A provincia conserva algunhas das vilas históricas máis singulares de Galicia. Allariz, Ribadavia, Vilanova dos Infantes, Castro Caldelas e Monterrei ofrecen cinco formas diferentes de achegarse a aquel tempo no que reis, nobres, comerciantes, peregrinos e labregos deixaron a súa pegada no territorio.

Allariz: unha vila ligada aos reis

Á beira do río Arnoia, Allariz é un dos grandes conxuntos históricos da provincia. A súa importancia medieval está vinculada, entre outras cousas, á súa condición de sede da corte do Reino de Galicia.

Chegar á vila pola Ponte de Vilanova, do século XIII, é xa unha forma de entrar na súa historia. Ao outro lado da ponte aparecen as rúas do casco histórico, as antigas igrexas románicas e as casas que conservan o trazado da antiga vila medieval.

O paseo pode continuar xunto ao Arnoia, onde o patrimonio se mestura con antigos muíños, fábricas de curtumes e outras construcións que lembran a importancia que tiveron durante séculos os oficios vinculados ao río.

Allariz permite así descubrir unha Idade Media que non se atopa unicamente nos castelos, senón tamén nas rúas, nas igrexas e na relación da vila coa auga.

Ribadavia: entre castelos, viño e memoria xudía

No corazón do Ribeiro atopamos Ribadavia, unha vila cuxa historia medieval está estreitamente relacionada co comercio e coa presenza dunha importante comunidade xudía.

O seu casco histórico conserva un entramado de rúas estreitas, prazas e casas que convidan a perderse sen présa. A antiga xudaría, A Alxama, constitúe un dos espazos máis interesantes para descubrir esa parte da historia da vila.

O castelo dos Sarmiento, situado no propio casco histórico, lembra ademais o poder dos señores que dominaron estas terras. Aínda que do recinto orixinal só se conservan algúns elementos, aínda podemos recoñecer restos das súas murallas, torres e antigas portas.

E para completar a viaxe por Ribadavia, nada mellor que achegarse ao Ribeiro, un territorio no que o viño, a paisaxe e a historia levan séculos camiñando xuntos.

Vilanova dos Infantes: unha pequena vila detida no tempo

En Celanova atopamos un deses lugares que sorprenden precisamente pola súa escala. Vilanova dos Infantes conserva un dos conxuntos medievais máis singulares de Galicia, cunha rede de pequenas rúas empedradas e casas de granito que se adaptan ao terreo.

A súa imaxe máis recoñecible é a Torre de Vilanova, único vestixio do antigo castelo que dominaba a vila. A fortaleza foi destruída durante as revoltas irmandiñas, pero a torre permanece como testemuño daquel pasado.

Pasear polas súas prazas, descubrir as antigas fontes ou achegarse ás adegas escavadas na rocha permite imaxinar a vida cotiá dunha pequena comunidade medieval.

É, quizais, unha desas visitas nas que non cómpre buscar grandes monumentos para sentirse parte da historia.

Castro Caldelas: unha vila arredor dun castelo

En plena Ribeira Sacra ourensá, Castro Caldelas érguese sobre unha elevación desde a que domina o val do río Edo. O seu casco histórico conserva un marcado carácter medieval, con rúas estreitas e empedradas que conducen ata o seu gran protagonista: o castelo.

A fortaleza foi construída no século XIV e conserva torres, murallas, patio de armas e outros elementos que permiten comprender como eran estes recintos defensivos. A historia do castelo tamén está ligada ás revoltas irmandiñas do século XV, cando sufriu importantes danos antes de ser reconstruído.

Pero Castro Caldelas é moito máis ca a súa fortaleza. As casas brasonadas, as galerías e as rúas que soben cara ao castelo forman un conxunto no que aínda resulta doado recoñecer a estrutura dunha antiga vila medieval.

E desde o alto, a paisaxe da Ribeira Sacra lembra por que este lugar tivo durante séculos unha importancia estratéxica.

Monterrei: unha fortaleza sobre o val do Támega

A viaxe remata no sur de Ourense, nun dos grandes conxuntos fortificados de Galicia. Monterrei érguese nunha posición elevada desde a que domina o val do Támega e as terras próximas á fronteira con Portugal.

A fortaleza ten as súas orixes na Idade Media e foi medrando co paso dos séculos ata converterse nun gran conxunto defensivo e residencial. Torres, murallas, igrexa, hospital de peregrinos e outros edificios forman unha auténtica acrópole desde a que se entende a importancia estratéxica deste territorio.

Pero Monterrei tamén foi un lugar de cultura. Entre os seus muros funcionou unha imprenta e en 1494 imprimiuse alí o Missale Auriense, considerado o primeiro libro impreso en Galicia.

Hoxe, percorrer o recinto e contemplar desde as súas murallas o val do Támega é achegarse a unha parte fundamental da historia de Galicia.

Cinco vilas para descubrir a Galicia medieval

Allariz, Ribadavia, Vilanova dos Infantes, Castro Caldelas e Monterrei mostran cinco formas diferentes de entender a Galicia medieval.

Vilas de reis e comerciantes, antigas xudarías, pequenas vilas fortificadas, castelos señoriais e grandes fortalezas fronteirizas. Cada unha conserva unha parte daquela historia e, ao mesmo tempo, unha forma diferente de relacionarse coa paisaxe que a rodea.

