Vivir a Semana Santa en Galicia

Ademais das procesións e os actos relacionados coa data, a Semana Santa adoita ser para moitos a primeira paréntese de descanso despois das festas do Nadal. Uns días de respiro que se poden gozar no noso territorio, visitando e coñecendo pobos e cidades que viven estes días con intensidade. Seleccionamos algunhas das máis recoñecidas a nivel rexional e mesmo, internacional. Atento:

A Semana Santa de Ferrol

En Ferrol,vívese unha festa que xa conta co recoñecemento de Interese Turístico Internacional. Desde o Domingo de Ramos ata o de Resurrección, a xente sae á rúa para ver os pasos das súas cinco confrarías: Angustias, Dolores, Mercé, Santo Enterro e Soidade.

Aínda que se vive con fervor toda a festividade, destacan especialmente as procesións que saen o Venres Santo: Santo Encontro, Santo Enterro e a máis conmovedora, a dos Caladiños. Un paso que percorre o centro histórico da Magdalena, cos pasos de San Juan, Cruz de Sudario e a Virxe das Dores.

Para rematar, tampouco podemos pasar por alto a procesión do Santísimo Cristo da  Misericordia e María Santísima da Piedade, na que participan un total de 1.800 confrades, sete pasos, nove bandas de música, e que culmina co canto dos militares da Brilat. Case nada!

A Semana Santa de Viveiro

Rematamos coa Semana Santa de Viveiro na provincia de Lugo. Declarada Festa de Interese Turístico Internacional e unha das máis recoñecidas da comunidade galega, destaca principalmente pola súa antigüidade e pola súa impresionante imaxinería.

As procesións crean un ambiente íntimo nas rúas da localidade que seguro te conmoverá. Os actos máis destacados empezan o Xoves Santo coa procesión da Última Cea, cun paso creado en 1808 por un artesán e coa do Prendemento, moi vistosa polas túnicas e carapuchas dos confrades.

Recomendable é tamén a representación das caídas de Cristo, coa cruz ás costas, a Virxe, a Verónica e San Xoán buscándoo.

A Semana Santa de Paradela

No municipio de Meis, Pontevedra, celébrase a coñecida como Semana Santa de Paradela. Durante varios días escenifícanse algúns das pasaxes máis coñecidas da biblia como a Paixón, Morte e Resurrección de Cristo. Os veciños convértense en experimentados actores todos os anos para deleitar aos asistentes cunha actuación maxistral en plena rúa.

Con todo, para non perderse son as interpretacións do Xuízo de Xesús, a flaxelación, o  calvario e a crucifixión no Monte da Croa.

A Semana Santa de Mondoñedo

A Semana Santa mindoniense, na provincia de Lugo, é unha tradición que vai máis aló dos nosos días, pois data do século XVI. Unha Festa de Interese Turístico Galego que, ademais, destaca fronte a outras pola súa sinxeleza e sobriedade.

O punto central dos actos destes días, tanto litúrxicos como procesionais, é a Catedral de Mondoñedo. Desde este punto, poderase ver como saen procesións tan representativas como a do Santo Enterro ou a Soidade o Venres Santo. Non o dubides, porque pasar uns días rodeado de tradición, historia e recollemento, é todo un acerto.

A Semana Santa de Betanzos

No municipio coruñés de Betanzos, tamén se celebra unha Semana Santa de Interese Turístico. Comeza o venres anterior ao Domingo Santo cunha misa en honra á Virxe das Dores. A partir deste día, a música convértese en peza fundamental da festividade co recoñecido Ciclo de Música Sacra.

As rúas empedradas do centro histórico énchense de música e cantos practicamente de inicio a fin da Semana Santa.

A Semana Santa de Cangas

Tamén de Interese Turístico Galego, a Semana Santa de Cangas conta con pasos de importante valor histórico e artístico. O destacable neste caso, das súas procesións, son as imaxes articuladas como a do Nazareno da procesión do Santo Encontro ou o Cristo da cerimonia do Descendemento.

Sen dúbida, unha mostra de realismo para todos os que se achegan ata a localidade nestas datas. Ademais das procesións, a música das gaitas e os tambores que acompañan o paso lento dos costaleiros, achegan emoción e solemnidade ao encontro relixioso.

A Semana Santa de Santiago de Compostela

A Semana Santa Compostelá, que estrea a categoría de festa de interese turístico galego, é unha celebración de máis de sete días de actos nos que se inclúen concertos de música sacra, actos litúrxicos e por suposto, procesións.

Debemos destacar a do noso Pai Xesús Flaxelado, coñecida popularmente como ‘Caladiños Descalzos’, pois os confrades procesionan con pesadas cruces e con longas cadeas que arrastran cos pés descalzos. O que acentúa, máis se cabe, o dramatismo desta tradición.

Con todo, tampouco está de máis saber que a procesión do Santísimo Cristo da  Misericordia ou dos ‘Estudantes’, tamén goza dunha gran popularidade.

Festas do Santísimo Cristo en Fisterra

Nas proximidades da igrexa de Santa María das Areas, Fisterra vive a súa Semana Santa con especial fervor. Unha festa de Interese Turístico que seguro lembrarás polas escenificacións da Paixón de Cristo por parte dos veciños, a pasaxe evanxélica da resurrección de Xesús e por suposto, o ambiente que se crea cos milleiros de asistentes á festividade.

Ademais dos cantos, a música da banda, o ruído dos foguetes e a ‘Danza da Nosa Señora dás Areas’ que se baila desde o século XVII nestas datas. Necesitas máis razóns?

A Semana Santa de Lugo

A Semana Santa de Lugo celébrase este ano co recoñecemento de festa de interese turístico con varios elementos
destacables como a historia das súas confrarías, o valor artístico das súas imaxes, a presenza de público de
diferentes idades ou o feito de que se involucren en parte dos seus actos diversas institucións.

Ademais, desde a vertente relixiosa, é singular incluír o Xoves Santo, na Procesión da Cea ou o Sagrario da Reserva. Este feito dota á Semana Santa de Lugo dunha característica única para os crentes. Ademais organízanse outras actividades como concertos e visitas arqueolóxicas.

O que está claro é que vivir a tradición en Galicia ten varias opcións e desde logo, nada teñen que envexar ás que saen dos nosos límites xeográficos. Non perdas detalle da programación que presenta cada en: https://bit.ly/2uyziEq

Anímate a descubrir ti mesmo a emoción que se vive en cada unha delas!

Deixa unha resposta

O teu enderezo electrónico non se publicará Os campos obrigatorios están marcados con *