo dabondo coas chocas do cinto, vaia que sí.

E logo, ese potente son de tambores de onde saía? Pois andaban a marcar o ritmo do grupo de Viana do Bolo, que celebra un dos entroidos máis antigos de Galicia. Os boteiros do Bolo levaban unha escura máscara de madeira que metía medo, en contraste co traxe multicolor e cun elevado tocado que debuxaba coloridas formas no aire, feito a base de arame, cartón e papeis de cores. Tamén levaban chocas, e unha moca para dar paso aos folións. Vaia se brincaron!

Os Xenerais da Ulla cabalgaron solemnes polas rúas históricas de Santiago, metidos de cheo no seu papel. Os cascos dos cabalos xa resoaban na pedra do chan compostelán, anunciándoos, e por fin chegaron! Relucentes galóns, pasamanaría dourada, espadas, insignias, medallas… Moitos penachos de cores, mesmo, no curuto do sombreiro, plumas de pavo real, vaia luxo! E os cabalos, adornados coas súas mellores galas entroideiras.

As madamas e os galáns do entroido de Cobres, en Vilaboa, déronlle un toque elegante ao desfile. Ían a cara descuberta e con moitísimos colares. O máis espectacular, os sombreiros, cheos de adornos de cores (flores, plumas, anacos de espello…). Desde logo, hai que entrenar para levar ese peso enriba…

Chegou un momento no que non se sabía se debaixo dos disfraces habería persoas, realmente. Quen eran estes animais con cornos, cubertos de pelicas? Tiñan que ser os peliqueiros do entroido ribeirao, que coa correa de coiro abrían paso aos volantes de Chantada. Os volantes parece que levasen unha sombrilla sobre a cabeza chea de fitas de cores pendurando dela, e con adornos no alto. Este volante é incansable, xira e xira e salta co son dos chocallos, como un remuíño de cor.

As Bonitas de Sande pasearon máis tranquilas, camiñando ao son da gaita. Levaban un sombreiro de madeira ben curioso, adornado con plumas de galiñas, panos e fitas de cores. As caretas eran de tea de arame, cos ollos, cellas, boca e fazulas pintados por riba. Completaban a vestimenta con camisa e garabata, pantalón branco e saia de cores, mantóns de Manila, e polaina negra con axóuxeres. E ollo, ían armadas cunha vara de vimbio. Acompañábaas unha vaca e un oso.

“Vello, vello, vellarrón, mete os cartos no bolsón!”, vaia lema levaban os Vellaróns de Riós na pancarta. Facían un conxunto moi uniforme. Todos coa súa enorme careta de cartón, cun gran nariz e barba de lá ovelleira, e un traxe con moitísimas fitas e flocos de cores, o mesmo que o sombreiro. Mais coidadiño, que ían dándolle ao látigo, habería que agochar ben os cartos, non fose o demo…

Aqueloutros que ían desfilando, de cando en vez parábanse a bailar. Eran as máscaras de Samede, moi elegantes, con sombreiros de plumas e fitas, mantón de Manila e castañolas, que bailaban a muiñeira cruzada mentres os vixigueiros, ou contrarios, vestidos con farrapos, andaban polo medio trouleando. Tamén desfilaron os carolos, personaxes vestidas todas de branco coa cara cuberta cun cesto e… un oso xigante!

Deseguida adiviñamos quen eran os Galos da Mezquita. Levaban antiface, traxe multicolor, caxata na man e, o máis importante, sombreiro con forma de galo, de moitas cores. O andar parsimonioso, de señores galos camiñando co seu bastón, de súpeto víase alterado por algún deles, que animaba ao persoal cun quiquiriquí e unha carreira.

Desde logo, hai que tomar nota dos traxes dos Follateiros de Lobios, os máis ecolóxicos e reciclables de todos. Amarelearon as rúas, inconfundibles, coas roupas cubertas de follatos, e cintos e corpiños adornados cos carozos das mazarocas. Mesmo as caretas estaban feitas de cartón con grans de millo pegados de distintas cores. Os conxuntos máis traballados até levaban complementos de follatos a xogo: colares, petos…

E un toque de glamour ou, máis ben, unha bulra deste, que para iso é o entroido, da banda das Madamitas e Madamitos de Entrimo. Elas coas súas enaguas brancas con bordados e encaixes, sombreiros de palla con cintas e veo, e máscara branca. Eles, a xogo, con sombreiro de cornete, fitas de cores e unha capiña no ombreiro. Moi conxuntados en brancos e vermellos, daba gusto velos.

Despois de máis dunha hora de percorrido pola zona vella de Santiago, as figuras máis ancestrais do noso entroido volveron á praza do Obradoiro de retirada, acollidas por un público satisfeito que aproveitaba para sacar as últimas fotos. Agora, toca recuperar forzas para vivir o entroido en febreiro e, despois, en setembro outra vez. Até o ano que ven!

Este proxecto nace como iniciativa de  Thinking Up Events, a Xunta de Galicia, Xacobeo 21-22, Fundación “A Caixa” e o apoio de Sargadelos. O principal fin desta proposta é servir como vehículo de coñecemento e divulgación do Camiño de Santiago e da cultura galega, e que ademais, é apta para todos os públicos.

Unha función con moita personalidade

Inventio é unha posta en escena con ecos de cinema futurista nunha atmosfera máxica e vangardista, que enxalza a paisaxe, os costumes, a arte, a música e a arquitectura de Galicia. Un equipo de bailaríns, artistas de circo e ilusionistas, baixo a dirección creativa do mozo galego Martín Varela e do dramaturgo José L. Prieto, actuarán para plasmar esta viaxe da transformación interna do peregrino e a procura da sensibilidade

Ambientada no ano 2094, a misión dos protagonistas é recuperar as raíces da cultura galega no último Xacobeo do século, cando o Camiño desaparece de forma misteriosa. Con todo,  Inventio non está baseada na tradición histórica do Camiño, senón que se centra nas futuras xeracións que marcarán a identidade da cultura galega.

Para crear este universo distópico, os creadores de Inventio inspiráronse en grandes historias como “The Things To Come” (1936), de William  Cameron Menzies e  H.G. Wells, ou “2001, Odisea no espazo” (1968), de Kubrick. Mesmo pode apreciarse a influencia das escenografías para teatro de Bob Wilson ou os dous “Blade  Runner” de Denis  Villeneuve e Ridley  Scott.

Inventio recibirá a todo tipo de públicos, aproximando aos espectadores as pegadas do Camiño na cultura galega, do mesmo xeito que a súa influencia ao longo da historia en famosos autores como Cunqueiro, Cervantes, García Lorca ou Valle-Inclán.

As entradas estarán dispoñibles a través da páxina web www.inventio.gal a partir do mércores 6 de abril. O calendario da xira galega, sen contar as datas e espazos de España e Portugal que quedan por anunciar, é o seguinte:

Calendario

30 de setembro, 1 e 2 de outubro: Teatro Jofre de Ferrol

7, 8 e 9 de outubro: Auditorio de Galicia de Santiago de Compostela

5 e 6 de novembro: Auditorio Gustavo Freire de Lugo

11, 12 e 13 de novembro: Pontevedra, recinto por confirmar

2 e 3 de decembro: Auditorio Municipal de Ourense

3, 4 e 5 de xaneiro: Auditorio Mar de Vigo

13 e 14 de xaneiro: Teatro Colón da Coruña