O mellor é que este patrimonio non está encerrado nos museos. Descóbrese camiñando por unha rúa empedrada, cruzando unha ponte, entrando nunha igrexa, subindo ata unha torre ou simplemente contemplando desde o alto o val que durante séculos estivo baixo a mirada dos seus habitantes.

Porque en Ourense a Idade Media non só se estuda: tamén se pode percorrer.

Anímaste a emprender esta viaxe pola Galicia medieval?

Da histórica Ponte do Burgo ás formas vangardistas das Correntes, pasando pola Barca ou polos Tirantes, cada unha conta unha parte da evolución de Pontevedra. E o mellor, podemos descubrila dando un paseo xunto ao río, entre o casco histórico, as zonas verdes e algunhas das paisaxes máis agradables da cidade.

O Burgo: onde comeza a historia

Se queremos comezar este percorrido, o mellor punto de partida é a Ponte do Burgo.

A historia de Pontevedra está estreitamente vinculada a este lugar. Unha antiga ponte de época romana, coñecida como Ponte Veteri, está na orixe do nome da cidade, aínda que non se conservan restos daquela primeira ponte. As escavacións realizadas na contorna permitiron localizar, porén, vestixios romanos e a fábrica da ponte medieval, que foi construída no século XII.

A ponte que vemos hoxe é froito de numerosas reformas realizadas ao longo dos séculos. Os seus once arcos visibles, a pedra e a súa situación xunto ao casco histórico convértena nunha das imaxes máis recoñecibles de Pontevedra.

Ademais, forma parte do Camiño Portugués a Santiago. As vieiras que aparecen na ponte lembran aos peregrinos que durante séculos cruzaron o Lérez no seu camiño cara a Compostela.

Podemos deternos aquí e descubrir tamén a contorna arqueolóxica do Burgo, onde se conservan restos da antiga muralla, un peirao do século XV e outros elementos que axudan a entender a importancia que tivo este espazo na historia da cidade.

A Barca: unha ponte con historia mariñeira

Seguindo o río cara á ría atopamos a Ponte da Barca, cuxo nome lembra precisamente as embarcacións que durante séculos permitiron cruzar o río neste punto.

No século XIX construíuse aquí unha ponte de madeira cunha parte levadiza para facilitar o paso das embarcacións cara aos peiraos próximos ao Burgo. A estrutura foi substituída posteriormente por unha nova ponte, rematada en 1905, cuxa parte central metálica aínda forma parte da imaxe actual.

A súa historia lémbranos que as pontes non só servían para comunicar as dúas beiras. Tamén estaban ligadas á actividade portuaria, ao comercio e á relación de Pontevedra co mar.

E desde aquí podemos contemplar unha das estampas máis características da fronte fluvial da cidade, co río abríndose cara á ría.

Os Tirantes: cando Pontevedra mira cara ao futuro

Deixamos atrás as pontes históricas e continuamos o paseo xunto ao Lérez ata atoparnos cunha estrutura completamente diferente.

A Ponte dos Tirantes foi inaugurada en 1995 e marcou un cambio na imaxe urbana de Pontevedra. Deseñada por Leonardo Fernández Troyano e Javier Manterola, conta cunha torre de formigón de 63 metros de altura da que parten 17 pares de tirantes que sosteñen o taboleiro.

A súa presenza resulta especialmente rechamante xunto ao río e ao Pazo da Cultura e o recinto feiral, formando un dos conxuntos de arquitectura contemporánea máis recoñecibles da cidade.

Pero a visita non remata ao cruzala. A zona permite continuar o paseo polas sendas que seguen o curso do Lérez e achegarse á Illa das Esculturas, un espazo no que natureza, arte e paisaxe se atopan ás beiras do río.

É unha boa mostra de como Pontevedra converteu os seus espazos fluviais en lugares para camiñar e gozar da cidade.

As Correntes: unha ponte para camiñar, pedalear e mirar

A última gran ponte deste percorrido é tamén a máis recente. A Ponte das Correntes inaugurouse en 2012 e destaca polos seus dous grandes arcos metálicos e polo seu deseño pensado para diferentes formas de mobilidade.

Conta con catro carrís para vehículos, un carril bici e espazos peonís cubertos, conectando as dúas beiras do Lérez. A súa estrutura de arco, ademais, dialoga visualmente coas formas da Barca e do Burgo.

Pero quizais o máis interesante para quen visita Pontevedra sexa que esta ponte non só serve para chegar ao outro lado. Os seus percorridos peonís permiten achegarse ao río e contemplalo desde unha perspectiva diferente.

E se facemos o paseo ao caer a noite, as pontes convértense en protagonistas doutra Pontevedra. A iluminación do Burgo e das Correntes crea reflexos sobre o Lérez e engade unha nova dimensión a este percorrido.

Un paseo entre pontes, río e cidade

Unha das mellores formas de descubrir Pontevedra é precisamente seguir o Lérez e deixar que as pontes marquen o camiño.

Podemos comezar no Burgo, achegarnos ao casco histórico, continuar cara á Barca e seguir ata os Tirantes e as Correntes. Entre unha ponte e outra aparecen prazas, rúas empedradas, zonas verdes, edificios históricos e espazos para sentar á beira do río.

Tamén podemos desviarnos cara o centro histórico e percorrer algúns dos lugares vinculados ao Camiño Portugués. Desde a praza da Peregrina, o itinerario atravesa o corazón da cidade ata chegar ao río e ao Burgo, nun percorrido que combina patrimonio, peregrinación e paisaxe urbana.

