Que facer en Galicia a semana do 23 ao 29 de setembro

O mes de setembro apura os seus últimos días cunha extensa e variada proposta de actividades. Danzas tradicionais, teatro, pianos en plena rúa, curtametraxes, concertos e mesmo un festival pensado para os bebés conviven na axenda para os próximos días.

 

Danza das Espadas de Marín

29 de setembro. Marín

Coincidindo cos festexos en honra a San Miguel, a localidade de Marín escenificará este domingo a súa tradicional Danza das Espadas. Trátase dunha celebración que se remonta ao século XVII e que permite contemplar os bailes típicos do lugar. Goza da consideración de festa de interese turístico.

Máis información aquí

 

Festival Internacional Outono de Teatro

A partir do 28 de setembro. Carballo

Carballo reivindícase un ano máis como escenario teatral de referencia coa celebración do seu Festival Internacional Outono de Teatro (FIOT). Durante algo máis dun mes a localidade acollerá unha trintena de espectáculos (moitos deles, estreas absolutas ou en Galicia) e decenas de actividades, como a Rúa dos Contos, pensadas para o público máis diverso.

Máis información aquí

 

Piano Meeting

28 de setembro. Ourense

Catro pianos volverán tomar outros tantos espazos emblemáticos da cidade das Burgas este sábado grazas a un festival pensado para todos os públicos e aberto á participación activa. Haberá concertos, obradoiros e outras actuacións nos 4 escenarios de forma simultánea durante 10 horas.

Máis información aquí

 

Espazos Sonoros

29 de setembro. Rois

A cita semanal co ciclo Espazos Sonoros levaranos nesta ocasión ata o Pazo do  Faramello, en Rois. Os asistentes poderán participar nunha visita guiada ao recinto e, a continuación, gozar dun recital de fortepiano a cargo da intérprete compostelá Rosalía Gómez Lasheras. 

Máis información aquí

 

Vía Láctea, guía de peregrinos a Galicia

Ata o 26 de setembro. Santiago de Compostela

A exposición que recolle as fotografías nocturnas tomadas por Daniel Llamas e Daniel Lois despídese esta semana de Compostela. Pero antes de dirixirse a un novo emprazamento, o público disporá de varios días para achegarse ata o Pazo de Fonseca, gozar das estrelas e reflexionar sobre a relación entre a Vía Láctea e o Camiño.

Máis información aquí

 

Curtocircuíto

Do 28 de setembro ao 6 de outubro. Santiago de Compostela

A décimo sexta edición do Festival Internacional de Cinema de Santiago de Compostela, Curtocircuíto, xa está aquí. Durante case 10 días, o público poderá gozar dun extenso e interesante programa de proxeccións, actividades formativas e encontros con creadores como o fotógrafo Joan Fontcuberta.  

Máis información aquí

 

Festival das Núbebes

Ata o 29 de setembro. Pontevedra

Os bebés e nenos de ata 6 anos e as súas familias son os destinatarios do Festival das  Núbebes, que se celebra estes días en Pontevedra. O sábado 28 e o domingo 29 volverá haber espectáculos de maxia, teatro, contos e música en horario de mañá e tarde. 

Máis información aquí

 

Arzúa Ecolóxica

28 e 29 de setembro. Arzúa

A última fin de semana de setembro é sinónimo en Arzúa de agricultura sustentable. Exposición e venda de produtos ecolóxicos, obradoiros, conferencias e concertos forman parte do programa de actividades dunha cita que suma xa 16 edicións.

Máis información aquí

 

Festival Festeiro

28 de setembro. Ferrol

En Ferrol o curso universitario volverá arrincar con música. La Bien Querida, Airbag, Tachenko e Superglú amenizarán a nova edición do festival Festeiro, que se celebrará este sábado no campus ferrolán a modo de benvida para os seus estudantes.

Máis información aquí

 

 

Deixa unha resposta

O teu enderezo electrónico non se publicará Os campos obrigatorios están marcados con *