Así, as pontes deixan de ser simples puntos de paso e convértense nunha maneira diferente de coñecer Pontevedra.

Pontevedra, unha cidade entre dúas beiras

Máis de trescentas pontes atravesan ríos e regatos no conxunto do concello de Pontevedra, pero as que cruzan o Lérez ao seu paso pola cidade permiten facer unha viaxe especialmente interesante pola súa historia.

O Burgo fálanos das orixes e do Camiño de Santiago. A Barca lembra a relación co porto e co mar. Os Tirantes representan a chegada dunha nova arquitectura e as Correntes mostran unha cidade que continúa transformando os seus espazos fluviais.

Catro pontes, catro momentos e un mesmo río.

Porque cruzar Pontevedra é tamén descubrir como unha cidade soubo medrar arredor da auga, conservar a súa memoria e converter as súas beiras en lugares para pasear, atoparse e gozar.

Anímaste a cruzala?

É o momento perfecto para poñer as botas, coller un camiño e descubrir como cada territorio vive a súa propia transformación. Desde as montañas de Lugo ata os canóns do Sil, pasando polas fragas atlánticas ou os bosques de abeleiras e bidueiros, Galicia ofrece moitas formas diferentes de gozar do outono.

Ancares e Courel: o outono nas montañas

Na Galicia oriental, Os Ancares e O Courel concentran algúns dos bosques máis singulares da comunidade. A Fraga da Marronda, Cruzul e Agüeira, Os Ancares e a Devesa da Rogueira son algunhas das rutas que permiten internarse nestas paisaxes.

Aquí os carballos, castiñeiros, bidueiros e outras especies caducifolias ofrecen no outono unha extraordinaria variedade de cores. A Devesa da Rogueira destaca pola súa diversidade, mentres que na Fraga da Marronda podemos atopar, entre moitas outras especies, as faias situadas no extremo máis occidental de Europa.

É un territorio para camiñar sen présa, entre montañas, regatos e aldeas tradicionais.

Manzaneda e Trevinca: bosques de montaña

Nas montañas de Manzaneda e Trevinca, a paisaxe cambia coa altitude. As rutas das Reboleiras do Navea, o Souto de Rozavales e o Teixedal de Casaio permiten descubrir diferentes tipos de bosque nun territorio marcado polas grandes alturas e os vales profundos.

O outono é unha boa época para percorrer estes espazos e contemplar como as árbores caducifolias van transformando a paisaxe, mentres os bosques se mesturan coas montañas de Ourense.

Ribeira Sacra: bosques entre viñedos e mosteiros

Na Ribeira Sacra, o outono ten unha cor especial. Os bosques acompañan o Canón do Sil e mestúranse cos viñedos cultivados en bancais, creando unha paisaxe na que verdes, ocres e dourados conviven coas paredes de rocha e o río.

Algunhas das mellores rutas son as que percorren Santo Estevo de Ribas de Sil, Santa Cristina de Ribas de Sil ou o Bidueiral de Montederramo, un dos bosques de bidueiros mellor conservados de Galicia.

En Santo Estevo, o bosque de ribeira combina especies de carácter atlántico con vexetación mediterránea, mentres carballos e castiñeiros acompañan o mosteiro. En Santa Cristina, miles de castiñeiros cobren as ladeiras do Canón do Sil e crean un escenario especialmente fermoso cando chega o outono.

Fragas do Eume: un bosque onde o verde tamén cambia

As Fragas do Eume son un dos grandes bosques atlánticos de Galicia. O río Eume atravesa un val profundo acompañado por carballos, castiñeiros, bidueiros, ameneiros e grandes fentos.

No outono, as follas caducas engaden amarelos e ocres á espesura, mentres o bosque conserva boa parte do seu característico verde. Os camiños permiten descubrir o río, antigos muíños e o mosteiro de Caaveiro, integrado na paisaxe.

Unha das rutas que paga a pena facer é a dos Cerqueiros, un percorrido circular de 8 quilómetros que se interna na fraga e se achega tamén ás beiras do encoro.

O Xurés: un bosque na fronteira

No suroeste de Ourense, o Parque Natural Baixa Limia-Serra do Xurés ofrece unha paisaxe diferente, na que os bosques conviven con grandes formacións graníticas, ríos, fervenzas e vales de montaña.

É un territorio compartido coa veciña Portugal a través do Parque Nacional da Peneda-Gerês, formando a Reserva da Biosfera Transfronteiriza Gerês-Xurés.

Aquí o outono pódese combinar con rutas, paisaxes de montaña e mesmo un baño termal nas augas do río Caldo.

E tamén hai bosques xunto ao mar

A paisaxe forestal galega non remata nas montañas. En Cortegada, no corazón da ría de Arousa, atopamos un bosque de loureiros centenarios que converte a illa nun espazo singular.

E na Mariña lucense, o Souto da Retorta é coñecido como o bosque dos xigantes, mentres que en Lalín, a Fraga de Catasós ofrece un pequeno percorrido entre carballos e castiñeiros monumentais, un paseo alfombrado de follaxe. Unha imaxe perfecta para esta época do ano.

Unha paleta de cores para percorrer Galicia

Montañas, ríos, canóns, illas e vales. O outono transforma cada bosque dunha maneira diferente e ofrece unha boa escusa para saír a camiñar e descubrir Galicia a outro ritmo.

Ocres nos castiñeiros, amarelos nos bidueiros, verdes nas fragas e tons avermellados que aparecen entre as árbores. Cada camiño ten a súa propia paleta.

Só precisamos unhas botas cómodas, algo de tempo e ganas de deixarnos levar pola paisaxe.

Porque hai bosques que merecen ser visitados en calquera estación, pero no outono Galicia convértese nunha auténtica paleta de cores.

Anímaste a descubrila?

Froxán, Seceda ou Vilamor son algúns dos mellores exemplos.

Cando a montaña marca o xeito de construir

No Courel, construir significaba adaptarse ao relevo, ao clima e aos recursos da contorna.

As aldeas medran seguindo as formas do terreo, con casas agrupadas e pequenas rúas que soben e baixan entre as montañas. A lousa, abundante na zona, converteuse nun dos elementos fundamentais da arquitectura tradicional, presente nos muros e, sobre todo, nos tellados.

Froxán: unha aldea que conserva a súa esencia

Se hai unha aldea que permite entender esta relación entre arquitectura e paisaxe, esa é Froxán.

Situada no concello de Folgoso do Courel, conserva casas e construcións tradicionais agrupadas arredor de estreitas rúas empedradas que se adaptan ao terreo. A aldea está declarada Ben de Interese Cultural pola súa importancia etnográfica.

Ao seu redor aparecen soutos centenarios, parcelas de cultivo e prados. Aquí, a natureza non é un escenario separado da aldea: forma parte da súa propia historia.

Seceda e Vilamor: dúas formas de descubrir O Courel

Seceda conserva tamén a esencia da arquitectura tradicional courelá, baseada na pedra, a madeira e a lousa. Rodeada de vexetación e soutos de castiñeiros, percorrer as súas rúas permite comprender como as casas se integraban no territorio e como cada elemento respondía ás necesidades da comunidade.

En Vilamor, as casas de cachotaría de lousa, os tellados do mesmo material e as balconadas de madeira volven mostrar esa adaptación á montaña. Ademais, os camiños da contorna permiten achegarse á fervenza de Vilamor, ao río Lor e ás paisaxes que rodean a aldea.

Un patrimonio feito de pequenas cousas

A arquitectura tradicional do Courel non se limita ás casas. Ao longo da paisaxe aparecen sequeiros, alvarizas, fornos, hórreos e outras construcións vinculadas ao traballo agrícola e gandeiro.

Son pequenas pegadas dunha forma de vida na que a montaña marcaba os ritmos do día a día e boa parte do necesario se obtiña do propio territorio.

Unha Galicia que aínda podemos percorrer

Quizais o máis especial do Courel sexa que esta arquitectura non vive separada da paisaxe. As casas seguen a formar parte das aldeas, os soutos rodean os camiños e as montañas continúan sendo o gran escenario natural deste territorio.

Percorrer Froxán, Seceda ou Vilamor é achegarse a unha forma de vida que soubo adaptarse durante xeracións a un dos territorios máis singulares de Galicia.

Se buscas unha Galicia tranquila, de camiños estreitos, bosques, pedra e lousa, O Courel agárdate.

Anímaste a descubrir esta Galicia que parece doutro tempo?

Das Rías Baixas ás montañas de Lugo e ás paisaxes da Ribeira Sacra, propoñémosche descubrir cinco vilas de Galicia cun encanto especial. Lugares para percorrer sen présa, gozar das súas paisaxes e descubrir algunhas das mellores mostras da identidade galega.

Combarro: unha vila de pedra fronte ao mar

En plena ría de Pontevedra, Combarro conserva un dos conxuntos de arquitectura mariñeira máis singulares de Galicia. As súas rúas empedradas, casas tradicionais, cruceiros e soportais descenden cara ao mar, mentres máis de trinta hórreos de pedra se aliñan xunto á costa.

Un paseo desde a praza de San Roque ata a praia de Padrón permite descubrir esta paisaxe de pedra e mar, ademais de coñecer como estes hórreos estaban vinculados á vida cotiá e ao traballo das familias mariñeiras. Un recuncho das Rías Baixas que parece detido no tempo.

O Cebreiro: unha vila entre montañas e lendas

Nas montañas de Lugo, O Cebreiro recibe o visitante coas súas construcións tradicionais e a súa paisaxe de montaña. As súas pallozas, antigas vivendas de orixe prerromana adaptadas ás condicións climáticas da zona, forman xunto co santuario de Santa María a Real un dos conxuntos máis característicos do Camiño de Santiago.

Ademais do seu patrimonio, O Cebreiro ofrece unha experiencia ligada ao Camiño Francés. Chegar ata este pequeno núcleo, especialmente cando a néboa envolve as montañas, permite descubrir unha desas paisaxes galegas nas que a tradición e a natureza parecen formar parte dunha mesma historia.

Redes: unha pequena vila mariñeira con aire cubano

Á beira da ría de Ares, Redes conserva o encanto dunha pequena vila mariñeira, con casas de cores, rúas tranquilas e unha estreita relación co mar. A súa arquitectura reflicte tamén a pegada da emigración galega a América, especialmente a Cuba, visible nalgunhas das súas construcións.

Pasear por Redes é descubrir un recuncho onde a paisaxe da ría se mestura coa arquitectura tradicional e as antigas formas de vida vinculadas á pesca. Un lugar pequeno e tranquilo, perfecto para gozar de Galicia sen présa.

Allariz: historia ás beiras do Arnoia

Á beira do río Arnoia, Allariz combina patrimonio, natureza e tradición. O seu casco histórico, con rúas empedradas e edificios de pedra coidadosamente rehabilitados, invita a pasear e descubrir lugares como o convento de Santa Clara ou os espazos do Parque Etnográfico do río Arnoia.

O paseo xunto ao río completa a visita e permite gozar doutra das características desta vila ourensá: a estreita relación entre o patrimonio e a paisaxe. Allariz é, así, un destino para camiñar, descubrir a súa historia e gozar dun contorno especialmente coidado.

Castro Caldelas: unha vila medieval arredor dun castelo

En plena Ribeira Sacra, Castro Caldelas conserva un casco histórico de trazado medieval, con rúas empedradas, casas de pedra, galerías e escudos. Na parte alta atópase a fortaleza dos Condes de Lemos, un dos grandes símbolos da localidade e unha visita imprescindible.

Desde a vila, a paisaxe da Ribeira Sacra completa a experiencia, co río Sil, os viñedos en socalcos e outros atractivos patrimoniais nas súas proximidades. Un lugar onde a historia parece seguir presente en cada rúa e onde a paisaxe forma parte inseparable da visita.

Cinco vilas, cinco formas de descubrir Galicia

Combarro, O Cebreiro, Redes, Allariz e Castro Caldelas mostran cinco caras diferentes de Galicia: a mariñeira, a montañosa, a indiana, a fluvial e a medieval. Cinco lugares para deixarse levar polas súas rúas, descubrir as súas historias e gozar deses pequenos recunchos que fan de Galicia un destino cheo de escenarios que parecen sacados dun conto.

Traémosche cinco propostas para gozar de Galicia en setembro e descubrir que o final do verán tamén é unha magnífica época para viaxar.

1. Percorre a Ribeira Sacra entre viñedos e mosteiros

Setembro ofrece unha ocasión especialmente atractiva para descubrir a Ribeira Sacra, cando as súas paisaxes de viñedos comezan a transformarse coa chegada da vendima.

Os canóns do Sil e do Miño, os bosques, os miradoiros e os antigos mosteiros conforman unha paisaxe única que invita a percorrer a zona con calma. Podes navegar polos canóns do Sil, visitar mosteiros como Santo Estevo de Ribas de Sil ou Santa Cristina de Ribas de Sil e descubrir algúns das vilas e miradoiros que se asoman aos ríos.

A combinación de natureza, patrimonio e paisaxe vitivinícola converte a Ribeira Sacra nunha das escapadas imprescindibles de Galicia en setembro.

2. Sube a un dos Trens Turísticos de Galicia

Viaxar en tren tamén pode ser unha forma diferente de descubrir Galicia. A tempada 2026 dos Trens Turísticos de Galicia inclúe propostas que permiten coñecer algunhas das paisaxes, espazos patrimoniais e recursos turísticos máis singulares da comunidade.

Durante setembro podes gozar, entre outras opcións, das Rutas dos Faros e das rutas do viño pola Ribeira Sacra do Sil e do Miño, ademais doutras experiencias vinculadas ao patrimonio e á cultura galega.

Unha maneira cómoda e orixinal de viaxar, deixando que a paisaxe pase a ser unha parte esencial da experiencia.

3. Reláxate nas augas termais de Galicia

Setembro tamén é un bo momento para facer unha pausa e gozar do termalismo galego.

Galicia conta cunha ampla oferta termal repartida polas súas catro provincias. Na Coruña, podes gozar de espazos como o Balneario de Carballo ou o Hotel Balneario de Compostela, en Brión; en Lugo, achegarte ás Termas Romanas de Lugo, Guitiriz ou Augas Santas, en Pantón; en Ourense, descubrir lugares como Arnoia, Laias, Lobios ou O Carballiño; e en Pontevedra, gozar das augas de Caldas de Reis, Cuntis, Mondariz ou Caldelas de Tui.

Un baño termal, un tratamento de benestar ou unhas horas de descanso poden converterse no plan perfecto para desconectar despois do verán e gozar dunha escapada centrada no benestar.

4. Descubre as cidades galegas sen présas

Setembro invita tamén a volver ás cidades e percorrelas con máis calma. Santiago de Compostela, A Coruña, Lugo, Ourense, Pontevedra, Vigo e Ferrol ofrecen propostas moi diferentes para gozar dunha escapada urbana.

Podes pasear polo casco histórico de Santiago de Compostela, contemplar a Torre de Hércules na Coruña, percorrer a muralla romana de Lugo, descubrir o patrimonio termal de Ourense ou perderte polas prazas e rúas do centro histórico de Pontevedra.

Museos, exposicións, patrimonio, cultura e gastronomía completan unha oferta urbana que permite descubrir outra Galicia, máis cultural e contemporánea, cando remata o verán.

5. Achégate á Galicia do viño

Setembro marca o comezo dunha das épocas máis especiais do calendario vitivinícola galego: a vendima.

As cinco denominacións de orixe de Galicia ofrecen paisaxes e formas de entender o viño moi diferentes. Desde Rías Baixas, O Ribeiro e Ribeira Sacra ata Valdeorras e Monterrei, cada territorio conta con variedades autóctonas, tradicións e paisaxes propias.

Visitar unha adega, camiñar entre viñedos, coñecer como se desenvolve a vendima ou participar nunha cata son algunhas das experiencias que permiten achegarse á cultura do viño e comprender a súa estreita relación co territorio.

Setembro é, polo tanto, un momento especialmente interesante para descubrir Galicia a través dos seus viños e das persoas que os elaboran.

Despois do verán, Galicia cambia de ritmo, pero non de posibilidades. Cinco plans para seguir gozando de Galicia en setembro e descubrir unha nova forma de viaxar polo destino.

Descubrir a viticultura heroica da Ribeira Sacra é achegarse a un dos sinais de identidade deste destino e comprender por que o viño forma parte inseparable da súa paisaxe e da súa cultura.

Que é a viticultura heroica?

A viticultura heroica é aquela que se desenvolve en condicións especialmente difíciles debido ás características do terreo.

Na Ribeira Sacra, as viñas distribúense en terrazas ou bancais para salvar as fortes pendentes das ladeiras, que poden chegar ata o 100 %. Esta configuración do terreo dificulta a mecanización e fai que boa parte dos traballos no viñedo teñan que realizarse de forma manual.

Aquí, as persoas son as principais ferramentas de traballo. Cada tarefa require esforzo, dedicación e un profundo coñecemento do terreo. Mesmo desprazarse entre as cepas pode converterse en todo un exercicio de equilibrio.

E é precisamente esta dificultade a que converte a viticultura da Ribeira Sacra nunha experiencia tan singular.

Territorio de Denominación de Orixe

A Denominación de Orixe Ribeira Sacra constituíuse en 1996 para protexer a orixe, garantir a calidade e promocionar os seus viños. Desde entón, a viticultura desempeñou un papel fundamental na recuperación de viñedos e paisaxes, convertendo o viño nun dos grandes motores económicos e turísticos da Ribeira Sacra.

O territorio vitivinícola organízase en cinco subzonas:

• Amandi
• Chantada
• Quiroga-Bibei
• Ribeiras do Miño
• Ribeiras do Sil

Cada unha forma parte dun mesmo territorio vitivinícola no que o cultivo da vide está profundamente condicionado pola paisaxe.

Ademais, desde 2011 o CERVIM conta cun selo específico para identificar este tipo de viticultura e a Ribeira Sacra é unha das poucas Denominacións de Orixe españolas que pode utilizalo.

Descubre a viticultura heroica durante a túa visita

Se estás pensando en viaxar á Ribeira Sacra, non te quedes unicamente coa imaxe das súas espectaculares paisaxes.

Detrás de cada ladeira de viñedos existe unha historia de esforzo e adaptación. Detrás de cada bancal hai unha forma de traballar a terra que se converteu nun dos grandes sinais de identidade do territorio.

Achégate ás súas paisaxes vitivinícolas, percorre as súas cinco subzonas e déixate sorprender por unha forma de cultivar a vide que desafía o vertixe.

Anímaste a descubrir a Ribeira Sacra?

A mellor maneira de entender a viticultura heroica é vivila de preto. Embárcate nesta ruta de 3 días polas terras da D.O. Ribeira Sacra, percorre os seus viñedos e déixate sorprender por un territorio onde o viño e a paisaxe se unen para ofrecer unha experiencia única.

O pasado 12 de agosto, Galicia viviu un deses momentos. A eclipse solar converteu o ceo en protagonista e milleiros de persoas reuníronse para contemplar como a Lúa ocultaba o Sol nun espectáculo extraordinario.

Pero a eclipse xa pasou. E quizais esa sexa precisamente unha boa razón para seguir mirando o ceo.

Porque Galicia ten moito máis que ofrecer a quen sente curiosidade pola astronomía. Nove destinos galegos contan coa certificación de Destino Turístico Starlight, un recoñecemento que distingue as súas excelentes condicións para contemplar as estrelas e o seu compromiso coa protección dos ceos nocturnos.

Anímaste a descubrilos?

Cando o ceo se converte en destino

O astroturismo invita a viaxar dunha maneira diferente: a deterse, afastarse das luces das cidades e deixar que os ollos se acostumen pouco a pouco á escuridade.

En Galicia, esta experiencia pode gozarse xunto ao mar, en illas atlánticas, entre montañas, nas paisaxes da Ribeira Sacra ou en territorios rurais onde a noite conserva aínda unha das súas grandes riquezas: un ceo escuro e cheo de estrelas.

Destinos Turísticos Starlight en Galicia

A Fundación Starlight, vinculada ao Instituto de Astrofísica de Canarias, certifica aqueles espazos que destacan pola calidade dos seus ceos e polo seu compromiso coa protección fronte á contaminación lumínica. Son lugares onde a observación das estrelas forma parte do patrimonio natural, paisaxístico, cultural ou científico e convértese tamén nun atractivo turístico.

Galicia conta con nove Destinos Turísticos Starlight: nove lugares excepcionais desde os que descubrir e gozar do noso ceo nocturno.

1. Parque Nacional das Illas Atlánticas de Galicia

Mirar as estrelas desde unha illa ten algo especial. Nas Illas Atlánticas, o océano rodea a paisaxe e a distancia respecto dos grandes núcleos urbanos favorece unhas condicións privilexiadas para contemplar o ceo nocturno.

Cíes, Ons, Sálvora e Cortegada ofrecen así unha experiencia na que mar, natureza e firmamento se atopan baixo unha mesma noite.

2. A Costa da Morte

Na Costa da Morte, o ceo forma parte dunha paisaxe xa de seu espectacular.

Aquí, a experiencia pode comezar contemplando o Atlántico desde un faro ou un cantil e rematar baixo un ceo estrelado. O contraste entre a inmensidade do océano e a do firmamento converte a noite nunha nova maneira de percorrer este territorio.

3. Trevinca

Nas montañas de Ourense, Pena Trevinca alcanza os 2.127 metros e ofrece unhas condicións excepcionais para a observación astronómica.

A altitude, a baixa contaminación lumínica e a amplitude da paisaxe fan deste territorio un dos grandes referentes do astroturismo galego. Un lugar onde erguer a vista permite descubrir constelacións, planetas e a Vía Láctea en todo o seu esplendor.

4. Muras

Na Serra do Xistral, Muras invita a gozar dunha noite diferente.

A escasa contaminación lumínica converte as súas paisaxes nun escenario privilexiado para observar as estrelas e achegarse á astronomía. Unha proposta perfecta para quen busca combinar natureza, tranquilidade e contemplación do firmamento.

5. Lalín

A relación de Lalín coa astronomía ten, ademais, nome propio: Ramón María Aller, unha das grandes figuras da astronomía galega.

O territorio permite descubrir esta vinculación coa ciencia mentres se goza dun ceo especialmente apropiado para a observación. Desde os seus espazos naturais, Galicia contémplase baixo unha perspectiva diferente: a dun territorio que tamén forma parte do universo que nos rodea.

6. Reserva de Biosfera Mariñas Coruñesas

A Reserva da Biosfera Mariñas Coruñesas incorpora o ceo nocturno a unha experiencia de natureza e territorio.

Aquí, observar as estrelas pode formar parte dunha viaxe na que tamén teñen cabida a paisaxe, a gastronomía, o patrimonio e o ecoturismo. Porque protexer o ceo nocturno significa tamén conservar unha parte esencial do patrimonio natural.

7. Reserva da Biosfera dos Ancares Lucenses e montes de Navia, Cervantes e Becerreá

Montañas, vales e pequenas poboacións definen a paisaxe dos Ancares Lucenses, un territorio onde a escuridade nocturna permite gozar dun firmamento especialmente atractivo.

O destino ofrece unha oportunidade para descubrir a montaña lucense cando cae o sol e entender que a natureza tamén ten unha dimensión nocturna.

8. Chantada

No corazón da Ribeira Sacra, o ceo atopa no Monte Faro un magnífico punto de observación.

Aquí, a contemplación das estrelas súmase a unha paisaxe marcada polos canóns do Miño e do Sil, os viñedos, os mosteiros e os miradoiros. Unha experiencia que demostra que un destino pode cambiar por completo cando chega a noite.

9. Fornelos de Montes e Oia – Galicia Suroeste

O suroeste galego ofrece tamén espazos privilexiados para mirar o firmamento. O territorio que une Fornelos de Montes e Oia suma paisaxe de montaña, costa e unha reducida contaminación lumínica para crear un escenario especialmente atractivo para o astroturismo.

É outra forma de descubrir o sur de Galicia, seguindo o percorrido das estrelas sobre un territorio que se estende desde o interior ata o Atlántico.

Moito máis ca unha eclipse

A eclipse lembrounos algo que quizais esquecemos demasiado a miúdo: abonda con levantar a mirada para descubrir un espectáculo extraordinario sobre as nosas cabezas.

Pero non cómpre esperar a que aconteza un gran fenómeno astronómico. Cada noite despexada é unha nova oportunidade para contemplar as estrelas, recoñecer constelacións, seguir o percorrido da Lúa ou simplemente gozar da escuridade.

Os nove Destinos Turísticos Starlight de Galicia fan posible vivir esa experiencia nalgúns dos espazos máis singulares da nosa comunidade. Anímaste a descubrilos?

Desde as espectaculares Rías Altas ata as apracibles augas das Rías Baixas, propoñémosche unha viaxe por estas paisaxes únicas para descubrir que fai especial a cada unha delas e que experiencias de turismo mariñeiro non podes perder ao longo deste percorrido polas rías galegas.

Rías Altas

As Rías Altas esténdense desde a desembocadura do río Eo ata a ría da Coruña. Cantís, praias salvaxes, vilas mariñeiras e portos pesqueiros debuxan un territorio onde o Cantábrico e o Atlántico amosan toda a súa forza.

• Ría de Ribadeo: porta de entrada a Galicia, destaca pola Praia das Catedrais e pola súa tradición pesqueira.
• Ría de Foz: combina extensas praias coa Basílica de San Martiño de Mondoñedo.
• Ría de Viveiro: casco histórico medieval, praia de Area e o Souto da Retorta.
• Ría do Barqueiro: pequeno porto mariñeiro e proximidade á Estaca de Bares.
• Ría de Ortigueira: zonas húmidas, Serra da Capelada e cabo Ortegal.
• Ría de Cedeira: acceso a Santo André de Teixido e aos cantís da Vixía Herbeira.
• Ría de Ferrol: patrimonio naval, castelos defensivos e un dos arsenais históricos máis importantes de Europa.
• Rías de Ares e Betanzos: Pontedeume, Redes, Sada e o Parque Natural das Fragas do Eume.
• Ría da Coruña: presidida pola Torre de Hércules, Patrimonio Mundial da UNESCO, combina o atractivo urbano da cidade con amplos paseos marítimos, praias como Riazor e Orzán e unha intensa tradición vencellada ao porto e ao mar.

Costa da Morte

Máis alá da ría de Muros e Noia, a Costa da Morte desprega un litoral de gran beleza, onde amplos areais alternan con cantís e pequenos portos pesqueiros. É un territorio marcado polas lendas mariñeiras e por unha fonda tradición vencellada ao mar.

• Ría de Corme e Laxe: praias, bancos marisqueiros e o faro de Punta Roncudo.
• Ría de Camariñas: terra de percebeiros, do encaixe de palillos e do cabo Vilán.
• Ría de Corcubión: porta de acceso ao cabo Fisterra, con vilas mariñeiras e un valioso patrimonio histórico.
• Contorna de Muxía e Fisterra: o santuario da Virxe da Barca, o faro de Fisterra e algunhas das paisaxes máis emblemáticas do litoral atlántico.

Rías Baixas

As Rías Baixas son sinónimo de augas tranquilas, praias de area branca, bateas e unha intensa actividade mariñeira. Aquí o turismo mariñeiro permite descubrir a pesca, o marisqueo e a acuicultura.

• Ría de Muros e Noia: transición cara ás Rías Baixas, con dúas vilas mariñeiras de gran valor histórico e unha importante tradición marisqueira.
• Ría de Arousa: a maior de Galicia, famosa polas súas bateas de mexillón, a Illa de Arousa, Vilanova de Arousa, Cambados, O Grove, Ribeira e Vilagarcía de Arousa.
• Ría de Pontevedra: Pontevedra, Combarro, Bueu e Marín, onde o patrimonio e a tradición mariñeira van da man.
• Ría de Vigo: protexida polas illas Cíes, combina o maior porto pesqueiro de Galicia con vilas como Cangas, Moaña e Baiona.

Anímate e déixate levar por unha viaxe entre rías, portos, tradicións mariñeiras e a mellor gastronomía do mar. Galicia agárdate. Anímaste a descubrila?

Propoñémosche cinco plans para aproveitar ao máximo as túas vacacións:

Entre praias, sendeiros costeiros e vilas mariñeiras

Quilómetros de costa, praias de area fina, pequenos portos pesqueiros e unha excelente gastronomía converten as Rías Baixas nun dos destinos favoritos de quen busca combinar natureza, cultura e mar.

Un percorrido pola península do Grove, A Illa de Arousa ou a ría de Muros e Noia permite descubrir calas resgardadas, paseos á beira do Atlántico e miradoiros desde os que contemplar a paisaxe. Despois dun día de praia, nada mellor que sentar fronte ao mar para degustar peixes e mariscos frescos acompañados por algún dos viños das denominacións de orixe galegas.

Navegar polos canóns da Ribeira Sacra

No interior, a Ribeira Sacra sorprende pola espectacularidade das súas paisaxes. Os ríos Sil e Miño escavaron profundos canóns cuxas ladeiras albergan viñedos cultivados desde hai séculos, mosteiros históricos e bosques que convidan a camiñar.

Un paseo en catamarán ou en kaiak ofrece unha perspectiva privilexiada desta paisaxe singular, mentres que as rutas de sendeirismo e os miradoiros permiten contemplala dunha forma única. Completa a experiencia visitando unha adega para coñecer de preto a tradición da viticultura heroica.

Descubrir o Parque Nacional Marítimo-Terrestre das Illas Atlánticas

As illas Cíes, Ons, Sálvora e Cortegada forman o único parque nacional de Galicia e constitúen un dos espazos naturais máis valiosos do litoral atlántico.

As súas praias, sendeiros sinalizados e ecosistemas protexidos converten estas illas nun destino ideal para quen desexa gozar da natureza en estado puro. Camiñar ata un faro, observar aves mariñas ou contemplar o océano desde algún dos seus miradoiros son algunhas das experiencias que fan de cada visita unha lembranza inesquecible.

A forza do Atlántico na Costa da Morte

A Costa da Morte ofrece unha paisaxe moldeada polo océano, onde faros, cantís e vilas mariñeiras narran séculos de historia vencellada ao mar.

Localidades como Fisterra, Muxía ou Camariñas convidan a percorrer paseos marítimos, descubrir tradicións artesanais e gozar dalgúns dos solpores máis espectaculares de Galicia.

Entre montañas e natureza en estado puro

As montañas convidan a descubrir unha contorna onde a natureza é a gran protagonista. Espazos como Os Ancares ou a Serra do Courel ofrecen bosques centenarios, ríos de augas cristalinas, vales e sendeiros que atravesan algunhas das paisaxes mellor conservadas do noroeste peninsular.

Aquí o verán vívese ao ritmo da montaña, camiñando entre carballeiras e soutos, descubrindo miradoiros naturais, respirando aire puro e gozando dunha biodiversidade excepcional.

Unha experiencia que se completa coa visita a pequenas aldeas de arquitectura tradicional e unha gastronomía elaborada con produtos locais.

Costa e interior, patrimonio e natureza, tradición e gastronomía. Galicia ofrece plans para todos os gustos e formas de viaxar, convertendo cada escapada nunha oportunidade para descubrir novas paisaxes e vivir experiencias auténticas. Que comecen as vacacións!